السيد احمد عبد الجواد يعود حزينا منكسرا كعادته كلما ذهب لمشاهدة مباراة للزمالك علي المقهي مع أصدقائه. أطفال الشارع يزفون سي السيد الذي تدلدل شنبه من علي فمه حتي كاد يسقط كورقة شجر وقت الخريف والعيال يتحلقون حوله يغنون ويهتفون: الزملكاوي أهو الزملكاوي أهو فينظر لهم نظرة أسي. سي السيد يتجه صوب منزله وتستقبله أمينة كعادتها علي السلم وهي تطلق البخور من حوله وهو يتثاءب من الملل والنكد والحزن. - حمدالله علي السلامة يا سي السيد تعالي يا خويا نورت بيتك ومطرحك، ومن شر النفاثات في العوئد، عمال تتاوب يا خويا علشان محسود، عين وصابت يا سي السيد، ومن شر حاسد إذا حسد. - حسد إيه بس يا ولية وإحنا عمالين كل ماتش نتغلب كده؟ - معلش يا سي السيد لكل جواد كبوة يا خويا، أيوه كبوة وتعدي هههههههه كبوة جواد يا سي السيد احمد عبد الجواد. - انتي بتقلشي أهو كمان يا أمينة والله عال يعني يوم السوبر ماسمعتش صوتك ورجعت لقيتك نايمة ومخمودة من المغرب. - هههههه انت لسه فاكر يا سي السيد ده انا كنت لسه صغيرة أيام ماتش السوبر إللي غلبتونا فيه بس والنبي ماتزعل روحك وزي مبؤلك كده صدقني كبوة وحتعدي. - مفيش فايدة يا أمينة مفيش فايدة دي مابقتش كبوة جواد والحكاية باينلها حتطول. - بكرة الزمالك يغلب من تاني ويرجع زي الفل طول ما فيه جمهور مخلص زيك كده بيشجع الزمالك وبيحلم بيه حتي وهو نايم. - شامم ريحة تريقة في كلامك يا أمينة؟ - كان ينقطع لساني يا خويا بس فعلا يا سي السيد انت كل مرة تنام فيها ومتأخذنيش يعني الزمالك يكون مغلوب ألاقيك بتحلم الظاهر بالماتش وتفضل تقول سنظل أوفياء مش ده يبقي الاخلاص حتي في المنام؟ - والله ماخبيش عليكي خايف الزمالك لو استمر كده يهبط لدوري المظاليم. - وماله يا سي السيد أهو يبقي ريح وارتاح! - كلام إيه ده يا أمينة، قصدك إيه يا ولية؟ - يوه سامحني يا سي السيد أحب علي يدك مكانش قصدي. - اومال قصدك إيه يا ولية يا خرفانة انتي؟ - قصدي يعني المظاليم في نعيم يا خويا ويا بخت من بات مظلوم ولا باتش ظالم. - يا ولية انتي فاهمة معني الزمالك يهبط يعني إيه؟ دي تبقي نهاية الكورة في مصر. - هدي نفسك يا سي السيد انت صاحب مرض يعني الزمالك يهبط من الدوري ولا انت يجيلك هبوط في الدورة الدموية تروح فيه؟ - احترمي نفسك يا ولية انتي بتكرريها تاني وعايزة الزمالك يهبط فعلا؟ - وهو احنا نفوز علي مين لما الزمالك يهبط؟ - إتلمي يا أمينة لحسن ودين النبي ارقعك كف أخليكي تهبطي من الدنيا كلها. - مش قصدي يا سي السيد أنا بس أقصد الدوري يعني مايحلاش من غير الزمالك، هو احنا لينا بركة غيره بكرة يرجع يكسب ومين عارف مش يمكن ساعتها ابقي زملكاوية علشان خاطرك وترجع تلاقيني رحت الاستاد اشجع الزمالك ولما تزعقلي أقولك الزمالك ناداني يا سي السيد؟ - يمين بالله لو اتريقتي ع الزمالك تاني لما يتغلب لأكون مروحك علي أمك. - مش كده اهدا شوية لو كل زملكاوي بعد ما يتغلب في ماتش يروح مراته علي امها يبقي مفيش بيت زملكاوي هيعمر يا خويا. - كلمة تانية حاسيبك واروح أسهر بره. - هيء هيء انت بتتلكك يا سي السيد، ألا قولي يا خويا بصحيح هم زبيدة وجليلة زملكاوية زيك كده ولا أهلوية؟ - أهلوية يا امينة أهلوية وحاسس انهم هم إللي جايبين حظ العوالم ده للأهلي. إحنا لو عندنا ولو حتي نص واحدة زي زبيدة ولا جليلة مكانش ده بقي حالنا. - ده معلش اسمه قصر ديل يا سي السيد آه يا خويا متزعلش مني.. الأهلي بيكسب لأنه فريق كويس وفيه استقرار، عمرك شوفت فريق بيغير المدرب بعد كل ماتش؟ - لا بس خلاص بقي احنا جيبنا مدرب برتغالي جديد إنما مرعب اسمه ايناسيو. - انسوا يا سي السيد المشكلة مش تدريب. - وكمان بقيتي خبيرة ملاعب يا امينة أنا خلاص فاض بيا من الفريق ده. - ليه اليأس ده كله بس يا سي السيد. انت مش عارف انه لا يأس مع تشجيع الزمالك ولا تشجيع الزمالك مع اليأس؟ - وكمان بقيتي فليسوفة يا أمينة. بس مفيش يأس إزاي وفرق النقط وصل 21 نقطة عارفة يعني إيه 21 نقطة يا امينة؟ - ما تخليش فرق ال21 نقطة يا سي السيد ينسوك ان الزمالك لسه له ماتش متأجل!. - طب بصي بقي دي آخر فرصة وندر عليا الماتش الجاي لو الزمالك اتغلب لاكون حالق... - أحب علي يدك ماتكملهاش، مفيش حاجة تستاهل، كله إلا شنبك يا سي السيد شنبك غالي عليا يا خويا!