حديث المدينة

مفيد فوزى : بالعقل وبمنتهى التعقل لابد من فهم الأمر اجتماعيا وسياسيا أيضا هل تصبح القاهرة مدينة نهارية رغم أنها واقعا عاصمة ليلية ثم هل القرار فيه قطع رزق وخراب بيوت كده ببساطة يعنى ما الحقيقة بالضبط وراء هذا القرار هل القرار بالفعل درس أم هو بعد قرار عشوائى وأناقش المسألة هل يمكن أن يكون هناك فى الشارع بعد إغلاق المحلات فراغ أمنى هل يكسو الظلام شوارع القاهرة هل حقا سيعيد هذا القرار 6 مليارات بسبب الكهرباء و3 مليارات أزمة الوقود واستهلاكه كل هذه الأمور أظن أنه من الطبيعى مناقشتها وفهم أبعادها ومعرفة المسألة لأن الناس يعنى المثل البلدى العربى القديم بيقول لك إذا أمرت أو إذا طلب منك أن تطاع فأمر بما يستطاع ثم هذا هو الأهم هل الناس فى مصر مستعدة نفسيا لقبول هذا القرار هل جيوب الناس فى مصر منتفخة بفلوس هل الأغلبية الكبيرة فى هذه البلد لا تعانى هل الوردية الثالثة للناس اللى ماعندهاش شغل اللى بتشتغل وردية ثالثة عشان ترجع لبيوتها بفلوس ولقمة هل تعدموها وعددها مليون وكسور انتوا عايزين إيه هل نشعل الغضب فى صدور الناس القرار صوت وصورة ومعكم مفيد فوزى فى حديث المدينة
مواطن : أنا معترض على القرار ده
مواطن 1: أنا مع القرار والبلاد المتقدمة كلها كده بلاد العالم كلها كده
مواطن 2 : نحاول نجرب لإن خوفنا من التجربة بيرجعنا كثير وراء
مفيد فوزى : دكتور أحمد غنيم أنت كرجل اقتصاد نحن بصدد مشكلة . مشكلة تحتاج إلى تقييم وليس على الضرورة الانحياز لجانب دون جانب حينما يتعلق الأمر بالرزق وأنت أدرى الناس بفكرة الاقتصاد فى نهاية الأمر يصب فى الجيوب يصب فى رزق الإنسان لست أريد على الإطلاق أن أصل بالأمر إلى إن أنا أقول لك هيحصل خراب بيوت حتى لو كان هذا جائز لكن أنا يهمنى أعرف تقييمك للتجربة هل هى تجربة مدروسة حقا وهل لها عائد اقتصادى حقا أنا أناقش الأمر بالعقل
د.أحمد غنيم : نبدأ الأمر حضرتك أن ما يذكر من قول فى وسائل الإعلام المختلفة فيه تهويل للمزايا وفيه تهويل للعيوب من جراء إلغاء أو قرار غلق المحال الساعة العاشرة مساءً لو بصينا لفكرة المزايا اللى هى طرحتها الحكومة كما يقال وتوفير الكهرباء ده أمر الحقيقة يعنى مشكوك فى صحته
مفيد فوزى : بمعنى
د.أحمد غنيم : إن حقيقى المحلات بتستهلك كهرباء ولكن هل غلقها هيؤدى إلى السؤال الأولانى هل غلقها سيؤدى إلى توفير الكهرباء دى نمرة 1 نمرة 2 هل المحال دى هى المستهلك الأساسى والكبير للكهرباء بحيث إن توفير هذا الجزء اللى كان فيه هيؤدى فعلا إلى خفض الضغط على الكهرباء اللى موجودة فى مصر أعتقد الحقيقة أن الإجابة بالنفى فى الفترة السابقة كانت معدلات إنتاج الكهرباء بنتكلم فى الألفينيات وطالع كانت فى حدود 7 % معدل النمو فيها كذلك معدل الاستهلاك كان بيزيد بمعدل من 4 ل 7 % المشكلة الأساسية فى حالة الكهرباء هى إن الإنتاج لا يزيد بقدر كبير بالرغم من إن هناك موارد كثيرة وأساليب كثيرة لتوليد الكهرباء وكان مخطط لها استثمارات وهذا لم يتم من العهد السابق وفى العهد الحالى لو بصيت على أيضا تهويل العيوب وهو قطع الأرزاق زى ما حضرتك ذكرت أعتقد إن برضه ده فيه تهويل من الناحية الاقتصادية لإن عادة ما يتم المحلات أحيانا عندما تشغل عمالة بتشغلها شيفتات وهذه الشيفتات بتشتغل لساعة معينة وتستكمل من بعد الظهر إلى ساعة معينة أخرى فهيحصل تقليل فى عدد الأوقات ساعة أو ساعتين آه قد يؤثر على معدلات الأجر ولكن ليس بالضخامة التى سيتفشى عنها بطالة وإلى آخره الفكرة الأساسية إن الحكومة بترى انتم بتعارضوا التنظيم لا احنا ما بنعارضش التنظيم قد يكون التنظيم جيد لكن خدوا الإجراءات اللى تخلى القرار ينجح ما حدث الآن فى رأيى الشخصى وده أمر قد يتعرض خارج الاقتصاد إن نحن نعانى فى هذه المرحلة من مش عايز أقول انعدام ولكن يعنى مفيش هيبة للدولة ونحن نرغب فى إعادة هيبة الدولة من خلال تقوية الشرطة ومن خلال القرارات المختلفة اللى حدث حينما يرجئ الوزير القرار لمدة أسبوع قبل ما يتنفذ بيوم ده فى رأيى أوحش قرار اتاخد ليه لإنه
مفيد فوزى : الإرجاء
د.أحمد غنيم : الإرجاء يعنى يا إما ألغى يا إما أخلى
مفيد فوزى : والمظاهرات
د.أحمد غنيم : ما هى دى نقطة لو أنا ما هو بسبب إنه قرار غير مدروس ما خادش فى حسبانه إن قوى المجتمع المختلفة واتحاد الغرف التجارية وأخدت القرار طب انت عاوز تبين هيبة الدولة يا إما تمسك قرارك يا إما تحت الضغط الشعبى لغيت القرار لكن أرجأت القرار ده بيدل على حالة الارتباك اللى موجودة
مفيد فوزى : أو الدولة الرخوة
د.أحمد غنيم : بالضبط
مفيد فوزى : أصبحت المشكلة الحالية الآن هى كيف يفك ضفائر مشكلة إغلاق المحلات التى لها صلة مباشرة بالطبقة الوسطى رزقا وأدخل إلى الحوار هل أوضحت للناس ما كنا نتكلم فيه وإن كنت لم أستأذنك فيه
د.دياب محمد دياب : لا هو حضرتك على طريقتك الجذابة دائما بتدخل فى الموضوعات بطريقة جميلة وأنا أحييك على هذه الطريقة قرار غلق المحلات فهذا قرار ينم عن أن متخذى هذا القرار هم من قليلى الحيلة وقليلى الحيلة الذى ليست لديهم استراتيجية أو تخيل واضح حيال ما يمر به المواطن المصرى من أزمات تارة يتحدثون عن التقشف وقد رددت عليه فى مسألة التقشف أنها مسألة يجب ألا تذكر لأن ما يعيشه الشعب المصرى أدنى من مستويات التقشف ويستحسن أن نتحدث عن الترشيد وإذا تحدثنا عن الترشيد فللموضوع جانبان جانب اقتصادى وجانب اجتماعى أو سيكولوجى الجانب السيكولوجى أن الترشيد الذين يتحدثون عنه
مفيد فوزى : فى الكهرباء
د.دياب محمد دياب : فى الكهربا وخلافه
مفيد فوزى : والوقود
د.دياب محمد دياب : الترشيد سلوك والسلوك يلزم
مفيد فوزى : وليس قرار فرد
د.دياب محمد دياب : لا يلزمه تربية ويلزمه تعود ويلزمه تدريب وهذا ما لم نعتاد عليه كمصريين عموما فى سيكولوجيتنا ولا فى أدبياتنا فعشان نحل مشكلة وتقول لى ترشيد وتعمل لى ريسيوناليزيشان ( resilization )عليها النهاردة وأنا لم أعتاد هذه الأدبيات حتى فى تربيتى فى بيتى كشخص كل شئ كان الحمد لله فى حدود الوفرة وفى حدود الوسط وبعدين الترشيد من البداية يتطلب منك بدايةً أن تعمل فى الأوراق تشوف بنود المصروفات بتاع الموازنة العامة هل بنود المصروفات دى مضبوطة والتقديرات العينية دى مضبوطة وللا مش مضبوطة ثم تحاول تشوف الترشيد دهوة بما لا يضر على تحقيق هدف بند الإنفاق يعنى ما أرشدش وأقطع بند الإنفاق وتقول لى ترشيد وإلا مش هتلاقى بعد كده الخدمة اللى انت عايزها
مفيد فوزى : هذا القرار له عائد اقتصادى رقمى فى نظرك وأنت معنى بالأرقام
د.دياب محمد دياب : حضرتك القرار ده نرجع له فى بعدين البعد الاجتماعى الأول إن هو هيحمل الناس أعباء إضافية كان وجودهم فى العمل فى الفترة دية بيقلل من هذه الأعباء
مفيد فوزى : دكتور دياب حضرتك طبعا عشت التجربة دى فى زمن الرئيس السادات
د.دياب محمد دياب : آه
مفيد فوزى : لماذا تراجعوا عنها
د.دياب محمد دياب : لا زمن الرئيس السادات أصل هو الرئيس السادات
مفيد فوزى : يعنى طبقت
د.دياب محمد دياب : من ضمن العوامل يعنى من ضمن الأساسيات التى تراجعت إن معدلات المواليد زادت
مفيد فوزى : فى هذه الفترة
د.دياب محمد دياب : آه فى هذه الآونة زادت معدلات المواليد كما إن معدلات الضرائب انخفضت معدلات التحصيل الضريبى انخفضت وأثرت تأثير سلبى على الحصيلة الضريبية
مفيد فوزى : ده سر إلغاءها فى ذلك الوقت
د.دياب محمد دياب : آه طبعا
مفيد فوزى : هل درس هذا الكلام كتاريخ هل نحن نعنى بفهم يعنى إذا سمحت لى مغزى التاريخ فى الأحداث
د.دياب محمد دياب : ما هو المفروض إن أى واحد بياخد قرار بيبقى بيرجع للمصادر التاريخية أو للمعلومات التاريخية
مفيد فوزى : بلاش المصادر للتجارب السابقة
د.دياب محمد دياب : وللتجارب السابقة
مفيد فوزى : مش دى تجربة سابقة
د.دياب محمد دياب : آه ، بص حضرتك أى حاجة تحد من الحافز الفردى حيال تحقيق أرباح تأكد إنها مش هتنجح
مفيد فوزى : من فضلك تعيدها ثانى
د.دياب محمد دياب : أى حاجة أى قرار هيحد من الحافز الفردى لتحقيق أرباح مش ممكن يتم بدليل احنا بقى لنا كام سنة بنكافح المخدرات
مفيد فوزى : سنين وسنين
د.دياب محمد دياب : طيب هل انتهت
مفيد فوزى : موجودة لا تزال
د.دياب محمد دياب : والشرطة بتلعب مع التجار لعبة القط والفار ليه لأن فيه ربح طيب القرارات اللى طلعت بعدم البناء على الأراضى الزراعية هل منعت
مفيد فوزى : إطلاقا
د.دياب محمد دياب : طيب ليه لإن الحافز الفردى موجود فى تحقيق الربح فإذا ما كان الحافز الفردى موجود فى تحقيق الربح دى مسألة طبيعية يعنى natural case كده حاجة كده طبيعية دى أمور كده طبيعية زى بنقوم من النوم بنشوف حاجتنا وبنعمل ... طبيعى كل ده فاهمنى فأنا بقول إن أى قرار بيؤثر سلبا على الحافز الفردى لتحقيق الأرباح
مفيد فوزى : دخل حتى
د.دياب محمد دياب : تحقيق أرباح أو تحقيق دخل تأكد إنه قرار فاشل 100 % دى ثابتة من الثوابت
مفيد فوزى : طب إيه عائده كما تراه الدولة
د.دياب محمد دياب : العائد أصل هم نظروا إلى الموضوع زى ما بنقول احنا الفلاحين من الشواشى
مفيد فوزى : من الشواشى ؟
د.دياب محمد دياب : آه يعنى بص كده من آخر الشجرة من فوق لكن ما بصش من داخل الشجرة
مفيد فوزى :
د.دياب محمد دياب :
مفيد فوزى : آه بص للشواشى
د.دياب محمد دياب : بالضبط فبنقول الشواشى باصص للشواشى يعنى إيه أنا لما أطفى المحلات بدرى الكهرباء هتتوفر مين قال لكد ده احنا بنبقى 20 ، 30 واحد قاعدين على قهوة متآدة لنا 5 لنض وقاعدين للساعة واحدة اثنين لما بنروح بيتنا كل واحد بيئيد لمبة لوحده وبيولع التليفزيون عشان يتفرج لوحده وبيقوم يعمل قهوة مش عارف إيه لوحده معدل الاستهلاك هيزيد
مفيد فوزى : واحد يا فندم بيقول لى هو حضرتك هتعمل برنامج عن إغلاق المحلات قلت له آه قال طب إيه رأيك يا فندم إن أنا هغلق المحل بس ده محلى بقى قلت آه طب وماله
د.دياب محمد دياب : هيسيب النور والع
مفيد فوزى : قال لى هسيب النور والع
د.دياب محمد دياب : أيوة ما هى القصة دية
مفيد فوزى : وكإنه بيتحدى يعنى فيه عنصر
د.دياب محمد دياب : مفيد بك
مفيد فوزى : نعم
د.دياب محمد دياب : ليس هذا هو الحل أنا مازلت مصر هذا الحل هو حيلة من ليس له حلول
مفيد فوزى : حيلة من ليس له حلول
د.دياب محمد دياب : حيلة من ليس له حلول
تقرير
مسئول :المبدأ مقبول من الجهتين إنما فيه خلاف على ميعاد الغلق
مسئول آخر :أنا عندى كمية من الكهرباء لابد إن أنا أوزعها بعدالة ما ينفعش إنى أسيبك انت منور لحد الصبح والثانى ما عندوش قرية من القرى ما عندوش كهرباء
مواطن :أنا سمعت إن هى هتوفر كهرباء ككهرباء كده مفيدة لكن فيه ناس كثيرة قوى شغالة شيفتات بالليل الناس دى هتعمل إيه
مفيد فوزى : من المهم جدا استطلاع رأى الغرفة التجارية المصرية ليه لإنها بتضم شعب والشعب دى بتمثل التجار يعنى أقدر أقول إن برلمان التجار فى مصر هو الغرفة التجارية المصرية معايا الأستاذ أحمد عبد الواحد وهو يمثل غرفة تجارة المواد الغذائية أستاذ أحمد إيه الضرر العائد على الناس الذين هم فى المطاعم والكافيهات خصوصا إنهم هيقعدوا لحد الساعة واحدة كما ينص القرار
أ.أحمد عبد الواحد :الحقيقة هو الضرر كان هيكون أكبر لو كان أقل من كده يعنى لو كان 11 أو 12 أو واحدة كان هيبقى الضرر كبير واحنا فى الوقت الحالى احنا بنحاول
مفيد فوزى : عددكم أد إيه تقريبا
أ.أحمد عبد الواحد : القاهرة ولوحدها أكثر من 2 مليون
مفيد فوزى : 2 مليون
أ.أحمد عبد الواحد : آه
مفيد فوزى : يعملون فى هذا القطاع
أ.أحمد عبد الواحد : آه طبعا انت بتتكلم القاهرة لوحدها رقم
مفيد فوزى : طبعا
أ.أحمد عبد الواحد : وفى نفس الوقت يعنى حضرتك الحمد لله رب العالمين احنا تجاوزنا هذه المرحلة وبدأنا نعدل من القرار نخليه لاثنين لإن احنا فى الوقت الحالى احنا فى حمل مصادمة مع الشرطة احنا بنعانى من ركود
مفيد فوزى : ليه يا أستاذ أحمد عندكم تصور أنه من الممكن أن تحدث مصادمة مع الشرطة
أ.أحمد عبد الواحد :ممكن وممكن تحصل كارثة انت عندك بطالة وعندك ركود وعندك عمالة زائدة والقاهرة مش محتاجة كفاية العشوائيات وكفاية البلطجة وكفاية الانفلات الأمنى
مفيد فوزى : هل القاهرة بالتحديد بس وللا باقى المحافظات
أ.أحمد عبد الواحد : القاهرة والجيزة والإسكندرية
مفيد فوزى : القاهرة والجيزة والإسكندرية
أ.أحمد عبد الواحد :ممثلين ربع سكان مصر احنا كنا بنتكلم داخلين على كارثة هتحصل
مفيد فوزى : طيب انت دلوقتى المحال العامة هتقفل الساعة 12 كما قيل فى القرار وأنا معرفش إيه تفصيله يعنى وهل هيبقى فيه مثلا غرامات وللا لا بعد الساعة 12 للساعة واحدة المطاعم والأماكن السياحية
أ.أحمد عبد الواحد :أستاذ مفيد
مفيد فوزى : نعم
أ.أحمد عبد الواحد :حكاية الساعة 12 فى الشتاء معقولة جدا لكن 10 ما كانتش منطقية احنا بلد معروفة إن القاهرة اسمها القاهرة الساهرة
مفيد فوزى : لا واسمها عاصمة ليلية
أ.أحمد عبد الواحد :وعاصمة ليلية والمجتمع القاهرى بحد ذاته بيحب السهر وبعدين سيادتك كفاية السياحة الأجنبية عندنا
مفيد فوزى : والسياح
أ.أحمد عبد الواحد :السياحة الأجنبية عندنا مضروبة
مفيد فوزى : هل حضرتك قلت رأيك فى الغرفة التجارية أنك ضد القرار
أ.أحمد عبد الواحد : احنا الحقيقة رفضنا القرار فى الأول
مفيد فوزى : رفضت القرار فى الأول لما كان الساعة 10
أ.أحمد عبد الواحد : وبعدين قلنا نعمل حوار مجتمعى مع كافة أطياف الشعب
مفيد فوزى : دى كانت فكرة مطروحة
أ.أحمد عبد الواحد :فكرة داخل الغرفة التجارية وعرضناها على السيد محافظ القاهرة
مفيد فوزى : هل رئيس الغرفة التجارية المهندس إبراهيم العربى هل هو قابل إن يتعمل حوار مجتمعى
أ.أحمد عبد الواحد :متحمس
مفيد فوزى : متحمس
أ.أحمد عبد الواحد :طبعا متحمس كثير
مفيد فوزى : انتوا عرضتوه على المحافظ
أ.أحمد عبد الواحد :انت عارف حضرتك الموضوع ده من 2002
مفيد فوزى : التفكير فيه
أ.أحمد عبد الواحد :التفكير فيه والحقيقة النظام السابق بحكم اللى كان بيحصل بجبروته بأشكاله كانوا بيرجعوا فى القرار يقول لك الشعب مش حمل ننفذ فيه حاجة زى كده كان فيه حنكة سياسية فى الوقت ده
مفيد فوزى : فما أدرى الآن
أ.أحمد عبد الواحد :أدرى الآن الحمد لله الحمد لله إن احنا تجاوزنا هذه المرحلة وخليناها ل 12 بل التجار تجاوبوا إن هيخفضوا الأنوار مش عايز أقول لك ممكن من 10 وممكن من 9 يخفضوا الإضاءة هيبقى فيه تعاون هيبقى فيه حوار مجتمعى لكن مش مرة واحدة هقول لواحد إقفل محلك مش ممكن
مفيد فوزى : طيب سؤالى الآخر إيه الإيجابيات لإغلاق المحال
أ.أحمد عبد الواحد :والله الإيجابيات إن الحكومة بتفكر إن توفير الكهرباء
مفيد فوزى : يعنى عاوز أقول كيف يرى أولوا الأمر القرار هل هو توفير كهرباء
أ.أحمد عبد الواحد : هو توفير كهربا ومساعدة شركات النظافة على تنظيف القاهرة نحاول ندى منظر حضارى لبلدنا كلنا بنحلم إن تكون بلدنا كويسة لكن مش القاهرة فى الوقت الحالى مرة واحدة هنقفل فيها المحلات مش هتكون منطقية أبدا لإن القاهرة حتى السياحة العربية معروفة إن هى القاهرة الساهرة ممكن لو كل واحد سهران خدنا منه 5 جنيه 10 جنيه
مفيد فوزى : فهمنى ماذا ده سؤالى الأخير بيقال إن الضرايب هيحدث فيها
أ.أحمد عبد الواحد :عجز
مفيد فوزى : عجز
أ.أحمد عبد الواحد : نعم
مفيد فوزى : ليه فى سطر واحد
أ.أحمد عبد الواحد : سطر واحد ضريبة المبيعات ضريبة شهرية
مفيد فوزى : تمام
أ.أحمد عبد الواحد :غير الضرائب العامة
مفيد فوزى : تمام
أ.أحمد عبد الواحد :فضريبة شهرية أنا النهاردة بقفل الساعة 10 هتطلب منى ضرايب مش هورد لك والوردية الثانية عندى مش هتشتغل يبقى انت عملت ركود اقتصادى عملت بطالة فى العمالة أنا مش هدفع لك ضرايب هدفع لك ضرايب ليه ما أنا مش هعرف أشتغل لكن ادينى وقت ادينى مساحة أشتغل فيها هدفع ضرايب وخصوصا إنى هورد ضرايب شهرية يعنى فيه فواتير هتطلع عندى حجم المبيعات زاد هدفع لك ضرايب ما عنديش حجم مبيعات ما تطلبش منى حاجة أنا بقول لك زود شرايح ضرايب اعمل لى كروت ذكية افتح المجال البلد فيها ركود شجعنى إن أنا أشتغل شجعنى إن أنا أصدر
مفيد فوزى : يبدو أن العلوم الإنسانية غائبة تماما فى القرار سواء فى وحدة محلية فى أى قرية مصرية أو سواء على مائدة رئيس الجمهورية العلوم الأساسية الإنسانية ضرورة بل بعد شديد الأهمية من الطريف إن أنا عرفت معلومة ربما بالنسبة لى غريبة ولعلها أول مرة بعرفها أن الذى كتب خطاب أوباما السياسى رجل اجتماع ده يبرر أن القرار أى قرار لابد أن يكون عنصر الناس فيه يمثلوا الجانب الأكبر تعالوا فى قرار زى قرار غلق المحلات الساعة 10 وللا 12 وللا واحدة أيا كان هل درس هذا القرار باعتبار الناس أنا أتحدث الآن إلى رجل تخصصه نادر فى علم الاجتماع اسمه تنظيم مجتمع دكتور رشاد عبد اللطيف هل قرار غلق المحلات فهم منه أو استشف منه أو حد قام بتصوير أشعة إن صحت العبارة لنفسية الناس
د.رشاد عبد اللطيف : لم يحدث
مفيد فوزى : لم يحدث
د.رشاد عبد اللطيف : لم يحدث وبقدر ما كنت سعيد بالقرار اللى بيعيد الأسرة المصرية ترابطها إن كون المحلات تقفل بدرى يعنى الوالد هيقعد مع أولاده هيطبطب عليهم بقدر ما فجعت
مفيد فوزى : طب فهمنى بقى الجانب الإيجابى اللى حضرتك قلته ده عشان أنا عايز أقف عنده مسألة إعادة الجو الأسرى هل حقا هذا القرار يعيد الجو الأسرى
د.رشاد عبد اللطيف : لو درس اجتماعيا هيعيد
مفيد فوزى : ازاى قل لى ازاى
د.رشاد عبد اللطيف : يقعدوا الأول التجربة دى اتعملت قبل كده مرة واثنين وفشلت
مفيد فوزى : فشلت ليه
د.رشاد عبد اللطيف : فشلت بعد اجتماعى الناس السلوك البشرى نفسه لا يتقبل شئ مفروض عليه واحنا كمصريين لم نتعود إن احنا نرجع لأولادنا بدرى ونقعد نحتضنهم رغم إن دى صفة أساسية لكن الأزمات الاقتصادية اللى مرينا بها والفقر اللى احنا مرينا به والسعى وراء لقمة العيش خلت كثير من الناس يجدوا إن الروح بتعين ورجوعهم للبيت هيقولوا انت عملت إيه أكلتنا ، شربتنا إيه اللى انت هتجيبه لنا فكان يشعر بعيب أن يرجع إلى أسرته كيف نحول هذا العيب إلى ميزة كما يحدث فى دول الغرب أنا لفيت كل دول العالم لم أجد أشقى من الشعب المصرى ولم أجد حنان أكثر مما هو موجود فى الشعب المصرى ولكنه حنان بعيد المسافات ليه بعيد المسافات حنان مرتبط إن أنا حنيتى لك إن أنا أعيشك كويس لا حنيتى لك مش أعيشك كويس حنيتى لك إنك انت تعيش محترم وتعرف مين اللى يسمع الحديث بتاعك بدل ما ابنى يروح لواحد يدفعه مشاكل الانحراف اللى موجودة دى سببها إيه إنه لا سمع أبوه ولا سمع أمه ده مشغول بشغله والثانى مشغول بشغله وبالتالى تلقفته الأيادى أى أيادى غير إيجابية وحولته إلى مدمن وإلى متحرش وإلى قاتل وإلى بلطجى وإلى انفلاتى كل هذه مشاعر لم تكن فى الشعب المصرى
مفيد فوزى : هل القرار قد يعيد الناس إلى البيوت
د.رشاد عبد اللطيف : إذا أحسن استخدامه وإذا نظرت للبعد الاجتماعى مرة ثانية أنا أحذر والله والله أحذر بقولها لأولى الأمر فى المجتمع حين يشعر المجتمع أن أولى الأمر يحترموه ويقدروه فيطيع وحين يشعر أنهم لا يحترموه يتعمد الإيذاء ويتعمد ارتكاب السلوك الخاطئ حتى لو كان ضد مصلحته
مفيد فوزى : انت تريد أن تعيد أساسا للبيت المصرى احترام الأب
د.رشاد عبد اللطيف : احترامه أنا عندى جيش من طلبة الخدمة الاجتماعية جيش وبتشتغل فى جميع أنحاء الجمهورية 4 كليات فيهم ما لا يقل عن 250 ألف طالب يا جماعة أقول لهم تعالوا املئوا استمارة صغيرة قولوا للشعب انتوا عاوزين إيه صدقنى
مفيد فوزى : يعنى ينزلوا يستفتوا الناس
د.رشاد عبد اللطيف : بس ويطلعوا
مفيد فوزى : باستمارات
د.رشاد عبد اللطيف : آه
مفيد فوزى : بيسموها استبيان
د.رشاد عبد اللطيف : استبيان وقبل ما يصدروا القرار أنا بديهم دلوقتى ثروة بشرية موجودة عندنا ونقدر نستغلها تعالوا هييجوا يدوهم القرار يوم ما يقولوا القرار يقولوا ده 80 % من الشعب قالوا نقفل الساعة 10 90 % من الشعب قالوا نقفل الساعة 12 يبقى نستفتى الناس يبقى نعمل وبعدين ما ناخدش العملية قطع ناخدها بالتدريج ابدأ بالممكن تصل للمستحيل
مفيد فوزى : ده علوم إنسانية
د.رشاد عبد اللطيف : إنسانية
مفيد فوزى : علم المجتمع
د.رشاد عبد اللطيف : آه ابدأ بالممكن توصل للمستحيل
مفيد فوزى : إيه الممكن ده
د.رشاد عبد اللطيف : هنقول للشعب هنبدأ السنة دى الساعة 12 خدنا على الساعة 12 خلاص ننزل السنة اللى بعديها تبقى الساعة 11 ننزل بعديها تبقى الساعة 10 يشعر المواطن إن أنا ما قطعتش عيشه مرة واحدة لإن انت عارف سيادتك أنا بقول قبل ما نقول احنا فى أزمة اقتصادية لكن ما أعالجش أزمة اقتصادية بأزمة اجتماعية دون أن أدرس أسباب الأزمة الاجتماعية أتعرف على الأزمة الاجتماعية طب أنا روحت من بدرى أنا هقول لك حاجة على فكرة وأنا عارفك بتحب الحاجات الجريئة نسبة النسل لما جاءت أيام الحروب زمان لما كانت الناس ترجع بدرى البيت بتزيد نسبة النسل هتزيد الحاجة الثانية نسبة التفاعل الأسرى مش هتزيد لا هيبدأ الناس تنكش بعضيها ليه لإنها لم تمهد لهذا القرارأنا ما طلعتش برنامج أطلع برنامج تمثيلية زى التمثيلية بتاعت كريمة كريمة دى لما بتحكى عن حاجات ظريفة وجميلة أطلع الناس سيناريو جميل بسيط يحكى للناس الواحد لما يرجع بيته بدرى يحصل إيه بدل ما بنعمل سيادتك الحاجات اللى بتفسد الأخلاق أدى حاجات تدعم العلاقات الأسرية يبقى آدى البحث ماشى تمثيليات ماشية قائد أو أولى الأمر فى المنطقة يقعد يجتمع مع القيادات النظيفة القيادات اللى بتخاف على البلد مش كل واحد قائد يا جماعة مش معناها إنه أخد قرار سليم
مفيد فوزى : دكتور رشاد هو كل محافظة فى البلد إيذاء هذا القرار لها خصوصيتها يعنى أكيد محافظات القناة مختلفة
د.رشاد عبد اللطيف : مختلفة جدا أنا كنت فى بورسعيد نايمين من المغرب عادى جدا لكن لو كان فيه سوق حرة هيقعدوا مستمرين خلاص سوهاج أنا من سوهاج الساعة 10 دى محلات نادرة اللى محلات بيسموها لوكال حاجات محلية كده عشان تخدم اللى عايز حاجة بسيطة كده بتاع شوف خصوصية كل محافظة
مفيد فوزى : نمرة واحد ، نمرة اثنين التدريب
د.رشاد عبد اللطيف : التدريب يعنى أنا ما أقولش 10 أخض الناس لا أقول يا جماعة إيه رأيكم أنا عاوز من القاهرة 100 نفر من اللى شغالين فى الحاجات الصغيرة قوى هييجى يقول لى كلام ساذج قوى بس أحترمه انت عارف اللى ييجى يقول لى احنا عملنا كذا أى كلام استشف من كلامه حتة صغيرة تفيدنى فى اتخاذ القرار بتاعى يعنى شرط أساسى للنجاح فى العمل الاجتماعى لا تستهين بأى شخص أيا كان وضعه وأيا كان ديانته وأيا كان سلالته حتى ...
مفيد فوزى : هل هناك قرار داخل الغرفة التجارية كان محل للمناقشة
مصطفى حامد : لا بداية أؤكد أنه ليس هناك قرار وحتى الآن لم يكن هناك قرار ما أثير هو كلام صحف كلام جرائد
مفيد فوزى :يعنى أنا لما أسألك أقول لك عدد الناس داخل الغرفة التجارية اللى قالوا نعم للقرار أو لا للقرار ما عندكش معلومة
مصطفى حامد : لا فيه معلومة بعد ما صدر الكلام ده وأعلن عنه فى الصحف فى صور خبر أو غيره بدأنا على طول إن احنا نشتغل عليه لإن ده أصلا ما كانش وليد اللحظة
مفيد فوزى :تعتقد إن هذه القرار فعلا سيوفر الكهرباء
مصطفى حامد : لا ما افتكرش وحتى لو كان هناك تفكير توفير ما فمردود القرار أسوأ من الإيجابية إذا كانت هناك إيجابية مثلا يعنى
مفيد فوزى :أنا محترم شجاعتك الأدبية سؤال آخر هل تعتقد إن الشعب اللى هى 63 شعبة كلها يمكن أن توافق على ما هو مثار كقرار
مصطفى حامد : لا الإجابة بالنفى
مفيد فوزى :جميل ، سؤال آخر هل تعتقد إن ده موسم قطع الأرزاق
مصطفى حامد : لا
مفيد فوزى :مفيش قطع أرزاق
مصطفى حامد : لا بس فيه حاجة هذا القرار يؤثر اقتصاديا
مفيد فوزى : هل هذا القرار مؤثر اقتصاديا
مصطفى حامد : آه طبعا مؤثر اقتصاديا عشان نتكلم صح أن ما نمى إلى علمنا أن هناك توصية من مجلس الوزراء حوالين قرار لغلق المحلات على البادرة وبسرعة قام السيد المهندس إبراهيم العربى رئيس الغرفة بعرض رؤية غرفة القاهرة فيما يتعلق بقرار الغلق
مفيد فوزى :هذا القرار تبعاته أو توابعه الأمنية إيه فى الشارع المصرى لابد إن أنا أسأل واحد من الخبراء المختصين بشدة هو اللواء سيف اليزل هل هناك فراغ أمنى سيحدث لو طبق قرار غلق المحلات
اللواء / سامح سيف اليزل :أعتقد أن هناك مشكلة أمنية ستحدث تحديدا عشان نبقى واضحين هو فيه حسب المعلومات اللى جاءت لى من جهات رسمية أن العاملين فى الوردية المسائية اللى هى بتشتغل فى هذه الفترة اللى هى سيتم إغلاق المحلات فيها
مفيد فوزى :اللى هى الوردية الثالثة
ل.سامح سيف اليزل : الوردية الثالثة حوالى 1.8 مليون مصرى على مستوى الجمهورية ده رقم جاء لى من جهات رسمية فاحنا بنتكلم الناس دى بتشتغل نتيجة إنها محتاج إيراد جديد محتاجة عائد جديد يستطيع إن هو يعيش به والغلاء اللى احنا شايفينه والحياة الصعبة اللى بقت موجودة حاليا عندهم التزامات أسر علاج أطفال مدارس إلى آخره فأنا الحقيقة وأنا ماشى فى الشارع لقيت ناس بتوقفنى من أصحاب المحلات والعمال دول كثير قوى الحقيقة استوقفتنى كثير جدا هم شايفين إن أنا ممكن أسمع وجهة نظرهم وأتكلم فى الإعلام وأوجه وجهة النظر دى إلى المسئولين الرسميين فقالوا لى أمنيا احنا ناس بننتظر إيراد فى حدود من 50 ل 80 جنيه فى اليوم فى هذه الوردية وأنا مرتب حالى وحياتى على هذا الأساس لما انت تاخد منى المبلغ ده ال50 جنيه شوف لى مورد ثانى أجيب فيه عمل مش هيبقى فيه عمل كلنا بنفكر ننزل نسرق طاستين عربيات ده هياخد منى 10 دقايق بدل ما أشتغل 6 ، 7 ساعات وأنا واقف وهلكان أنا هنزل أشتغل ربع ساعة آخد نجمتين بتوع عربيتين مرسيدس النجمة بتتباع ب 80 جنيه فى الحرفيين هم بيبيعوها ب 150 جنيه هو بيديها للتاجر ب 80 التاجر بيبيعها ب 150 جنيه أنا هعمل كدهه هطلع 300 جنيه فانتوا بتجبرونا إن احنا نذهب إلى هذا الاتجاه
مفيد فوزى : هل ستحدث مصادمات مع الشرطة غلق ما غلق محضر ما محضر
ل.سامح سيف اليزل :أعتقد إن احنا هنرى الكثير من القلق أنا تصورى هذا يعنى هذا الموضوع فيه معارضة شديدة من فئة كبيرة من الشعب والحقيقة برضه خلينى أقول لك برضه على وجهة نظر بعض أصحاب المحلات اللى قابلونى وكلمونى فيه مولات بيستوقفونى قالوا لى وفى محلات فى الشوارع قالوا لى احنا ناس بندفع ضرايب بندفع الحى بييجى يفتش علينا الصحة بتيجى تفتش علينا وكل جهات الدولة بتيجى تفتش علينا بندفع ضرائب مبيعات وضرائب أرباح ضريبية وضرائب إيراد عام ومنتظمين بنقفل الساعة 8 أدامى على طول ده محل ملابس اللى كان بيكلمنى بيقول لى بص أدامى كده فيه إيه 10 ، 12 بائع من اللى فارشين حاطين قمصان وكرفتات وبدل وبنطلونات دول هيبيعوا ودول هيقفوا اللى واقف بره ده ما بيدفعش ضرائب ولا عنده عمالة
مفيد فوزى :ولا غش تجارى
ل.سامح سيف اليزل : ده بالتأكيد وبعدين ده لو لقيته النهاردة مش هتلاقيه بكرة ممكن يسيبك ويمشى إنما الثانى ده محل موجود ممكن تروح له ثانى لو اداك حاجة مش مضبوطة أصحاب المحلات بيقولوا لى احنا بندفع كل ما علينا انتوا بتشجعوا دول يبيعوا أكثر
مفيد فوزى : إيه الهدف بتاعها ده آخر سؤال
ل.سامح سيف اليزل :توفير السولار وتوفير طاقة الكهرباء ولكن زى ما قلت لحضرتك أنا اديتك مثال ممكن أدى لك 10 أمثلة على فكرة و10 حلول لو عايز دون هذه الطريقة دون أن أوذى أحد وبرضه هجيب فلوس وهيخش الدولة فلوس ولا أحمل الدولة دعم للوقود أو إلى آخره لكن المسألة عايزة شوية حكمة تريث تفكير سؤال الخبراء من كافة الاتجاهات ونوصل للآخر إلى حل نرضى الكل لكن أنا أتصور أن هناك غضبة شديدة فى الشارع المصرى بكل أسف من هذا القرار
مفيد فوزى :ويبقى أن أقول عبارة فى نهاية هذا الحوار الطويل البشر ليس حجر