- يا بني عقبالك ما تشتري قناة مش تتجوز هيفاء، هو انت تلاقي ضفر مراتك ياولا؟ آه منكم جنس الرجالة كلكم كده عينكم زايغة. مكالمة من أمي في البلد. - ألف مبروك يا ولدي. - الله يبارك فيكي يامه.. بس يعني مبروك علي إيه إذا كانت المشكلة لسه ماتحلتش؟ - اطلع من دول وبلاش لؤم الخبر مالي الجرايد وكل الفضائيات بتذيعه - خبر إيه بس يامه أنا مش فاهم حاجة؟ - عايز تخبي علي امك انك اشتريت قناة الاون تي في ياولا؟ - ههههههههههه الله يحظك يامه ضحكتيني وانا مليش نفس اضحك كنت فاكرك بتتكلمي علي مشكلة نقابة الصحفيين. - أيوه أيوه كروتني ياولا علشان مطلبش منك الحلاوة، بقي بتشتري قناة بحالها ومكونش انا أول واحدة تعرف؟ - قناة إيه بس يامه ده أبو هشيمة مش أنا، تلاقيني بس وحشتك علشان كده اسم أبو هشيمة جه في ودنك زي اسم هشام ولدك الغالي - ويطلع مين أبو هشيمة ده يااتش؟ - أبو هشيمة يامه راجل الأعمال المشهور - أعمال ايه يعني سحر وكلام من ده؟ - ههههه لا يامه أعمال يعني بيزنس. - هو انا عرفت الأولانية لما هاعرف التانية؟ - ابو هشيمة يامه حد مايعرفش أبو هشيمة؟ - مش واخدة بالي بصراحة. - اقولك طيب ابو هشيمة ده إللي كان متجوز هيفاء وهبي. - طب مش كنت تقول كده من الأول آه طبعا خلاص كده عرفته.. عموما عقبالك. - إللي عند ربنا مش بعيد يامه.. آه لو لعبت يا زهر واتبدلت الأحوال لكون متجوز هيفا وابقي عال العال.. ههههههه انتي نفسك تبقي حماتها ولا إيه؟ - يا بني عقبالك ما تشتري قناة مش تتجوز هيفاء، هو انت تلاقي ضفر مراتك ياولا؟ آه منكم جنس الرجالة كلكم كده عينكم زايغة. - طيب يامه طيب متزقيش، ربنا يسمع منك واشتري قناة واخليكي تقدمي برنامج توك شو انتي وابويا. - ونقابتكم أخبارها إيه كده ان شاء الله؟ - اسكتي يامه عايزين يفرضوا عليها الحراسة. - ومالك حزين كده ليه حد طايل؟ - طايل إيه بس يامه باقولك هايفرضوا عليها الحراسة. - طب وفيها إيه؟ الحكومة كتر خيرها عايزة تحرسلكم النقابة من الأشرار. - يامه الموضوع مش كده خالص، فيه ناس عايزة تحط ايدها علي النقابة علشان متقوملهاش قومة تاني. - إزاي يعني ياولدي، هو انتوا مش متحدين ورافضين الحاجات دي؟ - أيوه لكن فيه ناس مننا شقت الصف وعملوا جبهة تصحيح المسار. - وهو تحمير المومبار كمان بتعملوله لجنة ياولدي؟ - تحمير مومبار إيه بس يامه هو احنا شغالين في مسمط؟ باقولك تصحيح مسار. - طب بس ما تتحمقش قوي كده تحمير مومبار ولا تصحيح مسار أهي كلها كوارع.. كويس انك فكرتني أبوك عايزيني أعمله لحمة راس علي الغدا النهاردة. - ألف هنا وشفا يامه بس تسمحيلي يعني استأذنك علشان الشغل؟ - شغل إيه مش بتقول ان الصحافة خلاص بح؟ لم هدومك وارجع لسه قاعد في مصر عندك تعمل إيه؟ - اصبري بس الله لا يسيئك خلينا نشوف حاترسي علي إيه. - تصدق ياض ياهشام أنا ماشوفتش حد في تقل دمك؟ - ههههههه محظوظة يامه أصلك ماشوفتيش بني آدم شو!