أول كلامي سلام.. على أرض مصر.. وأهلها الحضر والضواحي.. النايم واللي صاحي.. واللي عايش بحرية وعدالة.. ومحافظ على صلاة الجماعة.. الكل سمع وطاعة.. وتحية للشجعان الإخوان.. من أول ريسنا مرسي.. ومعاه المرشد بديع.. والشاطر.. والكتاتني.. والبرنس.. والعريان.. الكل بقي متصدر.. وفي الواجهة.. نازلين تصريحات.. وتعليمات.. وبيانات.. واجتماعات.. في المقطم الصدق في كلامهم حنان.. والكذب مش طبعهم.. ولا عرفوا أبدا وخالص.. أن كلامهم كتير.. وفعلهم صورة بالكربون.. من اللي شافه أهل مصر من مبارك ورجالته زمان.. وفي يوم وليلة.. صبحوا هما القاضي والسجان.. واللي عمله مبارك في سنين.. نفذوه بالحرف في شهور وأيام.. نفس السيناريو يا عالم.. نفس السيناريو يا خلق.. وشعبنا الغلبان مستني بلة ريق والصبر عنده نفد.. وعقله مات م الخوف.. وقلبه مليان حزن.. إيه الحكاية إيه.. وكل ده كان ليه.. يقولولنا مصر اتغيرت والفضل لريسنا مرسي وجماعة الإخوان.وعشان ريسنا مرسي راجل شجاع.. وجريء.. وكمان همام.. وموافق على كل بنود اتفاقية السلام.. واتفاقية الغاز.. والنسر واحد.. واتنين مشط سيناء من شعرها وجابها أرض أرض.. على الشاشات وفي الصور.. وفي الأحلام.. ولما إسرائيل زعلت وخدت على خاطرها.. طيب خاطرها.. وسحب النسر.. وساب لها المجرمين والجهاديين والملثمين تخلص عليهم بمعرفتها.. ما هي سينا مفتوحة ليهم ع البحري.. وعلينا بس السمع والطاعة.. وسفيرنا المصري يوصل في التو واللحظة علشان ينفذ التعليمات ويوصل لريسنا الجواب.. وننسى خالص جماعة أنصار بيت المقدس اللي كشفت عن السر.. وأن النسر المصري راح للفرجة.. وهجمتنا كانت حصري للشاشة والإعلام.. وانتو عليكم تخلصونا من جماعة الإرهاب والألغام.. وريسنا الهمام ياخد جائزة السلام العالمي.. على إنجازاته العظيمة في تأمين المنطقة.. وسمعني أجدع سلام.ولأن ريسنا وجماعته.. الصدق عنوانهم.. وحاطين على عيونهم ستاير النسيان.. والكذب عمره ما زار دارهم ولا عرف عنوان.. والنهضة اللى كنا بنحلم بيها لبلدنا.. صبحت بقدرة قادر في خبر كان.. والمهندس الشاطر قال بالفم المليان .. لا فيه نهضة.. ولا عتبة.. ولا حتى السلام.. وده كان كلام.. ومنهم لله بتوع الإعلام اللى حرفوا كلامي.. وقالوا أي كلام.ولأنه نصير الفن والفنان.. اجتمع بأهل الفن.. وقال بكل حنان وقال الفن يا محترم.. لا هو حلال ولا هو حرام .. بين البنين.. والفنانين قالوا كلمتهم ريسنا فاهم.. وعارف.. وقلبه مع الفنان .. إنما عقله وعينه مع الإخوان.. نفس الوشوش من غير رتوش.. اللي كانت تسبح بحمد ريسنا مبارك الإنسان نصير الفن والفنان.. حتى لقائه بطلبة الجامعة.. وكلمته الجامعة وصوته الجهوري في كل ركن م الأركان.. أن حق الشهدا في رقبتي.. وانتو شباب مصر عليكو التصفيق.. والتهليل.. والسمع والطاعة.. وكلامنا بالمجان.. إنما شباب الثقافة وبتوع ساقية الصاوي والغناوي دول من عبدة الشيطان.. واحنا يا ولداه.. ماشيين وشايفين.. كل حاجة .. الخوف مالي قلوبنا.. والحزن بالفدان.. بنزرعه كل يوم.. وبنخاف م التحرش.. وم المشايخ.. اللي نازلين ضرب في المليان.. وصبحنا زي الحيارى.. وانقسمت بلدنا اثنين شوية يتفرجوا على عبدة الشيطان.. وشوية بيسبحوا.. ويمجدوا في عظمة السلطان!! Comment *
