هالة أبوعلم : سيداتى سادتى أهلا وسهلا بكم فى حلقة جديدة من برنامج يحدث فى مصر، معنا اليوم قطاع مهم جدا من قطاعات وزارة الإسكان والتعمير قطاع المجتمعات العمرانية الجديدة ونستضيف الليلة سيادة اللواء عادل نجيب النائب الأول لرئيس هيئة المجتمعات العمرانية أهلا وسهلا بسيادتك يا فندم ل / عادل نجيب : أهلا بكم عمرو الشناوى : فى الحقيقة كان لنا سؤال لسيادة اللواء عادل نجيب على مشروعية إن أى شاب بياخد قطعة من إبنى بيتك كمثال وهو محظور عليه إنه يتصرف فى البيع فى الأرض أو فى قطعة الأرض ولكن بعد ما يبنى لو بنى دور ثانى وثالث هل مسموح له يتصرف فيها بالبيع ل/ عادل نجيب : هو الحقيقة من شروط المشروع إن هو المواطن ما يبيعش قطعة الأرض أو الشقة إلا بعد 5 سنوات ولكن برضه سيادة الريس فى تيسيراته للشباب أمرإن هو الدورالأول والثانى من حقه إن هو يتصرف فيهم بس لازم بنفس الشروط اللى بتنطبق على المواطنين اللى بيستحقوا الدعم فى هذا المشروع هالة أبو علم : سيادة اللواء يعنى هل بتتأثر سياسة بناء المجتمعات العمرانية الجديدة بالزيادة اللى بتتعلق بزيادة البناء يعنى مثلا زى زيادة أسعارالحديد والأسمنت والأرض نفسها بتزيد فهل سياسة بناء المدن الجديدة بتتأثربزيادة أسعارمواد البناء ل / عادل نجيب : بطبيعة الحال أى مشروع اقتصادى وخاصة فى مجال البناء بيتأثر بأسعار السوق ولكن احنا فى هيئة المجتمعات بنتجه إن احنا نخلى قوى العرض والطلب أوقوى السوق إن هى تضبط الموضوع يعنى ببساطة حضرتك لما ابتدينا المحورالثانى اللى أنا كنت عايز أتكلم عليه فى مشروع الرئيس مبارك لإسكان الشباب اللى هو محورالمستثمرين احنا فى هيئة المجتمعات العمرانية يعنى احنا عايزين كل الناس تشارك فيه سواء الدولة بأجهزتها المختلفة والمحافظات أيضا كنا شجعنا القطاع الخاص فأعلنا إن احنا مستعدين إن احنا نخصص أراضى للقطاع الخاص لإنشاء شقق بنفس الشروط للشباب اللى هى 63 متر الحقيقة اتقدم لنا عدد كبير من القطاع الخاص من شركات القطاع الخاص لكن احنا عشان نضمن الجدية خلينا بنك الإسكان والتعمير يراجع مستندات هذه الشركات وهو كان الكومينت اللى هو كان بيقول إن الشركة الفلانية تقدر تبنى وتاخد أد إيه توصيات البنك فاحنا كهيئة بناخد توصيات البنك باعتباره رجل متخصص وبيحدد ما نسميه البناة المالية للشركة ، الشركة (أ ) هنخصص لها 100 فدان ، الشركة ( ب ) 80 فدان وهكذا القطاع الخاص فى البداية اشترك معانا فى المشروع وابتدى يخصص الشقق ، حضرتك فى بداية المشروع فى 2005 انتى عارفة حضرتك ارتفاع أسعار الحديد والأسمنت فى 2006/ 2007 ابتدت الشركات تتضايق شوية ولكن بعد ما السوق ابتدى يتزن ابتدت شركات القطاع الخاص تيجى تقول أنا عايز أعمل شقق اقتصادية للشباب ليه لإن بقى فيه العرض والطلب اللى موجود فى السوق بقى مشجع أكثر احنا كنا بندى الشركة 50 % تعمل مشروع قومى اللى هو عدد الشقق اللى احنا ملتزمين به أمام سيادة الريس إن احنا ننفذها وندى له 50 % يعمل شقق أخرى حتى مساحة 120 متر عمروالشناوى : عايزين نوضحها يا فندم يعنى هذه الشركة شركة ( أ ) خدت 100 فدان و ( ب ) خدت10 فدان هل بتتقدم لكم على أساس إنها تاخد 5 فدان يبقى إسكان اقتصادى للشباب و5 فدان يبقى زى ما هم عايزين ينفذوا وللا عدد الوحدات يعملوا 50 وحدة للشباب و50 وحدة للتصميم الاقتصادى بتاعهم ل / عادل نجيب : حضرتك احنا برضه فى خصصنا لما تعاملنا مع القطاع الخاص ادينا له قلنا له انت طبقا لتقدير البنك إن هو يقدر يشتغل فى 50 فدان زى ما حضرتك قلت احنا بندى له ربع المساحة يشتغل فيها فى البداية إذا أثبت جديته يعنى إيه يعنى بنى الشقق بالمواصفات اللى أنا عايزها عمروالشناوى : للشباب؟ ل / عادل نجيب : آه لازم يبتدى بالجزء المخصص للشباب يبتدى الأول للشباب وما بسمح لوش إنه يعمل لى البرنامج يعنى الشاب بندى له 10 آلاف جنيه نقدا من الدولة بشيك يروح يدفعه فى قيمة الشقة فى البداية القطاع الخاص ابتدى يغالى فى أسعاره ولكن لإن فيه تنافس أنا عندى 136 شركة بتشتغل فى هذا المشروع فى جميع المدن على اتساع فى أنحاء مصر كلها فبقى كده خلقنا نوع من التنافس فابتدى فى الأسعاراللى ابتدى يبالغ ينشال ويروح لواحد ثانى فابتدى الأسعار تنزل عمروالشناوى : لو أرخص شركة دلوقتى عارضة وحدة مثلا ب 70 ألف جنيه للشباب ولنفرض يعنى بيستوعبوا الطلب بنسبة 30 % من احتياجات الشباب ولازال هناك طلب كبير ولكن الإمكانيات المتاحة ما تسمحش لأى شاب إنه يدفع هذا الرقم سواء حتى بالمقدم والأقساط وما إلى ذلك فيه إمكانية إن انتوا تدعموا الشركات ، تدعموا الشباب أكثرمن كده هل فيه فى خطة الدولة النزول وتخفيض سعرالوحدات إلى حد معين ل / عادل نجيب : الحقيقة احنا فى الوحدات اللى احنا ببنشئها المشروع لما ابتدى سنة 2005 كانت الوحدة تتكلف 50 ألف جنيه النهاردة الوحدة يمكن 70 أو 75 ألف جنيه عشان سؤال حضرتك الأسعار طبعا الأسعار أثرت فى ارتفاع الأسعار هو ده اللى موجود فى السوق لكن احنا كهيئة مش عايز أتكلم على وزارة الإسكان لكن كهيئة لنا برضه إن احنا بنستهدف جميع الشرائح يعنى يمكن الوقت مش هيتوسع إن أنا أقول لحضرتك إن احنا عندنا نظام القرعة بنحدد قطع صغيرة من 300 ل 400 متر مربع بنحدد سعرها بيبقى سعر مقبول وبنعمل عليه قرعة ثانى قرعة عملناها تقدم لها 80 ألف شاب أو 80 ألف مواطن وكان المعروض حوالى 4000 قطعة هالة أبوعلم : سيادة اللواء يعنى الحقيقة فى التقرير اللى عرض منذ دقائق كان البعض بيشير لبعض السلبيات اللى ممكن يكون فيه بعض الشكاوى منها من خلال السكان اللى موجودين فى هذه المدن الجديدة ناخد منها مثلا مشكلة المواصلات سواء المواصلات الداخلية أو المواصلات اللى بتربط ما بين المدن الجديدة وأماكن عملهم مقر عملهم فى المدن القديمة مثلا أو فى العاصمة أيضا مشاكل زى المياة زى توافر العيش يعنى أشياء من هذا القبيل أيضا مشكلة ثانية كنت عايزة أقول لحضرتك عليها خاصة بمسألة انتوا يعنى لما بتنظموا أو بتخططوا مدن جديدة بترسموا لها رسومات هندسية معينة وأحياء بطريقة شكلية معينة فيه بعض التجاوزات بتحصل من بعض قاطنى هذه المدن بيستولى على أراضى مش بتاعته أو إن هو وخاصة اللى لهم نشاط تجارى مثلا ممكن إن هو يبنى سوبر ماركت عمروالشناوى : بياخد الدورالأرضى بالجنينة اللى حواليه مثلا؟ هالة أبوعلم : و ممكن يبنى فى مناطق مش مسموح له بها إزاى برضه بتتصرفوا فى مثل هذه التجاوزات يعنى أنا بذكر لحضرتك بعض المشاكل اللى ممكن يعانى منها بعض سكان المدن الجديدة ل / عادل نجيب : كويس إن حضرتك مطلعة على المشاكل بتاعت المدن عندنا لكن أحب أأكد نقطتين الجزء الأول إن أنا بوجه الإخوة رؤساء أجهزة المدن إن احنا هيئة خدمية احنا لسنا تجار أراضى ولكن ننشد التنمية فهدفنا الرئيسى التنمية إذن أنا لما أوفر للمواطن عمرو الشناوى : وتوفير الخدمة للمواطن ورفع نهضة المواطن ل / عادل نجيب : دى النقطة اللى جاية بداية أنا لما بخصص أرض أنا عايز اللى ياخدها ينميها إذن ما عندناش مجال إن أحد هياخد قطعة أرض يسقعها أو يبيعها أويتاجر فيها احنا لن نسمح بهذا الكلام وقانون الهيئة قانون خاص يسمح لى بحرية الحركة هالة أبوعلم : الشكوى اللى تقدم بها المواطنون لأى جهة يعنى لو فيه ل / عادل نجيب : أنا لومواطن يعنى طبعا الجهاز اللى موجود فى المدينة موجود ، رئيس الحى لإن احنا بنقسم المدينة إلى أحياء إذا أعياه البحث أنا مكتبى مفتوح أنا موجود فى مكتبى من 7 وثلث صباحا لغاية7 ونص مساءً ومحدش بيتصل بى يعنى لو عايز يجى لى أهلا وسهلا عمروالشناوى : بس كويس المرونة اللى حضرتك بتتكلم عليها فى هيكل إنشاء هيئة المجتمعات العمرانية الجديدة أهم حاجة إن انتوا تملكوا سلطة سحب قطعة الأرض أو سحب الوحدة وهو ده فى الحقيقة اللى بيبقى فى النهاية رادع ل / عادل نجيب : تمام حضرتك زى ما قلت إديت للقطاع الخاص فى مشروع الإسكان ربع القطع إذا أثبت جديته هدى له الربع الثانى ما أثبتش بقول له شكرا عمرو الشناوى : انت بتدى للقطاع الخاص فى مدينة جديدة إنما انت فى الأول بتسعى إن انت تعمل مدينة جديدة طبعا هالة أبو علم : أنا عايزة أبدأ مع حضرتك موضوع بقى المواصلات لإنه مهم جدا لإن بيقال يا سيادة اللواء عن المدن الجديدة إنها ممكن بنينا مساكن لكن خاوية فاصية محدش قادر يروح يسكن لإن المسافة يعنى مفيش وسائل مواصلات ل / عادل نجيب : أنا طبعا لا أنكرأن هناك مشكلة مواصلات لأنها موجودة فى البلد كلها لكن احنا فى المجتمعات العمرانية بنحاول قدر الإمكان إن احنا ننشط النقل الداخلى بالتعاقد مع شركات نقل وبننسق مع المحافظات المحيطة القاهرة ، 6 أكتوبر ، الجيزة عشان دى مسئولية المحافظة يعنى أنا غير مسموح لى إن أنا أسير خط مواصلات من المدينةالجديدة إلى العاصمة عمرو الشناوى : هل احنا محتاجين يتسمح لكم ؟ ل / عادل نجيب : مفيش مشكلة بيننا وبين المحافظات لكن كله موضوع تنسيقى موضوع اقتصادى فى الأساس هالة أبو علم : يعنى مسألة المواصلات دى مش تابعة لحضرتك ؟ ل / عادل نجيب : لا تابعة لحضرتى لإن أنا يعنى أنا فى خطتى كهيئة مجتمعات بعمل التنسيق حاليا مع وزارة النقل مشروعات لربط على سبيل المثال القاهرة مع مدينة العاشر من رمضان بالقطار ، العاشر من رمضان مع بلبيس مع العبور ، الشرقيين مع القاهرةالجديدة هالة أبو علم : ايوه لإن الغرض الأساسى هو تحقيق الهدف من بناء المدن وهو إنه يتم يعنى إسكانها بالمواطنين ل / عادل نجيب : بس مشروعات النقل مشروعات كثيفة الفاوند يعنى ثقيلة الحقيقة وبننفذها احنا بننفذ حاليا مشروع بيربط برج العرب الجديدة بالإسكندرية بقطار سكة حديد مع وزارة النقل هالة أبو علم : لو قلنا مثلا تكلفة إنشاء هذه المدن الجديدة تكلفتها برضه لإن المواطن عايز يعرف برضه أد إيه المجهود والتكلفة برضه يعنى عمرو الشناوى : المواطن عاوز يسكن ل / عادل نجيب : المواطن عايز يسكن فى منطقة كويسة ودى النقطة الثانية اللى أنا ما قلتهاش إن احنا كهيئة خدمية التوجيه الرئيسى إلى كل رؤساء الأجهزة أن المواطن دائما على حق وإن هو لابد من التواصل مع المواطنين إن احنا نقدم لهم الخدمات المتميزة عن المدن القديمة إيه اللى يجذب الشاب إنه يسكن فى مدينة جديدة إذا لم يكن زى ما قالت إحدى المواطنات اللى ساكنة عندنا عنده مسطحات خضراء كبيرة ، عنده شوارع محترمة ، عنده إنارة ، عنده مياة راحوا المدينةالجديدة بيشعروا بالمنافسة عمرو الشناوى : لكن احنا إيه اللى بيحكمنا عشان ننشئ مدينة جديدة يعنى احنا بندور على مكان قريب من الخدمات ، قريب من مصالح الناس وللا محتاجين مساحة فاضية فلقينا هنا مساحة فاضية فنروح عاملين فيها مدينة جديدة إيه الضوابط اللى بتحكم فكرنا كدولة تخلينا نعمل هنا مدينة جديدة ، هنا مدينة جديدة ل / عادل نجيب : الفكرالأساسى هو الاقتصاد أنا لازم أبحث المدينة زى ما أشرتى حضرتك إن هو يسكن ويرجع ثانى لا ده مش مطلوب احنا عندنا فى المدن مناطق صناعية ومناطق تجارية ومناطق إدارية مش عايز أتعدى على وزارة الصناعة والتجارة لما أقول لحضرتك إن أغلب صادرات مصر النهاردة من المدن الجديدة المناطق الكثيفة اللى موجودة فى العاشر من رمضان وفى 6 أكتوبر وفى مدينة السادات وده أمل الصناعة فى مصر المدن الجديدة هالة أبوعلم : يعنى ده حقيقى اللى حضرتك بتشير إليه إن المفروض يكون فيه تكاتف بين عدة جهات مسئولة يعنى مثلا إن فيه بعض المدن الصناعية يا ريت هذه المشروعات الصناعية ينشئ بها مجتمعات توفير السكن للعاملين فى هذه المشروعات يبقى العامل مش مضطر إنه يرجع مرة أخرى للقاهرة وإلا نبقى ما حليناش مشكلة آه عملنا المصنع فى مدينة جديدة ولكن برضه فضل الحال على ما هو عليه فأصحاب هذه المشروعات الصناعية لو يقدروا ينشئوا مجتمعات لهؤلاء العمال أو لهؤلاء الموظفين ينشئوا نوادى اجتماعية ينشئوا مثلا وحدة صحية بالتالى مش هيكون محتاج اللى بيسكن هناك أو اللى بيعمل هناك إنه يرجع ثانى عمروالشناوى : انت عارف سعادتك ده كان فكرالدولة فى الأساس يعنى احنا شفنا مدن صناعية بتنشئ مستعمرة كاملة بالنادى والمستشفى وكل حاجة ل / عادل نجيب : ما زال فى التخطيط يعنى احنا حاليا...؟ عمروالشناوى : وجهتوا دعوة للقطاع الخاص على انتهاج نفس الأسلوب ل / عادل نجيب : آه طبعا احنا لما بنخصص أراضى لجمعية من جمعيات المستثمرين بإنشاء مساكن للعاملين فى هذه المصانع يعنى احنا جزء من عملنا إن احنا التوطين بين الناس اللى بتشتغل فى المدينة تسكن فى المدينة احنا غير راضيين إن واحد يشتغل فى العاشر من رمضان ويسافر إلى بلبيس لكن احنا بنوفر لجمعيات المستثمرين الأرض إن هم كل واحد طبقا لاحتياجاته يبنى مساكن للعمال احنا بنخصص لجميع الجمعيات التعاونية مش لجميع برضه لها فوسيز إن احنا نتأكد إنها قادرة على إنها تنفذ مشروع لأعضائها برضه مش عن طريقنا بنرجع لاتحاد الإسكان التعاونى ونقول له إدينى الجمعيات التعاونية اللى انت من وجهة نظر حضرتك قادرة ماليا ، ما عندهاش مشاكل مع الدولة،ما عندهاش مشاكل مع المواطنين أعضاءها و نضمن إن أنا لما أخصص لها الأرض ما أرجعش أسحبها منك لعدم الجدية ودى حقيقة عندنا فوق ال 200 جمعية إسكان تعاونية خصص لها أراضى فى جميع المدن بتاعتنا فى أنحاء الجمهورية عمرو الشناوى : ونجحت كلها الحمد لله؟ ل / عادل نجيب : الحمد لله يعنى احنا بنراقبهم بدقة ولن نسمح إن هم مشروع زى كده يفشل يعنى عمرو الشناوى : ولا احنا كمان هنسمح احنا مع سعادتك وإن شاء الله نشتغل كلنا لرفعة هذا الوطن سيادة اللواء مهندس عادل نجيب النائب الأول لرئيس هيئة المجتمعات العمرانية الجديدة نتمنى التوفيق لحضرتك وللهيئة فى المشاريع لخدمة المواطن فى مصر هالة أبو علم : شكرا سيادة اللواء على وجود حضرتك معانا النهاردة ومشاهدينا الكرام نلتقى معكم مرة أخرى ومشروعات قومية جديدة فى يحدث فى مصر