الثورة جلبت للمصريين الخير كله . في ميدان التحرير مثلا انفتحت ابواب الرزق امام مئات الباعة .. شاي وشيشة ومحشي وممبار وهريسة بجوز الهند وعرقسوس ، وكل اللي نفسك تحبه . الحلاق بيهلّب رزق عياله . والست اللي بتشوف البخت بتطلع يوماتي بعشر برايز ، واللي صوته مش بطال بيغني ويجمع تمن غداه وسجايره . حتي اللي مالهوش في المحشي مش محروم . من طلعة الشمس يربط الكرافتة ويسرح علي الفضائيات . يضرب بقين عن مصر وثورتها والدستور والإخوان والانتخابات ، ويلعن أبو خاش الحكومة ويقبض المعلوم ويبرطع علي اللي بعدها. بعد الثورة ما فيش حد بينام من غير عشا.