الفنان صلاح عبد الله يمارس هواية المشى على شاطى بالساحل الشمالى ترلم .. ترلم .. اكثر من ترلم علي مدي يوم كامل والفنان القدير صلاح عبد الله مش بيرد، قلت أكيد بيعيد خارج القاهرة، أو مكبر دماغه من هوسة تليفونات العيد، فجأة لقيت تليفوني بيرن، والنمرة بتاعة عم صلاح .. انا دايما بنده له بعم صلاح .. الو يا عم صلاح انت فين ؟ - انا في الساحل ؟ * بتصيف ولا بتعيد ولا بتصور ؟ - اصور ايه دانا ما صدقت خلصت اعمال رمضان، جاي اصيف واعيد، جاي اغسل ذهني اصلي تعبت قوي في الاربع اعمال اللي اتذاعوا في رمضان . * في المصيف بتكتب شعر ؟ - الشعر ده هو اللي بيجيني مش انا اللي بروح له، الشعر زي العفريت ساعات يظهر قدامي من غير ميعاد وساعات يختفي ما اشوفوش . * فيه اعمال بتقراها وانت بتعيد ؟ - جايب معايا سيناريو، مع اني جاي استكن واريح اعصابي .. حقي ولا مش حقي ! * حقك طبعا بس اكيد فيه هواية ما بتمارسها وانت في الساحل .. مش معقول ها تكون قاعد منك للشط بتغني زي ليلي مراد « بحب اتنين سوا .. الميه والهوي» ! - يضحك عم صلاح ضحكة مجلجلة ثم يقول : « انا بعشق البحر وبخاف منه .. والبحر ده له حكاية معايا ما تتنسيش ابدا .. زمان رحت اسكندرية انا وواحد صاحبي كان عنده جرأة انه يأجر فلوكة يأدف بيها، كنا بنرجع للشط بعد ما نستمتع بالبحر، دي كانت هوايته فقلت ليه ما تكونش هوايتي، سبته نايم في الشقة ونزلت اجرت فلوكة ومسكت المأدفين، وادف يا صلاح لحد ما لقيت نفسي في وسط الميه ابص يميني .. شمالي .. ورايا .. قدامي مفيش حاجه شايفها، راح فين الشط عشان اعرف ارجع، كانت هواية مهببة ها اضيع بسببها، عقلي قال لي يا واد انت ادفت في الاتجاه ده يبقي أأدف بالعكس، وفي عز ما انا ملبوخ لقيت سفينة كبيرة جايه من بعيد الموجه بتاعتها ها تقلبني وواحد من عليها بيزعق بعزم ما فيه « ارجع لو قربت ها تغرق »، رديت بصوت مخنوق « ما انا مش عارف ارجع» بعدها لقيت فلوكة جايه تنجدني . * كررت التجربة تاني ؟ - من يومها وانا بقول لأي بحر انت في حالك وانا في حالي .. نبقي اصحاب من بعيد لبعيد .. اتمشي علي شطك .. أحبك واتأمل فيك . * طبعا .. لكن بالتأكيد كان عندك هوايات اخري مارستها في طفولتك وصباك وشبابك ؟ - اهم هواية من صغري هي التمثيل اللي اتحولت من هواية لمهنة، واكبتها هواية الزجل اللي اكتشفها في اصدقائي فصدقت اني شاعر وزجال . * ما لعبتش لعبة .. ما ربيتش كلاب .. سمك .. كتاكيت .. مكانش عندك هواية اخري بتمارسها غير الشعر والتمثيل ؟ - انا كنت حريف شطرنج وشكلت فريق لما كنا بنشتغل في الثقافة الجماهيرية وخدت المركز الثاني علي مستوي الجمهورية، بعدها سبت الشطرنج كهواية لأنها تعبتني ،كنت لما بنام الاقي نفسي بحلم بالعسكري وهو بيتحرك، والفيل جاي يقول للملك « كش» واصحي مفزوع علي الملك اللي مات ! * وبعد الشطرنج ؟ - لعبت « البلياردو» واللي كان مزاملني لما بندخل مباريات الفنان عمرو دياب وكنا بنكسب، وشاركني ايضا محمد الحلو وممدوح عبد العليم بعدها دخلنا في دوامة التمثيل والاخراج ومابقاش فيه وقت لا لبلياردو ولا شطرنج. * بتشارك المدام في هوايتها المفضلة ؟ - هواية المدام المشي وبشاركها طبعا .. المشي بالمعقول صحة ومطلوب .
