»أيوه باكلم نفسي؟ مش عارفه أنا تايهه ليه؟ ليبرالية؟ ليبرالية إيه؟ يعني هو انتي يابنت الحسب والنسب كنتي متربيه علي الليبرالية؟ولا كنتي واكله وشاربه ليبرالية؟ ثم إيه العلاقة الطردية بين الليبرالية والملوخية؟ طيب علي الأقل أنتي عارفة طعم ولون وريحة الملوخية، لأ وعارفه كمان طشة الملوخية.. وبالرغم من كده نازله كلام عن الليبرالية والدولة المدنية والديمقراطية، لأ.. وناقص تتكلمي علي الشوفانية ! طيب خايفة ليه؟ طيب من إيه؟ بتقولي من السلفية؟ طيب ما انتي أباً عن جد سلفية؟ ثم انتي مالك ماتعيشي في حالك وتقفلي عليكي بابك؟ آه قصدك متلخبطة من أمر الإخوان؟ طيب ومالهم الإخوان دول 100 فُل وعشرة.. عارفة أنت مشكلتك إيه؟ مشكلتك أنك كنتي في جره وطلعتي بره.. ويظهر أن السابقين- أقصد السوابق - كان معاهم حق في قولهم أن أنتوا لسه مش مؤهلين للديمقراطية - هو أصل اللي ماكملوش دراستهم من وجهة نظرنهم زينا واتخرجوا من ماسورة الكبت والإحباط.. أيوه الماسورة اللي كانت في النفق الضلمه هي اللي عملت كده فينا، وكمان أصل لما انتي أكلتي الأكل المزروع علي مياه المجاري.. العملية باظت عندك أكتر، وجالك شيزوفرنيا وطنية فاختلطت عندك المفاهيم وضربت في راسك هلاوس سياسية خلتك - بعيد عن السامعين- مصابة بوسواس قهري تسببت فيه متلازمة الإخوان والسلفيين، وهو اللي خلق عندك حالة هلع نفسي مش ناتجة عن خوف لاسمح الله، لكن عن خلط تكنولوجي وبيولوجي نتج عنه تنافر كيميائي بين السلفوإخوانية والأمية المدنية ! لأ.. وياريت حالتك السيكوباتية وقفت عند هذا الحد.. لأ كمان إيه يعني لو المجلس العسكري هو اللي مسك الحكم.. يعني بذمتك عاجبك الخلعان الأمني اللي سابك في غابة الحرية من غير لا ماما ولابابا . لاانتي عارفه تكملي المشوار ولا ترجعي.. ولاحتي عندك الفول الناشف اللي كان مع عقلة الصباع الذكي واللي علّم بيه طريق عودته مع إخواته للبيت لما ماما وبابا قرروا نتيجة الفقر تسريبهم ! لأ بقي.. مش معقول تقولي إنك مش فاكرة حتي حدوتة عقلة الصباع.. معلش حقك علّي أصلك قضيت طفولتك كلها في حدوتة علي بابا والأربعين حرامي.. طيب إيه كان فايدة الزن عليكي كل يوم بالحدوتة، لما كبرتي وماقدّرتيش أن فيه ناس طيبة كانت بتسرق علشان تأكل العاطلين الطيبين زيك ! آه حدوتة أمنا الغولة.. والله لكي حق تضايقي مني.. أنا كده فهمت أن آخر تربيتك وقفت عند حدوتة أمنا الغولة .. لما قالت لك لولا سلامك سبق كلامك لكلت لحمك قبل عظامك.. بتقولي إيه هي أمنا الغولة غيرت كلامها وقالت لك آخر مرة " لولا سلامك سبق ثورتك.. لقلعت عينك قبل لقمتك " طيب ماسمعتيش كلام أمنا الغولة ليه؟ علي العموم تستاهلي اللي جرالك هي يعني كانت مرات أبوكي؟ أقولك الظاهر إن العقدة النفسية الخواجاتي اللي كملوا عليكي بيها نتجت عندك من حكاية سندريللا، وكبر عندك إحساسك بالظلم وأنك بنت البطة السودا !! طيب معلش.. أنا مضطرة أسيبك دلوقتي.. لأن مرحلة علاجك هاتطول.. وعايزه لك يجي 5 -10 سنين جلسات علشان أقدر أطلعك علي خير.. وأهلك للانتقال من المرحلة التمهيدية الديمقراطية للمرحلة العبثية السيمفونية اللي فيها الأمان في الدولة المدنية.. اقصدي الأموية ! مسك الكلام.. علي فكرة أنا مش متلخبطة.. الناس هم اللي لخبطوني !