أيام وعيدك يا وطن.. تهل أنواره.. الأضحي عيدنا الكبير.. الله أكبر.. يا محلا أنواره.. تتوحد الكلمة.. وتكتر اللمة.. وتضمنا ضمة.. وتعلن بروح وثابة وبهمة.. لكل الدنيا والعالم إن المسلمين جايين.. وكلمة الحق طالعة من القلب.. بصوت واحد تقول آمين. أيام ويعلي الأذان.. وتبتهل العيون.. وترتوي الأبدان نلقي البشر علي جبل عرفات.. بالحمد والتهليل والعبرات.. رفعين الإيدين بالدعوات.. يسري الدمع جوه القلوب زرفات آهات.. أنات.. تناجي المولي وتسبح بحمده.. وتقول لبيك اللهم لبيك.. تزينها حبات الخشوع.. وترويها قطرات الدموع.. تهدي النفوس.. تهمس بدون كلمات.. تلقي الملائكة في السما.. ترد علي كل نفس طيبة.. لبيك وسعديك يا حاج بيت الله.. يللي تركت الديار والدار.. والاهل والاحباب وجيت إلي عرفات.. علشان ترضي المولي الكريم.. وتطلب الرحمة والغفران.. نادم علي العمر إللي فات من غير طاعة أو صلوات. العيد عيدك يا وطن.. وعلي أرض مصر الطيبة.. تلقي القلوب موصولة بالقرآن.. وساحات المساجد تنادي الله أكبر.. وجنبها علي طول تلقي الكنايس مليانه بالورود والنور.. وتهدي الحب والفرحة.. الله محبة.. والمحبة فيكي يامصر.. لا تفرق بين مسلم ومسيحي.. ولا ألوان ولا أجناس. العيد عيدك ياوطن.. مئذنة وأذان.. وأجراس حنان.. حب وأمان.. وعيون تصون العهد.. م المهد حتي اللحد.. وقلوب بتطرح سنابل حب من غير عدد أو عد.. وشجر بيروي الورد.. وإيدين حبايب ود.. وشفايف تسبح بحمد الله.. تقول يارب. وتبتسم أيامنا وننتظر أحلامنا.. ونعيش معاك ياعيد.. تتجدد المواعيد.. وقلوبنا تبقي حديد.. ونفرح بيوم العيد.. أحلامنا أبسط م البساطة.. الستر والصحة واللقمة والهدمة.. والرحمة تملأ القلب.. نهدي اليتيم الحب.. ونعطف علي المساكين.. ونرفع ايدينا لفوق.. وندعي نقول يارب.. تديم علينا النعمة وتديم علينا الصحبة.. والبسمة تكسي الوشوش من غير رتوش أو غش.. وإيمانا يسكن في حنايا القلب.. بأتمني ليكي يامصر.. ترتفع رايات الهلال والصليب بالنصر.. والحب جوه القلوب.. يشع نوره.. سرور ودستور لكل البشر تحفظه الاجيال ويسافر الاوطان بالاميال.. يعلم الدنيا الانسانية والحنيه.. كلمتنا تصبح عفية وحياتنا تفضل هنية.. لو تعرف السكه ونحب بعض بجد ونقول لكل الخلق العيد عدي علينا.. وعاش بين أيدينا.. وبنهديه للبشر.. مع حبات العرق.. ودموع عنينا. وبأحلم ليكي يامصر.. تعود شمس أيامك.. وأحلامك.. وتتحقق بأيدين ولادك كل الأماني نكتب علي جدران الحيطان أجمل معاني.. ونحفر علي كف الزمن تاريخ زماني.. وأداري دموعي عن حسادك.. وفي أعيادك تلمينا ونكون كلنا ولادك وأحفادك. وبخاف عليكي يامصر.. من عتمة الليل الطويل.. وكل بخيل كتم حبه.. وخد منك كل شيء.. ومازرعشي في أرضك سنبلة للخير.. ولا روي شجرك والنخيل.. ولاحفظ ليكي الجميل.. وبأحزن عليكي يامصر.. لما بشوف الخوف.. معشش في القلوب.. ومالي تجاعيد الوشوش.. لكني شايف ع المشارف.. عيون مليانة أمل.. وللأنين بتحوش.. والايد في الايد.. تنادي من بعيد.. يللا بيناع العمل.. ونقول لكل من زارك أدخلوا مصر آمنين.. وكل سنة.. وكل مصر طيبة.. وقريبة من كل قلوب الطيبين.