قال روكا الحرامي للملك رمسيس الثاني: حفيدك بتاع الدخل المحدود عدَّي يا عم رمسيس . الحكومة واخداه في حضنها ومافيش ع الحِجر غيره . بتدلعه وتهشكه وتلاغيه احلي ملاغية ، عملِت له كارت إكتروني زي الأكابر. يحطه في مكنة البقال ترمي في حِجره زيت وسكر ورز وشاي .. وخير ربنا كله . قال الشيخ غريب : صبر ونال ! قال روكا للملك : حبيبك مسعد بيه أبو شرز بتاع المحدود عمل مؤتمر صحفي بعد ما صرف التموين بالبطاقة الجديدة . كان آخر عياقة سيادتك . لابس الشرز البني بتاعه ع اللحم وداهن حواجبه زيت تموين ومحزِّم بنطلون البيجامة بدوبارة فوشيا رابطها فيونكة وضوافره كانت منوَّرة القبقاب . قاعد علي حَجَر وقدامه قفص مقلوب مفروش عليه جرنان والعَلَم بتاع المحاديد بيهفهف علي يمينه. علم أسود لا مؤاخذة جواه رقعة بيضا مرسوم عليها هيكل عظمي ، لما يعجبه كلام مسعد بيه ينط من جوه العَلَم ويقف ع القفص وهات يا تسقيف ، وبعدين يرجع مكانه تاني ويقرفص في الرقعة . لما الصحفيين سألوا مسعد بيه قال لهم ربنا يعمر بيتها الحكومة الاكترونية. وحلف إنها في غلاوة ابنه البكري دعم الله. وقال لهم يا ريت تكمَّل جميلها وتقول للمكنة تحدف لحمة . ومش ضروري تكون مشفية . تحدفها بالعضم عشان العيال يتعرفوا ع الشوربة. ويا ريت الحكومة توصي المكنه تحدف مع التموين بتاع رمضان كنافة وقطايف ولوازمها من فزدق ولزدق وعين جمل والذي منه ، ومين قدم شيء بيداه التقاه . قال الشيخ : وهنيالك يا فاعل الخير ! قال روكا للملك : الحكومة مبسوطة عشان بتاع المحدود فرحان ومزأطط بالكارت الاكتروني ، وناوية والنية لله تعمل للكارت تطوير.ح تحط جواه عفريت صغنون من بتوع شبيك لبيك . المحدود ينفخ في الكارت ويقول الرقم السري بتاعه يلاقي العفريت تحت رجليه ويقول له أحلامك أوامر يا دودو، ويطلب كل اللي بيحلم بيه سيادتك . حلاوة طحينية وعيش أبيض وبدنجان وحرنكش وبلطي وعجينة طعمية ومعسل وكازوزة ! قال الشيخ : وصابونة بريحة يا معلم ! قال روكا : بتاع المحدود عامل للحكومة عمل . بتموت في دباديبه يا عم رمسيس. الوزرا عندهم أوامر يريحوه ع الآخر . قالت لهم إوعوا تحرموه من حاجة عشان ما ينامش زعلان . قال الشيخ : أصل دعاه مستجاب يا معلم ! قال روكا : وعشان خاطر عيونه ، الوزير كل طلعة شمس لازم يضرب ع الريق بدل التصريح عشرة . تصريحات فيها الشفا ومتنقية ع الفرازة . يسمعها ويتكيف وينام ويشخر ويحلم بالهنا اللي ح يشوفه بكره . قال الشيخ : يا مواعدني بكره ! قال روكا : بس مسروع ومتلهوج زي عوايده . مافيش علي لسانه غير »امتي ييجي بكره« . هي الحكومة مالها ببكره لا مؤاخذة . هي ح تقول لبكره تعالي يا بكره . وإفرض سيادتك انها قالت له . هو بكره عنده ودان يسمع بيها يا عم رمسيس ؟ قال الشيخ : أطرش يا معلم !
