عبقريتو : من فضلك يا عبقريتا بلاش تعطليني عن كلامي علي الشات مع صديقي العبقري الأمريكي البروفيسور ديكسون ديسبومير . عبقريتا : يعني الموضوع سر ، ومش هاقدر أعرفه ؟ عبقريتو : لأ طبعا هاتعرفيه .. وخصوصا أن هذا مشروع عبقري جدا ، وكل الناس هاتشوفه لما يتنفذ . عبقريتا : شوقتني .. إيه المشروع ده ؟ عبقريتو : أولا لابد أن تكوني خيالية وعلمية وذكية علشان تفهمي فكرة التصميمات الالكترونية الرائعة التي صممها هذا البروفيسور ، وهي حقول زراعية وحدائق معلقة في الهواء وسط الشوارع وبين العمارات السكنية العالية وطوابقها المتعددة ، وسوف يشاهد الناس من وراء شبابيكها اللون الأخضر الحقول الزراعية في بيوت زجاجية، حيث يمكن أن يزرع فيها الفواكه والخضروات والحبوب لملايين البشر.. ليساهم في مكافحة الجوع . عبقريتا : علي فكرة أنا اكتشفت أني أنا كمان عبقرية ، لأني نفذت هذه الفكرة علي مستوي صغير علي سطوح بيتنا وبلكونتي وزرعت بالفعل أنواع خضار وفاكهة . عبقريتو : يابنتي ، انتي بتفكري في نفسك بس .. أما أنا فسوف أدرس الفكرة بجدية علشان تستفيد منها بلدنا كلها..وعلي العموم كل واحد بيتصرف علي أد عبقريته ! المحررة
