ألقيت بنفسي في الميكروباص المتجه إلي رمسيس فجاءت جلستي بجوار سيدة مسنة يبدو عليها التعب الشديد وبمجرد أن لمحت في يدي الجريدة فاجأتني قائلة:- - ألا هو مش مكتوب عندك يا بني عنوان الشيخ كوبر؟ - الشيخ كوبر مين يا حاجة؟ - هو فيه حد في مصر النهاردة مايعرفش الشيخ كوبر؟ - يا أمي أنا إللي أعرفه واسمه كوبر ده مدرب بتاع كورة مش شيخ واسمه بالكامل هيكتور كوبر. - لا يابني مش دكتور باقولك ده شيخ حتي بالأمارة بيقولوا عليه أرجنتيني.. إزاي مش عارفه مع إن ملامحك أرجنتيني زيه هو بسلامتك أرجنتيني؟ - ههههههه لا أنا مش أرجنتيني أنا هندي! - بس يا بني الميكروباص ده رايح رمسيس ! - ايوه مانا نازل محطة دلهي قبل رمسيس بمحطتين! - أيوه تصدق فيك شبه من أميتاب باتشان بس هي محطة دلهي دي بعيدة عن محطة الأرجنتين بتاعة الشيخ كوبر؟ - تاني الشيخ كوبر برضه يا أمي كوبر ده مدرب منتخبنا الوطني والأرجنتين دي بعيدة أوي. - حاروح حتي لو كانت في آخر بلاد المسلمين. - لا الحقيقة هم مش مسلمين هم مسيحيين. - ازاي يا بني مش الأرجنتين دي ريسها كان اسمه كارلوس منعم هو فيه منعم يبقي مسيحي؟ - وهو فيه كارلوس يبقي مسلم ؟ - مسلم ولا مسيحي هو أنا حناسبه أهو يجيبلنا عنوان الشيخ كوبر ده ويبقي حلو لو كان شيخ ودكتور يمكن ألاقي عنده مرهم للركب لحسن زي مانت شايف كده تعبانة أوي. - مرهم إيه وركب إيه بس ده مدرب كورة يعني حتي مش بتاع علاج طبيعي وملاعب كنت قلت ممكن ينفعك. - أيوه يا بني بس أهو نفع مع اللعيبة وخلاهم يجروا زي الحصنة طول الماتش.. هو انت ملكش في الكورة ولا إيه ولا تكونش من الكونغو تصدق فيك شبه من الواد الاسود إللي جاب فينا الجون وكان حيموتنا لولا صلاح الله يكرمه! - يا حاجة انتي حتجيبلي تهمة. الله لا يسيئك لو حد سمعك دلوقتي ممكن ألاقي نص مليون واحد في الشارع علي الأقل بيضربوني وحليني بقي علي ما أثبتلهم اني مش كونغولي.. احلفلك بإيه طيب اني مصري زيي زيك بالظبط؟ - بس ركبك مش وجعاك زيي ولو كنت حاسس بالوجع كنت تفتح الجرنان وتشوفلي عنوان الشيخ كوبر بدال مانت قاعد تقطم فيا، يا بني أنا زي والدتك برضه واحلفك بيها لو عايشة وبرحمتها لو ميتة تدلني علي عنوان الشيخ كوبر. - طب ومقام سيدي كوبر يا شيخة اللي مش ممكن أحلف بيك كدب الراجل ده مدرب كورة وملوش دعوة لا بالطب ولا بالمشيخة، بس انتي لامؤاخذة يعني عايزة إيه من كوبر؟ - عايزة حجاب يا بني حجاب انا سمعت إنه له كرامات كتير.. بيجوز البنية ويرجع العجوزة صبية!. - ههههههه الله يحظك يا خالتي هو حد قالك ان كوبر زي السكر النبات.. عموما لو عايزة ترجعي صبية يبقي عليكي وعلي عمرو دياب يكتبلك الدوا ! - بصراحة مش عايزة الحجاب ليا عايزاها للبت بنتي معملوها عمل وكل ما يجيلها عريس يطفش وخايفة يفوتها الدور ومفيش غير الشيخ كوبر إللي ممكن يفك العمل ده! - مش قادر أصدق وداني بقي حضرتك متوقعة إن كوبر يفك العمل المعمول لبنتك ويجيبلها العريس المنتظر؟ - إللي خلاه يفك العمل المعمول للكورة المصرية من 27 سنة تفتكر ممكن يغلب في حتة حجاب صغير أجوز بيه البت؟