رمضان كريم.. كل سنة وأنتم طيبون.. وبصحة وعافية. يا تري مستعدين لهذا الشهر الكريم.. طبعاً الكل في نفس واحد ح يقول.. يمكن نقلل شوية في النفقات علشان غلاء الاسعار.. لكن مش ممكن أبداً بعد صيام طويل بالنهار مش ح نفك عن نفسنا بالليل ونتفرج علي المسلسلات ومفيش مانع نضحك شويتين مع البرامج »الحمرا والخضراء والصفراء« علشان اليوم يعدي.. إذا كان ده تفكيرنا.. فعليه العوض ومنه العوض.. عندي فكرة يمكن تكون صعبة لكن مفيدة »ماتيجوا مرة نتفق علي رأي ونحاول نقاطع السلع الغالية وكمان نقاطع المسلسلات ونجرب نفسنا.. ونتفرغ لربنا.. ده شهر في السنة. أحب الشهور إلي الله ورسوله.. طبعاً أنت مش عجبك كلامي.. وح تقول يا عم ساعة لقلبك وساعة لربك.. ح اقولك جرب مش ح تخسر حاجة.. إنما ح تكسب كتير.. إحسبها مع نفسك - الدنيا مش أكل وشرب وفرجة وخلاص - وأيام رمضان تحتاج منك شوية جهد وعبادة وتقديم صدقات وصلة أرحام ورعاية أيتام.. جرب ولو لمدة يوم واحد.. وحاول في تاني يوم.. وخللي صيامك يكون مقبول عند الله.. وكل سنة وانت بخير وصحة وعافية.. ورمضان كريم.