أخبار اليوم 14/6/2008 والله العظيم ، الحكومة هي السبب في حكاية الخلفة الكتير وعدم تنظيم الأسرة!! طبعا مش هتصدقوني، ولكن تعالوا نفكر ونحسبها !! الحكومة كل يوم تقولنا نسبة النمو والصادرات ومعدلات التبادل التجاري في زيادة، ماشاء الله.. كل يوم الحكومة تؤكد لنا ان الحياة بقي لونها مش بمبي وبس.. لكن كمان فستقي وموف.. عايزين الناس تعمل إيه؟ بالطبع الناس رحرحت وهات يا خلفه!! الحكومة بتشجع الناس علي انهم يناموا بدري.. طبعا من الهم والغم!! مصروف البيت وفلوس الدروس الخصوصية.. والأسعار اللي كل يوم عماله بتولع.. ولما الناس دماغها يوجعها من التفكير بتضطر تنام، وأنتم عارفين الباقي!! وعداد الدكتور حاتم الجبلي وزير الصحة شغال مواليد جدد كل ثانية! الحكومة بتدفع مرتبات للدعاة والوعاظ ودايما في آخر خطبة الجمعة يقولوا لنا: تناكحوا.. تناسلوا وطبعا احنا متدينين وبنسمع كلام شيوخنا.. الحكومة اوقفت التعيينات الجديدة.. ولو أن معاها حق، لكن النتيجة ان كل رب أسرة عايز يشغل أولاده بعد التخرج بدلا من الجلوس بمفردهم وهم يضعون أياديهم علي خدودهم وبالتالي هات يا خلفه عشان يجلسوا كلهم بعد التخرج يسلوا بعض في البيت وكل ما يزيد عدد الأبناء العاطلين عن العمل، أهم يونسوا بعضهم بدلا من الجلوس علي مقهي الستات بتاع دينا ريان أو قهوة المعلم محمد عمر في صفحة أربعة بملحق النهاردة أجازة..!! عموما حكومتنا والله العظيم دمها شربات وآخر عسل، ونتيجة كده إحنا أصبحنا بنكره 'النوم في العسل' وبرضه عداد الدكتور حاتم شغال.. مش ملاحق..!! ثقافتنا عن الخلفة والعيال الكتير والعزوة لازم تتغير.. فنحن الشعب الوحيد في الدنيا الذي يعشق التباهي بكثرة الأبناء.. مش إحنا اللي سمينا حسن 'حسنين' ومحمد قلنا محمدين وقريبا جدا هيبقي فيه أحمدين وخالدين ويوسفين.. بلاش حكاية يوسفين دي أنا مش قصدي أبدا الدكتور يوسف بطرس غالي لأن ده الوحيد اللي ما يتكررش..و كفاية علينا 'يوسف' واحد وبس!!
