مرسي لا يأكل العدس

المشهد الأول
الكابوس
'غرفة مكتب بها طاولة ومقعدان، و2 فوتي في أحد المقار الحكومية ذات الطابع الأمني.. رجل ممدد علي السرير في هدوء.. تم فجأة ينتفض صارخًا تحت إحساس الشعور بالاختناق.. ويسرع بالوقوف رافعًا رأسه ويديه لأعلي في محاولة لاستنشاف أكبر كمية من الهواء.. أنه د.محمد مرسي.. يفتح الباب فجأة علي صوت الصرخة.. ويدخل شابان تبدو عليهما اللهفة'.
الأول: إيه اللي حصل؟
مرسي: 'وهو يتمالك نفسه' أنا الرئيس المنتخب.
الثاني: احنا بنسأل ع اللي حصل.. وخلاك تقوم مفزوع كده.
مرسي: قلت لك أنا الرئيس المنتخب.. فهمت واللا لسة؟.. صعبة دي؟
الأول: يافندم إحنا ما بنسألش عن سيادتك.. إحنا بنسأل عن اللي جري.
مرسي: 'متهكمًا' اللي يسأل عن اللي جري.. يجيب الدفاتر تنقرا.. سمعت المثل ده في بلدكم قبل كده واللا ما سمعتوش؟!
الثاني: سمعناه يافندم.. إحنا فلاحين.. وعمومًا إحنا كنا عايزين نطمن علي سيادتك.
مرسي: لأ.. اطمن قوي.. وطمن اللي موقفينك هنا.. طمنهم كلهم من أكبر رتبة.. لأصغر رتبة.. قول لهم سيادة الرئيس المنتخب بخير.. وعلي سنجة عشرة.. وأربعة وعشرين قيراط كمان.
الأول: الحمد لله يا أفندم.
'يسمع جرس التليفون المحمول.. يهرع إليه مرسي.. يحملق في رقم الطالب.. ثم يبتسم ابتسامة واسعة.. ويهم بالرد بعد أن يشير بيده فينصرف الشابان ويغلقان الباب'.
مرسي: أهلاً يا حاجة.. بخير والحمد لله.. زي ما بيقولوا.. أكل ومرعي.. هه.. أيوة باكل كويس.. كويس جدًا.. لو طلبت لبن العصفور بيجي حالاً.. الله.. مش واخدة بالك واللا إيه يا حاجة ده أنا الرئيس المنتخب برضه 'بعد برهة' لكن بعيد عنك ياحاجة.. عيني راحت في النوم من شوية.. جالي كابوس طبق علي مراوحي.. قمت مفزوع.. والحرس هجم فاكرين فيه حاجة.. يا دوب فقت منه حالاً.. 'يستمع' ربنا يخليكي ياحاجة 'برهة' أنا قلقان ع الواد عبد الله.. نفسي أغمض وافتح ألاقيه خلص جامعته.. لكن إزاي؟ ده لسة في أول سنة.. وقال لي قبل كده إن العيال زمايله بيضاقوه.. وبيشتموه.. وكل ما يقول حاجة يقولوا له: ياخويا ريحنا م الفتاوي بتاعتك.. ح تبقي أنت وأبوك.. 'بصوت عال' ما أعرفش أبوه كان عمل لهم إيه ولاد الأبالسة دول.. بس أنا لازم اتصرف.
'يتوقف لحظة.. يتلفت حواليه.. يضغط علي جرس.. يفتح الباب فورًا، ويطل الشابان.. في انتظار ما سوف يقوله مرسي'.
الأول: أؤمر يا أفندم.
مرسي: العيال زمايل ابني عبد الله.. دول ولاد الفلول.. وولاد الحزب الوطني.. وولاد بتوع شفيق.. والأحزاب العلمانية.. بلغوا القيادة يشوفوا شغلهم معاهم.. ومايرحموش حد.. دول مش بعيد يكونوا ناصريين.. واللا اشتراكيين.. أو حتي شيوعيين والعياذ بالله.. لازم القيادة تتصرف وبسرعة.. قدامهم ساعة واحدة.
الشابان: 'يغالبان الضحك' حاضر يا أفندم.
'يشير إليهما فينصرفان.. ويستأنف الاتصال التليفوني'.
مرسي: خلاص ياحاجة.. الحكاية خلصت.. والجماعة ح يشوفوا شغلهم مع العيال دول.. المهم تكونوا بخير.. ما تشيلوش همي.. ده أنا كويس قوي والحمد لله 'يتسمع' إيه اللي أنا سامعه ده يا حاجة.. إيه الدوشة اللي عندك دي.. هه.. بتقولي مظاهرات؟.. حوالين بيتي؟.. دي هزُلت.. مظاهرات حوالين بيت الرئيس المنتخب؟ صارخًا فين الحرس الجمهوري.. فين الداخلية.. وفين الجيش نفسه.
قطع
المشهد الثاني
الثريد
'مرسي يدور في الغرفة مستغرقًا في التفكير.. يتوقف فجأة.. يتجه ناحية الجرس ويضغط عليه.. يفتح الباب.. ويطل الشابان'.
مرسي: 'وهو يشير لهما بأصبعه' أنا جاي لي ضيوف النهارده.
الأول: ضيوف؟!
مرسي: ومالك اتخضيت قوي كده.. أيوه ضيوف.. عندك مانع.. أنت واللا اللي مشغلينك هنا.
الثاني: أبدًا يا أفندم.. ما يقصدش.
مرسي: انتهينا.. تبلغوا المطبخ.. الغدا النهاردة لخمسة.. عايز بط.. وحمام محشي.. ومشويات.. ولحمة مسلوقة مع الفتة.. 'يهمهم لنفسه' خير الطعام الثريد.
الأول: 'مستفسرًا' إيه يا أفندم.. اللي بعد الفتة.
مرسي: مافيش.. كفاية كده.. وطبعًا شوية تحابيش كده م اللي بيعملوها.. 'ثم هامسًا لنفسه' كده الواحد يعرف ياكل.. ويشبع بحق وحقيق.
الثاني: أي أوامر يا أفندم.
'يشير لهما بالانصراف.. ثم يفرك يديه.. ويبدأ الدوران في الحجرة.. يتوقف كمن تذكر شيئًا.. يضغط علي الجرس.. يفتح الباب.. ويطل الشابان'.
مرسي: إخواننا عامين إيه؟.. عايشين ازاي.. وبياكلوا إيه؟
الأول: ما عندناش أخبار يا أفندم.. احنا مسئولين عن هنا بس.
مرسي: وفضيلة المرشد؟
الثاني: احنا بنسمع.. مجرد سمع.. أنه مالوش قوي في حكاية الأكل دي.. بياكل أي حاجة.. وأكلته ضعيفة قوي.. زي ما يكون طفل.
مرسي: 'صارخًا' طفل في عينك قليل الحيا.. أنت بتتكلم عن أمير المؤمنين يامارق.. يا مرتد.. أنا هحول رؤساءك لمجلس عسكري.. أنا القائد الأعلي للقوات المسلحة.
'الشابان يؤديان التحية العسكرية فيفزع مرسي.. ثم يتأملهما'.
مرسي: أنا رئيس متسامح.. المرة دي سماح.. 'ثم يتفرس فيهما ويشير' كمان مرة.
'الشابان يؤديان التحية العسكرية مرة أخري.. وهما يغالبان الضحك'.
الأول: احنا مالناش ذنب يا أفندم.. ده اللي بنسمعه 'يشير إليهما بالانصراف'.
مرسي: 'مخاطبًا نفسه' طبعًا فضيلته مالوش نفس.. سدوا نفسه البعدا ربنا يسد نفسهم.. وده راجل حساس.. وعنده مشاعر.. والضغوط عليه كثيرة.. من كل ناحية حتي م البعدا اللي معاه.. اللي مافيش حاجة تملا عينهم 'بعد فترة هامسًا' قطيعة.. تلاقيهم قاعدين ياكلوا زي الغيلان.. وبيعملوا اللي هم عايزينه.. دول غلبوا الشيطان.. وطلعوا كدابين وكلامهم كله فاشوش.. احنا واحنا.. وهنعمل ونسوي.. والآخر نزلوا علي مافيش.. وادينا أهه بين أربع حيطان.. 'صارخًا' حتي أنا.. أنا الرئيس المنتخب.
'يفتح الباب فجأة.. ويندفع الشابان علي صوت الصرخة رافعين مسدساتهما.. يهتز مرسي من وقع المفاجأة.. ويرفع يديه مرعوبا'
الأول: إيه اللي حصل يا افندم..
مرسي: 'يتمالك نفسه ويبتلع ريقه' ماحصلش حاجة.. ح يكون إيه اللي حصل يعني.. 'بعد أن يسترد نفسه' وازاي تقتحموا القصر بالشكل ده.. ورافعين السلاح. 'صارخا' حالا.. عايز وزير الداخلية يجي هنا حالا.. عشان أحاسبه علي الانتهاكات دي.. أنا اللي عملته وزير.. دبسوني فيه منهم الله.. عايزه حالا عشان أفهمه أني زنا الرئيس المنتخب.. أنا الرئيس المنتخب.
'الشابان يغالبان الضحك.. يتركانه يردد الجملة الأخيرة بصوت عال، ، وينصرفان في هدوء ثم يغلقان الباب يسمع جرس التليفون.. يسرع مرسي للرد'
صوت: مكتب سيادة النائب العام.. المحامي بتاعك طلب يزورك.. عندك استعداد تقابله؟
مرسي: ومين المحامي ده.. ومين اللي وكله.. يا مكتب سيادة النائب العام..
صوت: واحد منكم.. أخ يعني.. وما حدش وكله.. ده متطوع..
مرسي: كتر خيره.. وييجي في أي وقت.. بس بعد ما اتغدي وأريح شوية.. يعني قبل صلاة العصر.. أقول لك.. ييجي نصلي العصر سوا.. قول له.. دي أوامر الرئيس المنتخب 'ينصت مهتما' أمال إيه الدوشة اللي عندكو دي؟
الصوت: المظاهرات بتحاصر دار القضاء العالي 'يرتفع صوت المظاهرة' الإعدام للخونة.. الإعدام للعملاء.
مرسي: 'صارخا' ومين يا أخويا العملا دول.. والخونة اللي عايزين يعدموهم.. 'بصوت مرعوب' بلغ وزير الداخلية يتحرك فورا بنفسه.. ويفض المظاهرات دي بالقوة.. ومها كان.. مايفكرش في النتائج.. ويقول لي ضحايا ودم.. دم لما يلهفه.. وتقولوا له.. دي أوامر عليا.. أوامر الرئيس المنتخب.
- قطع-
المشهد الثالث
الدفاع
'نفس الغرفة.. يجلس مرسي ممثلا دور الرئيس.. وفي مواجهته المحامي الإخواني'
مرسي: والعمل يامتر.
المحامي: العمل عمل ربنا.
مرسي: ونعم بالله بس ربنا ما قالش ترموا نفسكوا في التهلكة.. وبعدين تولولوا..
المحامي: اللي في قدرتنا هنعمله.. بس إحنا محتاجين رأيكم برضه.. انتوا فهمتونا أن العالم كله معانا.. وامريكا ذات نفسها واقفة في ضهرنا.. وأوروبا.. ودول.. ومنظمات وجماعات، قاعدين في الانتظار.. وبعضهم دخل بالفعل.
مرسي: آي نعم.. كل ده حصل.. بس السياسة مالهاش كبير.. ومالهاش وش واحد.. دي بعشري وش.. إذا كان القرآن نفسه حمال أوجه زي ما قال الإمام علي.
المحامي: كرم الله وجهه.
مرسي: 'مكملا' السياسة يوم ليك.. ويوم عليك.. بس أمريكا معانا علي طول.. اللي بيننا مش ممكن يتغير ولا يتحول.. تركيا وقطر.. حركة حماس.. كل دول معانا قلبا وقالبا.. وبصراحة ماقصروش.. وفيه غيرهم ماسكين العصاية م النص.. ومنتظرين اللي يكسب يقفوا معاه.. أما الجماعة المجاهدين فالحمدلله علي قلب رجل واحد.. وأهم بدأوا من أول ما حصل اللي حصل.
المحامي: الجيش والشرطة سدوا عليهم كل المسالك.. والشعب معاهم..
مرسي: مؤقتا بس.. دول ما يغلبوش.. أنت ناسي.. دول دوخوا الروس والأمريكان.. ولما يدافعوا عنا.. بيكونوا في الحقيقة بيدافعوا عن وجودهم.. لأننا الصدر الحنون.. أحنا الوحيدين في العالم اللي احتضناهم وعطيناهم وطن.. فاهمني وطن.. أرض وحماية وسلاح وإمكانيات ما حدش يحلم بيها.
المحامي: كل ده كان ماشي.. وأنت نفسك أفرجت عن المحبوسين بأحكام.. والناس عارفة.. ومتحملة وساكتة.. لغاية ماجه الإعلان الدستوري بتاع 21 نوفمبر.
مرسي: 'مقاطعا بجدة' ما له يا أخويا الإعلان الدستوري.. ما أنتو اللي عملتوه..
المحامي: 'بنفس الحدة' عملناه بعد إيه..؟ بعد ما أنت قعدت تلالي وتشتكي.. وخايف من القضا.. وعايز تقصقص ريشه.. وخايف م المعارضة.. وخايف م الجيش.. خايف من كل حاجة.. وعايز تحصن نفسك.. وتحصن قراراتك.
مرسي: 'متحديا' تقوموا تعملوا إعلان دستوري بالشكل ده.. عينيك.. تشيلوا النائب العام وتعينوا واحد ثاني في ثانية.. صحيح أنا كنت فرحان.. عشان ما أعرفش القانون.. وفاكر اللي عملتوه صح. إنما.. إنما لأ.. كل ده كان ممكن يتعمل بطريقة ثانية.. بأسلوب ما حدش يحس بيه.. حاجة كده من تحت لتحت.. والمؤمن الحقيقي كيّس فطن.. يلعبها صح.. إنما أنتوا بقي..
المحامي: 'مقاطعا' ما تقولش انتوا.. إحنا ما كناش لوحدنا.. مكتب الإرشاد كله كان معانا.. ومجلس شوري الجماعة.. والمرشد ونوابه.
مرسي: ما هي دي البلوه.. كلفوكم.. وحضرو الشباب.. وجابوا الناس م المحافظات.. وعملوا اليفط.. وقالوا إحنا جاهزين قبل الهنا بسنة.. وصرفوا فلوس متلتة.. وقالوا هيسحقوا أي حد يتحرك.. وأول ما صدر الإعلان.. البلد ولعت.. وما حدش قدر يعمل حاجة.
المحامي: ومين اللي يقدر علي شعب.
مرسي: 'صارخا' قول لنفسك ياخويا.. وقول للبعدا اللي غرقونا..
المحامي: وأنت كنت فين.. ما أنت الرئيس برضه.
مرسي: 'هاتفا' الرئيس المنتخب.. قدام العالم كله.. علي سن ورمح.. وعن نفسي.. ميت فل وعشرة.. ما كامل إلا محمد.
المحامي: عليه الصلاة والسلام.
مرسي: 'مكملا' ما حدش يقدر يقول عني حاجة.
المحامي: واضح أنك ماكنتش متابع الجرايد.. والإعلام..
مرسي: 'محتداً' إعلان إيه يابو إعلام أنت.. وإيه اللي قالوه عني.. ماعندوش كاريزما؟! اسم الله ع الكاريزما بتاعة اللي عمالين يسقفوا لهم 'برهة' إحنا ناس فلاحين.. وباعترف أن بعض تصرفاتي ما كانتش هيه.. بس بعد ما جابو لي الجدع الخبير بتاع الإيتيكيت ده.. بقيت 'ينهض واقفاً يستعرض نفسه' مافيش كده.. وجاهة.. ورشاقة.. وذوق.. ولياقة.. ايتيكيت بقي.
المحامي: يا أخ مرسي..
مرسي: 'مقاطعا في حدة' ماتنساش نفسك.. 'محذرا بأصبعه' سيادة الرئيس المنتخب.. وبيننا وبين بعضنا.. ياريس.. أقل حاجة.. إنما الأخ مرسي.. والكلام ده تنساه.
المحامي: 'ضاحكا' ماشي.
مرسي: وماتنساش أن أنا اللي تحركت.. ورحت للناس.. وصليت الجمعة في كل جوامع مصر تقريباً.. في كافة المحافظات.
المحامي: 'نافذ الصبر متهكما' وخطبت كمان في كل الجوامع.
مرسي: 'مكملا' آي نعم.. وكلامي كان في محله.. وعجب الناس.
المحامي: بس الكلام.. لا بيشبع جعان.. ولا بيعالج عيان.. ولا بيستر عريان..
مرسي: 'مندهشا' ما شاء الله.. اسم الله عليك.. بقيت شيوعي أهه.. 'برهة' وإيه كمان؟!
المحامي: أنا باكلمك كرجل قانون.. باكلمك بالأصول اللي كل واحد يعرفها.. مش الشيوعيين بس..
مرسي: ونسيت أن الرازق ربنا..؟ والشافي ربنا؟.. واللي بيستر ربنا..؟ والبني آدم مجرد سبب ربنا سبحانه وتعالي بيسخره.
المحامي: لأ مانسيتش.. ومانسيتش برضه أن ربنا سبحانه وتعالي رزقكم من وسع.. وتلتل الفلوس معاكم.. وبني لكم قصور.. وأفاض عليكم من نعمه.. ونسيني أنا بالذات.. مع أني الأقدم.. وصاحب سابقة في الجهاد والسجن ومن الصابرين المحتسبين..
مرسي: طب.. وده قليل؟ يابختك.. ده كفاية عليك قوي.. الطمع مافيش منه فايدة.. 'فجأة وبحدة' واسمعني.. بعد اللي طلع منك ده.. ح يكون لنا حساب تاني.. وعلي كده أنت لا تنفع تدافع عني ولا عن غيري.. الله الغني.. وأنا قررت أدافع عن نفسي.. أنا لا جاسوس.. ولا عميل.. لا اتصلت بحد ولا عرفت حد.. ولا تعاملت مع دول هنا واللا هنا.. والسي. آي. إيه ما أعرفش عنها حاجة..
المحامي: كد هو 'يضحك عاليا.. ضحكا صاخبا مستمرا'.
-قطع-
المشهد الرابع
الحلم
اجتماع يضم أغلب قيادات الإخوان.. من أعضاء مكتب الإرشاد.. ومجلس شوري الجماعة.. مع محمد مرسي
الشاطر: اللي إحنا فيه حاليا نتيجة لأخطاء.. ماكانش يجب نقع فيها.. إحنا جماعة لها تاريخ.. جماعة عاشت عصور الاحتلال والملكية وانقلاب يوليو 1952 وحكم العساكر اللي استمر من وقتها حتي ثورتنا في 25 يناير.،. ووصولنا للحكم.. وهنا كان لازم نتبت في الكرسي.. عشان نعيد دولة الخلافة.. ونرجع مجد الإسلام.. 'برهة' لكن..
مرسي: 'مقاطعا' لكن إيه؟ إحنا عايزين الكلام يبقي واضح.. مافيش أي لزوم للتورية والكناية.. وكل واحد فينا يحس أنه متهم.. الأخطاء اللي بيتكلم عنها الأخ خيرت الشاطر.. مين اللي ارتكبها؟ ده اللي إحنا نتكلم فيه.. ولابد من الصراحة..
الشاطر: ده كلام صحيح.. بس ماننساش مبادئنا.. 'برهة' السمع والطاعة والكتمان.. في المنشط والمكره.. هه.. والأخ مرسي ماينساش أنه بيكلم النائب الأول لفضيلة المرشد.. وإذا احتدمت الأمور.. فعليه السمع والطاعة.. بدون تفكير..
مرسي: 'محتدا' وانت ماتنساش إن أنا رئيس الجمهورية المنتخب.
'همهمة عالية'
الشاطر: 'ضاحكا في سخرية' ده إحنا اللي عاملينها.. الأخ مرسي ناسي أنه كان الاحتياطي بتاعي.. وناسي أنه اعتذر عدة مرات. وقال إنه خايف يستبعدوني وتلبس فيه.. وهو مش قد الحكاية دي.. وناسي كمان الملايين اللي طلعت من تحت إيدي..
مرسي: ما حدش بيدفع من جيبه يا أخ خيرت.. الحمدلله الخير كتير.. ويوم ما قلنا يا انتخابات الفلوس نزلت علينا زي المطر.. ياراجل ده حتي أمريكا ساهمت.. والمهم إني بقيت رئيس الجمهورية المنتخب.. وكان المفروض أخد وضعي.
الشاطر: أنهي وضع.. ما كنت رئيس قدام الناس كلها..
مرسي: 'بغيظ' رئيس مقيد.. مالوش قرار.. ما يقدرش يتصرف في حاجة.
الشاطر: كنا بنساندك.. وده واجب الجماعة اللي عملتك.. ولو سبناك لواحدك كنت فرجت علينا الدينا.
صوت: ما هو حصل فعلا.. والدينا اتكلمت..
مرسي: 'مقاطعا' اسكت أنت يا بلتاجي.. ياللي خربتها وقعدت علي تلها.. اسكت الله لا يسيئك.. وكفاية.
صوت: أهو ده إرهاب فكري.. اسمح لي يا أخ مرسي.
مرسي: واسكت أنت كمان يا برنس.. وبلاش الكلام اللي ما تعرفش معناه، ده اللي يسمعك يقول يا ما هنا ياما هناك.. ويفكر انك شيوعي.. اسكت ياخويا ربنا يهديك.
الشاطر: ده أنت ما حدش مالي عينك.. وفاكر نفسك رئيس جمهورية بجد.. وناسي أن اللي جابك يقدر يوديك.. واللي قعّدك يقدر يقومك.. واللي حضّرك يقدر يصرفك.
'همهمات استحسان'
صوت: بدون حساسيات.. وعشان ماننساش مبادئنا.. إحنا جايين النهارده نصحح إخطائنا عشان المركب تمشي.. ونرجع ثقة الناس فينا.
مرسي: الأخ العريان يقصد أخطاء مين؟ الأخطاء أخطاؤكم.. والغلط غلطكم.. وكل اللي حصل من عمايلكم.. واللي عايز يتكلم يقول الصح.. أو يسكت.
الشاطر: الحقيقة الظروف هي اللي وضعتنا في الموقف ده.. حقيقي وصلنا للسلطة.. إنما الكرسي كان بثلاث رجول.. كرسي غير ثابت.. غير مستقر.. بسب الأخر مرسي.. اللي لقي نفسه فجأة رئيس.. ما صدقش روحه.. وانطلق زي القطر اللي فرامله سايبة.. واحنا ما اخدناش بالنا في البداية.. قلنا نسيبه يحتك بالناس.. ويثق في نفسه.. وساعة الجد نتدخل.. الأخ مرسي ساب نفسه علي سجيتها.. واتصرف بالغرائز.. وده راجل كلنا عارفين غرامه بالخطب.. ولو انفتح ما ينسدش.. ده غير حبه اللي مالوش نظير للأكل.. وده عمل لنا فضايح.. ضيعت هيبة المنصب.. وهيبة الإخوان.
مرسي: 'يقاطعه محتدا'.. الأخ خيرت بيتوهنا في كلام فاضي.. عشان يغطي ع البلاوي اللي عارفها كويس.. وكان وراها كلها.
صوت: أنا شايف
مرسي: 'مقاطعا في حدة' أنا شايف أن المشرحة مش ناقصة قتلي.. 'ثم للشاطر' قول لأحمد المغير ينقطنا بسكوته.. وكفاية اللي عمله.. 'برهة' أنا كنت باصحي م النوم ألا القرارات الجمهورية جاهزة ع التوقيع.. كانوا عاملين بصمجي.. وملاحقيني 'يمثل' عايزين نتمكن.. عيّن يا مرسي.. حط رجالتنا في كل حتة.. ما تسيبش خرم إبرة.. ولا تسأل في القضا.. ولا في الإعلام.. ولا المعارضة.. دول كلهم.. رجالتنا هيقعدوهم في البيوت زي الولايا.. 'ملتفتا للشاطر' هه.. نقول كمان؟
'الشاطر يتلفت حواليه قلقا.. ثم يومئ للجميع.. ويهم بالانصراف وهم معه.. بينما يتمتم'
الشاطر: واضح أن الأخ مرسي تعبان.. المفاجآت أثرت فيه.. ورجع زي ما كان قبل العملية.. ربنا يقدرنا.. ونعرضه علي نفس المستشفي في أمريكا.
مرسي: 'يصرخ' أنت كداب.. أنا مش مجنون.. أنت كداب.. كداب
'يفتح باب الغرفة بسرعة.. ويدخل الشابان في حالة هلع بينما مرسي ينتفض فوق السرير.. يلتقط أنفاسه بصعوبة.. يمسكان به.. ويساعدانه علي النهوض'
الأول: مافيش حاجة يا افندم.. هدي نفسك.. فيه إيه؟
مرسي: 'في إعياء' كابوس.. كابوس فظيع.. برهة أنا سليم.. أنا أربعة وعشرين قيراط.. ما حدش يصدقهم.. ولاد الكلب دول.. أنا الرئيس المنتخب.
- قطع-
المشهد الخامس
العدس
'غرفة جديدة تشبه الغرفة السابقة من ناحية الحجم والاثاث.. مرسي يتحرك جيئه وذهابا.. يضرب كفا بكف.. يضغط بيديه علي رأسه كأنه يريد أن يتذكر شيئاً.. فجأة يسمع رنين التليفون.. يلتقطه بسرعة.. يدقق في اسم الطالب'
مرسي: إيوه ياحاجة:
الحاجة: عايزة أطمئن عليك في المكان الجديد.. 'ثم بصوت واثق' باسم الله ما شاء الله.. النهاردة كنت رئيس بحق وحقيقي.. وغصب عنهم كلهم.. وكويس أنك رفضت تلبس أبيض في أبيض.. بلا قلة قيمة.
مرسي: ده كان موقف يا حاجة.. بعد ما طلع كلام الجماعة بتوعنا علي فاشوش.. فضلوا يقولوا أمريكا لسه ما قالتش كلمتها.. والغرب كله واقف في ضهرنا.. وكمان تركيا مش قليلة.. وقطر اللي بتشرّ فلوس..
الحاجة: وليه تقول فاشوش.. دي مؤمنة كلمتني.. وباكينام كمان.. وطمنوني قوي.. قالوالي أنت راجع راجع.. والحكاية لسه في البداية.. بعدين ح تسخن والدم يبقي للركب.. والعالم يتدخل.. وساعتها أنت الرئيس الشرعي..
مرسي: 'بحماس' والمنتخب.. الرئيس المنتخب.
الحاجة: طبعا.. ودي فيها فصال.. لازم تثق في كلام الجماعة.. أنا شخصياً متفائلة.. بلاش تقلق.. دول قالولي إن عدد كبير من المسئولين في العالم.. طالبين زيارتك للتفاهم.. والحكومة الجديدة موافقة.. والجيش ما عندوش مانع.. بيقول إنه ورا الشعب..
مرسي: وانت مصدقة يا حاجة إن الجيش ما بيعملش حاجة.. بينفذ كلام الشعب بس.. ده كلام يا حاجة.. الجيش ورا كل اللي حصل.. واللي راح يحصل.
الحاجة: يا أخويا.. كان عمل.. لما اسم عليك كشحت طنطاوي وسامي عنان.. أنت بس خلي تكالك علي ربنا.. وأصبر.. الصبر طيب.
مرسي: 'يتنهد بغيظ' أصبر علي إيه.. واللا إيه.. تصوري يا حاجة رجعت م المحكمة متفائل.. وسعيد م الشغل اللي عملناه في القفص.. قلت أخد شوية فوسفور يعوضوا المجهود.. طلبت ع الغدا.. جنبري واستاكوزا.. وشوية سبيط علي محار.. راحوا.. وغابوا.. ورجعولي بطبق عدس.. وحتة جبنة.. ورغيفين.. ايه ده ياابني العسكري قال لي: ده تعيين السجن اللي هنا.. وبعدين برق في وشي.. وسألني.. هم كانوا بيأكلوك إيه في الحتة اللي كنت فيها..
الحاجة: يالهوي.. عدس وجبنة؟
مرسي: وعايزاني أخد الأمور ببساطة.. وأصبر.. وأطاطي للريح.. علي أمريكا ماتفكر وتتحرك؟!
الحاجة: 'تقاطعه' طب.. وعملت إيه؟
مرسي: بعت.. جبت فراخ علي حسابي م الكانتين..
الحاجة: طب والجماعة اللي معاك في القضية.. عاملين معاهم إيه؟
مرسي: ماليش صالح بحد يا حاجة.. إن شاء الله عنهم لاكلوا ولا شربوا.. ده أنا الرئيس المنتخب.. 'يصرخ' أنا الرئيس المنتخب.
-قطع-
المشهد السادس
أشتاتا آشتون
'مرسي جالسا في مواجهة كاترين آشتون.. مسئولة الشئون الخارجية في الاتحاد الأوروبي'
آشتون: أنا ممتنة من حكومة مصر.. ومضطرة أقول كده بعد ما أخرج من هنا.. الحقيقة أنا طلبت التقي بيك، وأطمئن عليك وافقوا علي الفور.. وزي ما أنا شايفة الحجرة جيدة.. الجرايد بتوصل يوميا.. عندك تليفزيون.. وتليفون..
مرسي: 'مقاطعا' ده أنت جاية تأكدي كلامهم وتساعديهم.. مش جاية تطمني.. ونتفاهم علي الخطوات المتفق عليها.. 'محتدا' الأمور هنا بتسيء كل يوم وماشية من سيء لأسوأ.. أنا النهاردة جابولي ع الغدا عدس.. تعرفي العدس؟
آشتون: كل الناس تعرف العدس.. إيه المشكلة؟
مرسي: يا مدام.. أنا راجل باحب الأكل.. واحب اتمتع بخيرات الله.. وطول المدة اللي فاتت كانوا قايمين معايا بالواجب.. فوجئت النهاردة.. وبعد ما نقلوني هنا بالمعاملة غير اللائقة.. لأ.. بالمعاملة الفظيعة..
آشتون: يادكتور دي كلها شكليات.. أمور ثانوية.. ما حدش يتكلم فيها.. والشعب المصري نفسه.. مش كله بيلاقي العدس ده.. 'برهة' أنا جاية أطمئن فعلا.. لأن معاملة السياسيين تحت التحقيق بتوضح نوايا وسلوكيات النظام.. وفهمة للحرية.. والديمقراطية.. عشان نحدد حدود التعامل معاه.. وأنا شايفة.
مرسي: 'مقاطعا في حدة' أنت مش شايفة حاجة أبدا.. أطلب جنبري واستاكوزا.. وشوية سبيط علي شوية محار.. يجيبولي عدس.. 'يصرخ' عدس ياعالم.. ده أنا الرئيس المنتخب.
آشتون: 'بدهشة' كده التفاهم معاك بيكون صعب جداً.. مستحيل.. أنا شايفة أن الأمور تطورت بسرعة.. ولابد يشوفك طبب نفسي.. أنت محتاج تسترد هدوءك.. وثقتك بنفسك..
مرسي: 'يضحك ساخرا' همه قالوا لك.. دي إشاعات.. إنما أنا الحمدلله زي الفل.. يمكن متوتر شوية.. إنما صحتي بمب والحمدلله.. وعايز أعرف منك إيه اللي استقر الرأي عليه.
آشتون: اتفضل كمل..
مرسي: 'فنزعجا' أكمل إيه.. عايز أعرف اخر كلام عند الاتحاد الأوروبي.. ومؤكد تعرفي نية أمريكا.. والتوليفة اللي شغالة معانا.. أمريكا والاتحاد الأوروبي وتركيا.. وقطر.. وحركة حماس.. و..
آشتون: 'مقاطعة' أنا مش فاهمة..
مرسي: مش فاهمة ازاي.. ده قالولي إنه اتفاق شبه مكتوب.. وموثق.. وأن أمريكا ح تبدأ بقطع المعونة.. وقطر تسحب فلوسها، وتركيا ترفض صادرات مصر.. وتعمل مع الاسطول السادس شبه حصار بحري.. والاتحاد الأوروبي هياخد موقف مقاطعة.. اقتصادية وسياحية.. وحماس تغذي فضائل الارهاب في سيناء.. وتبعت الجماعات التكفيرية لداخل مصر.. والسلاح موجود.. والفلوس مالهاش أول من آخر.. و
آشتون: 'فزعة' دكتور مرسي.
مرسي: 'مقاطعا بصوت عال' إذا كان كده.. أنا مستعد أفطر عدس واتغدي عدس.. واتعشي عدس.. أيام.. وأسابيع.. وشهور..
آشتون: سيد مرسي.. أنت محتاج ترتاح.
مرسي: 'مستعطفا' كلامك هو اللي هيريحني.. بس اتكلمي.. ريحيني ربنا يريح بالك.. آشتون: الكلام اللي انت قلته ده.. كان مطالب للإخوان.. قدموها مكتوبة.. وموجودة عندنا.. واحنا مش مجانين عشان نوافق علي ده.. أو حتي نفكر فيه.. إحنا دول محترمة.. مش عصابات اجرام..
مرسي: 'صارخا' يعني اتلهي علي عيني.. وأكل عدس يا ست آشتون 'تنسحب خارجة في خوف بينما مرسي يهب راقصا ومغنيا' أشتاتا آشتون.. والعدس مع الليمون.. أشتاتا آشتون.. والعدس مع الليمون.. أشتاتا آشتون..
-النهاية-