اختراق

الاربعاء 5/1/2011
عمروالليثي:بسم الله الرحمن الرحيم .. مساء الخير .. وأهلا بيكم في حلقة جديدة من اختراق بمناسبة حلول العام الجديد .. اسمحولنا في هذه الحلقة أن نقدم لكم استعراض لحصاد برنامج اختراق خلال عام 2010 ...
لقاطات أرشيفية لبعض الحواد ث الإرهابية
في شهر أبريل عام 93 محاولة فاشلة لصفوت الشريف وزير الإعلام .. أغسطس عام 93 محاولة فاشلة لحسن الألفي وزيرالداخلية في شارع ريحان وتسببوا في استشهاد ثلاثة من المواطنين الأبرياء .. نوفمبر عام 93 محاولة اغتيال فاشلة للدكتورعاطف صدقي رئيس الوزراء الأسبق أصيب فيها نحو 21 مواطناً وقتلوا الطفلة شيماء ودمروا 12 سيارة عندما كان رئيس الوزراء في طريقه للمجلس وهوجمت سيارته.
موسيقى حزينة وعرض لمشهد لجنازة إحدى ضحايا غدرالإرهاب
منتصرالزيات محامي الجماعات الإسلامية:فيما يتعلق بالسيد صفوت الشريف .. رئيس الوزراء الأسبق الدكتور عاطف صدقي ووزير الداخلية الأسبق حسن الألفي حاول هذه محاولاتهم عناصر تابعة للدكتور أيمن الظواهري مدفوعة من خارج البلاد في ذلك الوقت.
عمروالليثي: ماذا تفسر قيام العمليات التي قامت بها جماعة الجهاد بقتل العديد من الأبرياء من الأطفال والنساء دون ذنب ..؟
منتصرالزيات محامي الجماعات الإسلامية :لا تعليق
موسيقى حزينة وعرض مشاهد التخريب وسفك الدماء
تقرير
في يونيو من عام 1992 تم اعتيال الكاتب الصحفي فرج فودة أثناء خروجه من مكتبه ..
في أكتوبر 94 محاولة فاشلة لاغتيال الكاتب الكبير نجيب محفوظ الحائزعلى جائزة نوبل للآداب عام 88 أمام منزله عندما حاول الإرهابيون طعنه بميديا.
فاصل موسيقى
عمرو الليثي : الكاتب الكبير الأستاذ مكرم محمد أحمد عايزك تحكي لي تجربتك مع الإرهاب وقصة الحادث الذي تعرضت لها..
أ/مكرم محمد أحمد – نقيب الصحفيين :يعني ده أشياء مضى عليها سنوات طويلة أعتقد ده كانت في 87 وأنا أذكر أنا كنت هنا في دار الهلال وأعتقد ده كان يوم تلات كنت أتميت طبع المصور وعادة كنت أقابل صديق لي كمال خورشيد قعد يعمل منتدى أدبي بنلتقي كنا في هذه الفترة عند كمال خورشيد في مكتبه في باب اللوق .. فأنا خدت الطريق من جنب الداخلية كده هون نزولا إلى باب اللوق .. وبالظبط قبل ما أخش الميدان يمكن قدام محل الكباب أو محل بيع السيارات على مدخل ميدان باب اللون من التحرير فوجئت بحد مديني كلكسات قوية فأنا تصورت إن المشكلة أديله طريق .. فاديته الطريق بعد ما اطلع بابص اتلفت لقيت كده ضرب رصاص مخيف جداً جداً وزجاج السيارة بيقع وهو عمال بيضرب بشكل فظيع جداً وبعدين رش على الرصيف اليمين رشت برضه من المدفع علشان خاطر برضه يخوف الناس.
منتصرالزيات :محاولة اغتيال الأستاذ مكرم محمد أحمد ده كانت سنة 87 وقام بها بعض الشبان من تنظيم أطلق عليه إعلاميا في الوقت دا "الناجون من النار" وهم يُصنفون فكرياً "التوقف والتبين" قالوا إنهم سعوا إلى محاولة اغتيال مكرم محمد أحمد لهجومه الشديد على الجماعات الإسلامية في ذلك الوقت.
اللواء فؤاد علام/ وكيل مباحث أمن الدولة سابقاً : هو فكر هذه الجماعات زي ما قلت لحضرتك بيدور حول محورأن المجتمعات القائمة مجتمعات كافرة وأن حُكام هذه الدول في هذه المجتمعات حكام من الكفرة .. وبالتالي بالفرض أنه كافر فمن وجهة نظرهم أنه يحل دمه وماله وأمورأخرى حسب وجهة نظرهم .. من هنا بيصدروا أو قياداتهم بيصدروا فتاوي بإن مثل هذه الجرائم ممكن ارتكابها بدعوى أنهم من الكفار الذي يجب محاربتهم.
تقرير
في عام 97 حادث الأقصر بهدف ضرب السياحة والاقتصاد المصري وراح ضحيته 65 سائحاً أجنبياً ومواطنين.
د/ وحيد عبد المجيد مساعد مدير مركز الأهرام الاستراتيجي : استهداف السياحة كان بيقصد بيه توصيل رسالة إلى العالم إنه هذا البلد غير آمن وإنه الوضع السياسي فيه لا يمكن أن يكون مستقراً وإنه بالتالي الإساءة إلى العلاقة بين مصر وبين دول أخرى .. بالفعل كانت هناك دول أوروبية والولايات المتحدة نفسها كانت بتنظر إلى هذا الوضع في مصر كما لو كان صراع سياسي عادي بين حكومة وجماعات تختلف معها.
اللواء / فؤاد علام: في وقت من الأوقات كانوا بينظروا إلى الأجانب اللي بيجوا إلى الدول الإسلامية أنهم يدنسونها وبالتالى لابد من محاربتهم إلى أن من الممكن أو يكونوا بيستهدفوا ضرب الاقتصاد المصري بالذات في أحد عناصره المهمة وهي السياحة.
عمرو الليثي : ماهي الخسائر التي تكبدتها مصر جراء الحوادث الإرهابية ..؟
أ/مكرم محمد أحمد: تكبدنا تعطيل خطط التنمية سنوات كثيرة فكانت مصر دائماً تكون على وشك أن تنطلق ثم تأتي الضربة وهما كانوا مدركين جداً أنه أن يضربوا .. يعني كان بيضرب بقصد إحباط هذا البلد عن أن يحقق كل ما تنتعش.
عمروالليثي : يعني هو كان يقصد السياحة تحديداً.
أ/مكرم محمد أحمد: أكيد .. أكيد كان يقصد السياحة .. دا طلع تكتيك في السياحة واعتبرها ... وده كله بيتحقق .. تقدم ويحس بالفعل إن البلد على وشك أن تنطلق تتعمل العملية.
عمروالليثي : مصادر تمويلهم ايه ..؟
منتصرالزيات : مصادر التمويل أنا يعني 25 سنة اشتغلتها في هذه القضايا كمحامي لهذه الجماعات .. أعتقد أبرز ما قيل في التحقيقات أخيراً في قضية العائدون من ألبانيا سنة 98 إن المتهم أحمد النجارنفذ فيه حكم الإعدام .. قال في أقواله إن التمويل كان بيتم عن طريق الآتي أسامة بن لادن كان يمول أفراد جماعة الجهاد بتنسيق خاص بينه وبين أيمن الظواهري وكان أعضاء التنظيم أيضاً بيقوموا اللي بيشتغلوا في بعض الدول بيعطوا 10% من روابتهم للتنظيم .. أيضاً هناك مشروعات في شرق آسيا في معهد السكر أيضاً فيه شركات عقارية للتجارة في المساكن القديمة في لندن هذه المشروعات وغيرها كانت تدر الأرباح أو الأموال للتنظيم .. هذا الكلام المتهم المُعدم أحمد النجار في أقواله في تحقيقات قضية العائدون من ألبانيا.
عمرو الليثي : ادينى فكرة عن أفكار بن لادن وتوجهاته
عصام دراز/ صديق أسامة بن لادن: آه .. بن لادن شخص متدين جداً.
عمرو الليثي : انت قعدت معاه أد ايه .. حوالي كام سنة ..؟
عصام دراز : الفترة اللي قضيتها معاه هو شخصياً حوالي سنتين
عمرو الليثي : سنتين ..؟
عصام دراز طبعاً فيه كنت بأنزل في
عمرو الليثي :كنت مقيم معاه في نفس المكان ..؟
عصام دراز : في الخلا .. ماكنتش بأقيم معاه غير في ...
عمرو الليثي : هو كان بيعيش في خندق
عصام دراز : في الكهوف .. في الجبال .. في المعارك .. حسب ظروف الجبال وطبعاً ..
عمرو الليثي : بينتقل من مكان لآخر واللا هو ثابت في مكانه ..؟
عصام دراز : لأ في وقتها كان مثلاً موقع هنا معارك جلال أباد كانت أكبر معارك خدت شهور طويلة أنا معظمها كنت موجود معاه فبالتالي كهوف وجبال وصخوريعني أفكاره أفكار إسلامية عادية في البداية .. قرا لابن تيمية وهو من المفكرين الإسلاميين اللي هو يعني بيبرز قيمة الجهاد في سبيل الله وبيعظمها .. فيه يعني تيار فكري.. في بدايات بن لادن كرجل مسلم عادي .. غير منظم .. غير تابع للتنظيم .. زي ما قلت لك راح في زيارات ليتبرع ففكرة الجهاد الموجود داخله نمت لما لقى مبرر للجهاد.
عمرو الليثي: أستاذ عصام ما هي مصادر تمويل أسامة بن لادن ..؟
عصام دراز :مصادر بن لادن حضرتك عندك فكرة عن شركة بن لادن .. من أكبر شركات المقاولات في العالم .. يعني لها ترتيب عالمي .. وبالتالي هو من أبناء بن لادن مؤسسها .. فبالتالي ثروته الشخصية قد تغني أي شئ .. وبعدين طب أنا عايز أقول حاجة .. في مراحل الجهاد الأولي كان بيتلقى نوع من الدعم .. ده بقى من الحاجات الموضوعية.
عمروالليثي : منين ..؟
عصام دراز : من زملائه .. فيه رجال أعمال كانوا مقتنعين .. ده أنا .. آه .. أقولك آه .. مش أمواله وبس .. وأضيف إلى أمواله أموال ناس مُتبرعين جدد .. وهو صرح بذلك.
عمرو الليثي : يعني هو تنظيم القاعدة .. ما هى علاقة أسامة بتنظيم القاعدة ..؟
عصام دراز : هو تنظيم القاعدة نشأ في الفترة الأخرانية قبل ما أمشي .. يعني أنا مرة باسأل على .. يعني كنت رايح كنت عايز أخش أصور جوه .. فطبعاً لازم حد يبقى معايا ..يعني معايا كاميرا أو قلم فعاوز حد يكون مصور معايا .. بامشي مثلاً 200 ... 300 كيلوا في مناطق شديدة الخطورة فأنا عاوز حد يطلع معايا .. فقال .. لازم .. بن لادن هو فين .. قال في القاعدة .. هو كان بيبيت هناك .. بيت عادي .. بس فرحت تنظيم القاعدة .. عبارة عن فيلات .. مكاتب .. فأنا عايز أقول إنها في الوقت ده ماكنش العملية تنظيم القاعدة اللي هو ده .. بس يعني ده عبارة عن مكاتب .. مكاتب بتديرالعمل .. كان بيديره من بيته.
عمروالليثي : هو الذي أنشا تنظيم القاعدة ..؟
عصام دراز : هو الذي أنشا تنظيم القاعدة ..
د/وحيد عبد المجيد مساعد مدير مركز الأهرام الاستراتيجي : القاعدة ليست تنظيماً بالمعنى الدقيق وإنما هي شبكة .. شبكة تضم عدد من التنظيمات وتضم عدد أكبر من الأشخاص موجودين في عدد كبير من بلاد العالم .. فيه بلاد إسلامية وفيه بلاد أوروبية وغربية، ولذلك بطبيعة تركيب الشبكة .. بتضم عدد كبير من التنظيمات .. إنه بيكون تركيبها مرن جداً .. وبالأكثر من ذلك يعني الكثير من هذه التنظيمات والأفراد لا يعرفون بعضهم البعض .. بن لادن بعد خبرة الحبة ده انضم إليه عناصر مضافة .. أنا عاوز أقول كلمة مضافة يعني ايه .. يعني بالإضافة إلى فكره ورغباته الشخصية .. بقى فيه فكر تنظيمي .. ما هو الفكر التنظيمى ..؟ - ينظم الجهاد والجماعة الإسلامية .. أنا كنت بأتعجب لنموه السريع ده .. ده نمو تنظيمي .. يعني موجود ناس بيوجهوك لهذا الكلام، وهما معظمهم من تنظيم الجهاد المصري أو جماعة إسلامية لأن ليهم خبرات سابقة في التنظيم والصدام مع السلطة وما إلى ذلك.
موسيقى ومشاهد لسيارات مُحطمة ولقاءات أرشيفية
عصام دراز :هو الذي أنشا تنظيم القاعدة ..
تقرير
إن الإرهاب لا عقل له ولا دين ولا وطن .. فقد قام تنظيم القاعدة بارتكاب أكبر جريمة إرهابية في حق مصر-راح ضحيتها المئات في أبشبع الصور الدموية لأبشع جريمة إرهابية وقعت في مدينة السلام في شرم اشيخ .. لمصلحة من كل هذا الخراب لمصلة كل هذا الدمار .. لمصلحة من ..؟
موسيقى وصورة لحادث الإنفجار الذي وقع أمام كنيسة القديسين بالإسكندرية
تقرير
وبعد سنوات من الهدوء هز ضميرالوطن وأوجع قلوب المصريين عمل إرهابي خسيس أطل بوجه القبيح مع الساعات الأولي للعام الجديد .. فأفسد الفرحة وأحزن القلوب .. عمل إرهابي استهدف القديسين بالاسكندرية .. فأوقع 21 شهيداً و 97 مصاباً من بينهم ثمانية مسلمين .. هذا الحادث الإرهابي لم يستهدف الإرهاب فقط .. بل استهدف مصر بأقباطها ومسلميها .. استهدف ضرب وحدتها الوطنية التي تعتز بها منذ فجر التاريخ .. استهدف وقيعة بين جناحي الأمة الذين أدركوا ومنذ اللحظة الاولي ما وراء هذا العمل الإجرامي .. ساءهم أن تنعم مصر بالاستقرار ومن حولها يضرب الإرهاب في كل مكان .. ساهم أن تحقق مصر إنجازاً يحقق طموحات وأحلام شعبها .. الرسالة واضحة والأمر بات مكشوفاً لمن لديه بصيرة أو حب لهذا الوطن .. فمرتكبوا الحادث ليسوا من المصريين بحق .. كما أنهم ليسوا مسلمين بصدق .. ونقول للإرهابيين نعم .. وصلت الرسالة وستصلكم رسالة الشعب المصرى عامة عما قريب ..
صورة للمؤتمر الصحفي يجمع بين البابا شنودة وشيخ الأزهر ومنظر عام للكنيسة ومعها المسجد
وفي موكب الشهداء ولادك الأوفياء .. تشملهم رحمته .. تجمعهم جنته في الأرض وفي السماء .. وتحلى فيك الشهادة .. ويحلى الاستشهاد .. الموت بحبك عبادة وكل شئ في ميعاده .. ابنك يا مصر ودعيه .. وبين جناحك احضنيه .. وفي عطر مثواه الأخير صلي عليه وأذكريه .. في جنة الشهداء .. في جنة الشهداء ..
فاصل وموسيقى عسكرية
عمروالليثي : الوفاء بالنيل ونصر أكتوبر يتطلب منا أن تظل بطولات وتضحيات أبطال قواتنا المسلحة راسخة في نفوسنا وقلوبنا وعقولنا تتناقلها الأجيال من جيل لآخر.. هؤلاء هم الذين قدموا أرواحهم الطاهرة وتضحياتهم الخالدة لمصرالحرة، ونتذكر كل شهدائنا الأبرارالذين روت دمائهم الطاهرة أرض سيناء، وسطرت بدمائهم أنشودة النصر.
فاصل "أغنية وطنية"
عمروالليثي : صائد الطائرات نموذج رائع من صور التضحية والفداء .. واحد من أبطال الدفاع الجوي الذين قاموا بدور هام في نصر أكتوبر بقدرتهم على بتر ذراع اسرائيل الطولى المُتمثل في قواته الجوية .. إنه البطل الشهيد "المُقدم أحمد حسن".
نهلة أحمد حسن/ كريمة الشهيد أحمد حسن :استشهاد بابا كان 18 أكتوبر في الثغرة، كان في أمر بالانسحاب وهما بيسحبوا منصة صواريخ وقعت في حفرة فساعتها قائد اللواء بعت 2 مهندسين علشان يطلعوها، بس معرفوش يطلعوها، فبابا قال أنا اللي هاطلعها، وفعلا خد معاه ناس وراحوا يطلعوها، قال ابعتولي دبابة نجدة، بعتوله دبابة نجدة فبابا جاب وقام وعمل حرف إكس وربط دبابة النجدة في منصة الصواريخ، وهو بيربط ساعتها جه الطيران الإسرائيلي وحصل ضرب جامد جداً فراحت الدبابة متحركة لقدام فراحت شادة منصة الصواريخ من الحفرة وكان بابا ساعتها واقف في النص لسه، فراحت المنصة طالعة عليه، المفروض لو الأرض مستوية ماكنش حصل حاجة لأنها زي الدبابة كده 2 جنزير وفي النص فيه فراغ بس الأرض كانت مُتعندة، فراح قايل آه يا ضهري، طلعوه من تحتها ويا افندم يا افندم، قالهم أنا كويس مفيش حاجة، هي لحظة بس قال فيها آه يا ضهري، ساعتها بعتوا جابوا عربية اسعاف وجت خادته، وهما بينقلوه للضفة التانية، وهما على المعبر وعربية الاسعاف على المعبر فساعتها بكر واللي معاه لقوه عمال يبص حوليه ويضحك، فبيقوله يا افندم انت عامل، قاله أنا كويس كويس قوي، ايه ويبص ويضحك، فراح قايله خد العنوان ده، ده عنوان خالي وروح له وقوله قول لأمي قولها سامحوني، وبص وضحك وخلاص جاب دم بعد كده من مناخيره وبقه واستشهد.
موسيقى مع عرض لصورالشهيد أحمد حسن مع زملائه
عمرو الليثي : صائد الطائرات لم يتمكن فقط من إسقاط 13 طائرة للعدو، بل إنه استطاع إسقاط طائرين بصاروخ واحد.
نهلة أحمد حسن/ كريمة الشهيد أحمد حسن : كان فيه تمهيد في البيت من البداية بالشهادة بتاعة بابا، لأن كانت من البداية خالص جدتي وهي حامل فيه شافت رؤية، كانت الرؤية ده 13 نجمة بين السما والأرض ساجدين قدام الرسول عليه الصلاة والسلام، جدي كان أزهري فجدتي قالت له أنا شفت كذا كذا قالها شاف التفسير وقالها اللي في بطنك ده هايموت شهيد، بس محدش كان فاهم ايه ال 13 نجمة دول .. بعد استشهاده زمايله اللي جم قالوا إنه من الفترة من 6 أكتوبر يوم استشهاده 18 أكتوبر وقع 13 طيارة .. طايرين بين السما والأرض شعاره النجمتين.
أغنية وطنية وصور للشهيد أحمد حسن
عمرو الليثي : محمد وجورج كانا في أحد مواقع المدفعية خلال الأيام الأخيرة من حرب أكتوبر 73 عندما قصفت الطائرات الإسرائيلية الموقع بقنابل زنة ألف رطل، وكانت الإصابة مباشرة لم تفرق القذيفة الإسرائيلية بين محمد وجورج واختلطت دماء المصريين في ملحمة رائعة على تراب الوطن.
فاصل "أغنية انشدي لحن الجهاد"
نهلة أحمد حسن كريمة الشهيد أحمد حسن : المفروض لما عرفنا كان استشهد بقالوا فترة حوالي أسبوعين وكان في أخبار هو فين أحمد، كان المفروض دايماً بيتصل بالتليفون ايه مفيش أخبار .. اتقطعت مرة واحدة فبدأوا ايه، اظاهر إنه رجع روسيا اظاهر وقع إنه في الأسر، كلام كتير كده، بس كان فيه ايه بقي زمايله بدأوا يمهدوا من بعيد لبعيد يعني، جينا في يوم كنا رايحين لجدتي فأنا داخلة كنت داخلة متأخر شوية فببص كده لاقيت عماتي واقعين مغم عليهم على الأرض، وخالتي منهارة وماما عمالة تعيط ومنهارة، فالجيران .. أحب أقول إن الجيران كانوا مسيحيين مش مسلمين كانوا أهلي وهما اللي كانوا يعني، والبيوت كانت مفتحة على بعض ما كنش في حكاية اسمها مسلم ومسيحي خالص، وعُمري ماحسيت من ناحيتهم بحاجة، وكانوا نعم الأهل ولازالوا هما اللي خدوني طبعاً واحتضنوني، أنا ما كنتش بعيط هما كانوا مُنهارين برضه، قلتلهم أنا عارفة في ايه بابا استشهد مش كده، فبقوا مخضوضين، قلتلهم يا بخته يا ريتني أروح معاه.
أغنية "بلادي" لعبد الحليم حافظ
صورة أنور السادات .. البحث عن الذات .. قصة حياتي
عمرو الليثي: يتحدث الرئيس الراحل أنورالسادات في كتابه البحث عن الذات عن الضربة الجوية الأولي فيقول كما فقدت في تلك الحظات الأولي من الحرب أخي التيار الشهيد عاطف الذي هو في منزلة إبني لأنني أنا الذي ربيته ولكنهم أخفو عليَّ حينئذٍ نبأ إستشهاد أخي .
الكاتبة الصحفية / سكينة السادات شقيقة الشهيد عاطف السادات :هو خلص عملية العبور والطيارات وراه عبرت لقي فرصة إن الطيارات بتاعة إسرائيل في مطارالميليس موجودة تذكر حرب 67 لما جم ضربوا طياراتنا علي الأرض مد هو حتي من غيرأمرالقائد بتاعه مد المطار المليس وراح ضارب الطيارات كلها اللي علي الأرض كان هو اللي أنجزأكثر طيارات قضي عليها وإشتعلت في الأرض كان عاطف هو اللي ضربها في مطارالميليس جاءت طلقة صغيرة هي اللي وقعته واستشهد أخونا الصغير.
موسيقى حزينة ومشهد لصورة عاطف السادات
أ/سكينة السادات :لحد دلوقت بعد 37 سنة أي جرس علي الباب يتهيأ لي إن هو عاطف رجع لحد دلوقت لإن ما دخلش في يقيني إن هو أستشهد بس فين بقى وفين بعد سنة وبعد ما خلاص السلام واتحلت المشاكل علي الجبهات وكله .. كله بنسأله جمعنا كلنا في البلد الريس أنورالسادات أخونا الكبير يعني جمعنا كلنا وقال أنا مش عايز لا عياط ولا حد يلبس اسود الشهيد حي عند ربه يُرزق ما حدش يعمل كده أخوكوا إستشهد وأنا بدعوا الله أستشهد زيه طبعا العياط بقى وكانت حاجة مؤلمة جدا "بكاء من السيدة سكينة".
أغنية " الدم ده دمي .. اللون ده من ..."
عمرو الليثي :في حرب أكتوبر 73 كان هناك مُقاتل من كل بيت مصري، وأن كثير من الأسر المصرية قدمت أكثر من مُقاتل وأكثر من شهيد وكانت أسرة اللواء الشهيد محمود التميمي من بين هذه الأسر التي قدمت شهيداً بينما بقي الآخر حياً يحكي قصة شجاعته.
السيدة/ سميرة يوسف والدة الشهيد نقيب محمود التميمي : أنا كان ولادي الاتنين هناك اللوا محمد التميمي أخوه وهو، عند ربنا ما شككتش، استشهد يوم 19 أكتوبر في الثغرة أنا معرفش الحاجات بس اللي وصلنا اللي بلغنا بالتليفون بقوله مين قالي محمود تعيشي انتو استشهد والبقاء لله الأمر لله والصدمة كانت صعبة عليّ، أنا فخورة به جداً استشهد في ساحة القتال لكن صعب على الأم، وقعت ما حستش بنفسي.
عمرو الليثي:ورغم أحزان الأم لفقدان ابنها إلا أنها كانت راضية بقضاء الله فخورة بما قدمه الابن للوطن، وسلواها إنه كان يتمنى الشهادة ويطلبها في صلاته.
السيدة /سميرة يوسف والدة الشهيد نقيب محمود التميمي:أنا فخورة بيهم انهم شالوا الحرب وطلعوا اليهود من مصر، وهو كان بيستناها من صغره .. وكان نصيبه الشهادة.
فاصل "أغنية راح أموت علشان بلدي تعيش" لعبد الحليم حافظ
تقرير
صوت جمال عبد الناصر: ايها المواطنون اسمحوا لى أن أوجه كلمتي إلى أهلي في اسطال .. فقد أنبتت عبد الحكيم عامروأنا أعرف الناس بعبد الحكيم عامر.. عبد الحكيم عامر صديق العمر الذى عاصرته فى أهم فترة من حياتى وهو رجلا ولا كل الرجال .. رجلاً ينكر ذاته ولا يظهر إلا فى الشدائد والمصاعب وفي الظلومات .. كان دائما مثلاً أعلى لنا فى تضحيته وفى إنكاره لذاته وإن إسطال لتحتل جزءاً كبيراً فى نفسى لهذا السبب.
تقرير
عام 1936 وداخل أسوارالمدرسة الحربية فى كوبرى القبة كان اللقاء الأول بين جمال عبد الناصر حسين ومحمد عبد الحكيم عامر زملاء الدراسة .. لكن العلاقة بين ناصر وعامر كانت أكثر تميزاً .. ربما بحكم انتماء كل منهما إلى صعيد مصر، فناصر من قرية بني مر محافظة أسيوط .. وعامر من قرية إسطال محافظة المنيا .. شاركا فى حرب فلسطين عام 1948 واكتسبا شهرة وثقة كبيرة فى أوساط الجيش المصري .. نظراً لما تميز به من شجاعة .. جمال عبد الناصر وصموده في حصار الفالوجا .. وعبد الحكيم عام وبسالته في القتال والتي أدت إلى حصوله على ترقية استثنائية في أعقاب الحرب .. عندما كون جمال عبد الناصر اللجنة التأسيسية لتنظيم الضباط الأحرار فى أكتوبر عام 1949 كان اسم عبد الحكيم عامر يتصدرالقائمة .. ولعب عبد الحكيم عامر دوراً كبيراً فى بناء التنظيم خاصة من بين ضباط سلاح المشاة حيث كان يعمل أركان حرب السلاح .. ويتمتع بحب واحترام ضباطه كما أن تحركاته وسط ضباته لم تكن محل شك بحكم وظيفته من ناحية وبحكم علاقة القرابة الوثيقة التى كانت تربطه بالفريق محمد حيدر باشا القائد العام للقوات المسلحة فى ذلك الوقت من ناحية أخرى .. خرج الاثنان معا ناصر وعامر ليلة الثالث والعشرين من يوليو لعام 1952 يشرفان على تحركات القوات المشاركة فى الثورة ويتابعان أحداث تطوراتها والتى انتهت بالاستيلاء على مقر القيادة فى كوبرى القبة وكانت كل الأمور تجرى تحت سيطرتهما المباشرة حتى نجاح الثورة وإعلان أول بياناتها فى صباح يوم الثالث والعشرين من يوليو لعام ألف وتسعمائة واثنين وخمسين لتبدأ مرحلة جديدة فى علاقات الرجلين استمرت على مدى خمسة عشر عاما وانتهت نهاية مأساوية عندما انتهت حياة عامر أو أنهيت.
فاصل موسيقى
عمرو الليثي:كلمني عن علاقة الرئيس جمال عبد الناصر بالمشير عامر؟
جمال عبد الحكيم عامر/ نجل المشير عبد الحكيم عامر:كانوا زي الاخوات يعني أو أكتر يعني .. علاقة .. مافترقوش إلا في النهاية يعني
موسيقى وكلمة الرئيس بمناسبة التوقيع على الوحدة مع سوريا
تسجيل أرشيفي للرئيس جمال عبد الناصر"بمناسبة التوقيع على الوحدة مع سوريا فبراير"1958
"وقد انتهت محادثاتنا إلى إعلان الوحدة رسميا وتوقيع هذا الإعلان في يوم السبت الأول من فبراير سنة 1958 توحيد مصر وسوريا في دولة واحدة أسمها الجمهورية العربية المتحدة"
صورة لحشد جماهيري وكلمة المشير عامر بمناسبة العيد الأول للوحدة الوطنية
"ايها الأخوة المواطنون إن الوحدة العربية التي ناديتم بها ونادى بها قائد القومية جمال إنما تأخذ صورتها منكم أنتم الشعب العربي فأنتم دمها وأنتم قلبها النابض هذه القومية العربية التي تستمد قوتها من الفرد العربي فلا يمكن أن تكون القومية العربية قوية وعزيزة إلا إذا كان الفرد العربي قوي وعزيز"
عمرو الليثي :ترد بأية على اللي بيقولوا إن المسئول الأول عن الانفصال وفشل الوحدة هو المشير عبد الحكيم عامر؟
جمال عبد الحكيم عامر :أنا عاوز أقول حاجة أنت النهارده عاوز تعمل الوحدة بالقوة العسكرية ولاّتعملها بايه يعني قبل ما نوصل للنهاية دي اللي هي الانفصال وإن هم يعملوا انقلاب ضد الثورة وضد مصر كان مفروض نتلافى الموضوع ده من الأول النهارده أنت حاسس إن فيه تيار ضدك وحاسس إن فيه قوة بتشتغل ضدك وحاسس إن فيه ناس مستاءة من حاجات معينة ، عايزين نطبق اللي إحنا عاملينه هنا على الناس اللي هناك طب اللي يجوز هنا مايجوزش هناك طبيعة الشعوب مختلفة فالنهارده أدور على أصل المشكلة هو المشكلة كانت في عبد الحكيم عامر وكان المفروض إن هو يقمع السوريين ويحكمهم حكم عسكري .. هو ده اللي كان مطلوب.
عمرو الليثي :احكيلي اللي حصل بين الرئيس وبين المشير لما رجع مصر بعد فشل الوحدة أفتكر كان متأثر قوي كانت حالته أية ؟
جمال عبد الحكيم عامر :الحاجة اللي أنا عرفتها إن هو زعل إن الريس ما قبلوش في المطار حتى هو عاتبه فيها فالريس قاله البروتوكول ومش البروتكول فهو بص له وضحك بمعنى إن البروتوكول هو اللي منعه هو كان عاوز يبعد نفسه عن الموضوع الله أعلم فعدم مقابلته له في المطار حس إن فيه موقف معين ضده
فاصل موسيقى وعرض صور لعبد الحكيم عامر
عمرو الليثي :ايه اللي خلى الرئيس عبد الناصر يصل إلى قراراته في 62 ثم يعدُل بعد ذلك ؟
جمال عبد الحكيم عامر :هو يعني طبعاً قبل كده مكنش فيه حاجة أسمها مجلس الرياسة أتعمل مجلس الرياسة عشان الموضوع ده
عمرو الليثي :عشان تحجيم عبد الحكيم عامر ؟
جمال عبد الحكيم عامر :آه بالظبط لأنة ما اجتمعش تاني بعد كده ولا اجتمع قبل كده
عمرو الليثي :كان ليه القرار ده ؟
جمال عبد الحكيم عامر :هو تحجيم لقوته لن أنت لو أتحكمت في الترقيات حتجيب الظباط اللي أنت عايزها في المراكز اللي أنت عايزها فبالتالي لما يسحبوا منه السلطات دي يبتدوا يقصقصوا بقى بإن هما يجيبوا الناس اللي هم عايزنها بحيث إنهم يطيروا في الأخر .. هو طبعاً راح ماشي وقدم استقالته الشهيرة في 62 للرئيس وطبعا فيه ناس علقت على هذه الاستقالة.
عمرو الليثي:هل كانت استقالة مُسببة ؟
جمال عبد الحكيم عامر:مُسببة
عمرو الليثي:أهم أسبابها ايه؟
جمال عبد الحكيم عامر:يعني هما بعد تجربة العدوان الثلاثي في 56 كان تفكيرهم إن هم يبعدوا إن هم يخشوا في أي صراعات أخرى في البلد من الداخل وإن إحنا ما نتجرجرش في أي حاجه إلا في الوقت المناسب يعني ده كان توجه موجود وكان فيه اختلاف تاني إن والدي مكنش بيحب الشيوعيين وكان علاقته بالروس فيها نوع من الندية يعني أخر زيارة له سنة 65 خصل إن هم قالوا له مش حنديك الأسلحة اللي أنت طالبها إحنا عايزين قاعدة في رأس بناس وعايزين قاعدة في مرسى مطروح وعايزين قاعدة في غرب القاهرة قاعدة جوية هو ما رفضش لوحده القواد اللي معاه هم كمان رفضوا وبالتالي بلغهم رفضهم فهو كان عنصر مناوئ للروس في مصر.
موسيقى وعرض صور للرئيس عبد الناصر والمشير عامر
جمال عبد الحكيم عامر:يوم 26 مايو أصدر المشير أمر القتال إن القوات الجوية توجه ضربه للمطارات الإسرائيلية.
عمرو الليثي:كان اسمها فجر ؟
جمال عبد الحكيم عامر:مظبوط بالظبط يوم 26 أمر قتال
عمرو الليثي:وتم التراجع عنها بعد كده؟
جمال عبد الحكيم عامر:طب ما دي احدى الكوارث النهارده لما يجي السفير السوفيتي يخش يصحي الرئيس جمال عبد الناصر الساعة 3 الصبح ويقول له فيه ضربه حتحصل كمان 90 دقيقة وإحنا بنرجوكم أنكم تتراجعوا في هذا القرار وحنديكوا ضمانات وحيحصل حل للموقف وكلام من ده فالريس فعلا كلم المشير وقال له يعني نلغي الضرب حصل نوع من....
عمرو الليثي :الغاء العملية..
جمال عبد الحكيم عامر:لأ هو كان معارض إن يلغيها برضه
عمرو الليثي:المشير
جمال عبد الحكيم عامر:آه لأنه شايف انها كان لازم تتعمل فطبعاً قالوا الحديث ده خد أبعاد كبيرةيعني وفيه خلاف كبير وتحت طبعاً إنه شايف قاله أنا رئيس الدولة وإذا كنت عايز تاخد تصر على قرارك لكن هاسيبلك انت تتصرف وان معناه يسبب الرئاسة يعني فقاله..
عمرو الليثي:وصلت لكده ؟
جمال عبد الحكيم عامر:قاله يعني طيب
عمرو الليثي:أنا أول مرة اعرف الكلام ده
جمال عبد الحكيم عامر:لأ الحوار ده موجود فقاله يعني انت خلاص بقى قاله انا متحمل المسئولية يا ريس قاله مادام هتتحمل المسئولية خلاص وده الضربة لازم تتم وانت باصرارك على الغائها ده هانخش في كارثة.
عرض للطائرات وضرب أهداف عسكرية
عمرو الليثي :مًن صاحب قرار الانسحاب في 67 ؟
جمال عبد الحكيم عامر:في يوم 6 يونيو أصدرالمشير قرارا بالانسحاب إلى غرب القناة على أن يتم ذلك في ليلتين وجرت بعدها مناقشات داخل القيادة حول القرار وأسبابه مع أن الوضع العسكري لقواتنا ليس سيئا إلى هذا الحد وجاءنا قرار المشير عامر أنه قرار سياسي .. ده برضه ....
عمرو الليثي:يعني أنت عاوز تقولي إن صاحب قرارالانسحاب برضة الرئيس عبد الناصر وليس المشير عامر؟
جمال عبد الحكيم عامر:مش أنا اللي بقول ده رئيس العمليات اللي بيقول كده للقوات المسلحة.
موسيقى وعرض صور للعمليات العسكرية
عمرو الليثي:ايه اللي خلى الموضوع يتصاعد بينهم لغاية ما قاله تعالى أنا مسافر الخرطوم وعايزك تيجي معايا راح هناك لقى محاكمة من أعضاء مجلس قيادة الثورة احكي لي ايه اللي حصل يومها .. هل شك المشيرعامر في الدعوة قالوا لي إن الظباط قالوا له ما تروحش؟
جمال عبد الحكيم عامر:شك طبعا بس .. بص هو مفيش حد قاله ما تروحش .. روح .. صلاح نصر قاله
عمرو الليثي:والدتك قالت له ايه؟
جمال عبد الحكيم عامر:قالت له ما تروحش كل الناس المحيطين به بما فيهم شمس وبما فيهم الناس اللي موجو
عمرو الليثي :قالوا له ما ترحش؟
جمال عبد الحكيم عامر:طبعاً .. قالوا له هايعتقلك مش ما تروحش اللي أنا متأكد منه أنه كان مستبعد الموضوع ده تماما بالرغم من تحذيرات الناس كلها ليه لكنه ..... لما رجع قال لي حصل خيانة.
عمرو الليثي:الوالد بعد ما قابل الرئيس عبد الناصر تم التحفظ عليه في فيلا الجيزة ؟
جمال عبد الحكيم عامر:كويس قوي في البيت قعدنا 18 يوم هو قاعد في البيت مفيش تليفونات ومفيش أتصالات خالص ووسيلة اتصاله الوحيدة إحنا نطلع بره .. بلغنا إن الفريق فوزي جه تحت وعبد المنعم رياض فقالي خليهم يطلعوا فبعت أخويا ناصر الصغير .. راح طلع عبد المنعم رياض وفوزي ما طلعش وناصر ما رجعش بصيت في الطرقة لقيت ظباط لابسين ملكي ومعاهم بنادق آلية ومليين الصالة ومليين البيت فعلى باب الصالون كم ظباط بالبنادق واقفين فقلت له دول دخلوا البيت بص في المولد ده لقى ظابط هلف قاله أنت يا واد أنت بترفع السلاح عليا .. فالتاني قاله مفيش داعي يا فندم فرجع الصالون تاني قعد وقالي أنزل شوف أخوك اللي ما رجعش بعت أختي نوال مرجعتش فنزلت أنا لقيتهم بيصوتوا ومحبوسين في أوضه وفوزي قاعد في الأوضة اللي جنبهم فراحوا زقني معاهم وقفلوا الباب في اللحظة دي في البيت راحوا متكالبين عليه نزلوا على السلم وفي اللحظة دي بنزق الباب أنفتح ورحنا جاريين طلعت على فوق لقيتهم منزلينه على السلم وماسكينه بالقوة وطلعوا من باب البيت على الجنينة كانوا جايبين عربية الأسعاف بضهرها جوه البيت وفاتحين الباب وجُم يدخلوه جوه العربية استحالة راح حاطط رجليه في العتبة بتاعة الباب ويزقوا فيه لا يمكن يخش فراحوا جايبين عربية مرسيدس سوده كده وما قاومش إنه يركب فيها وركب جنبه عبد المنعم رياض والظابط اللي اسمه حتاتة وكانت دي أخر مره أشوف وشه فيها ..
عمرو الليثي:خدوه وطلعوا على فين..؟
جمال عبد الحكيم عامر: طلعوا على فيلا المريوطية اللي هي كانوا مجهزينها راح معاه الليثي ناصف وراح معاه فوزي وراح معاه عبد المنعم رياض والرائد ده اللي اسمه حتاتة
عمرو الليثي :وبعدين؟
جمال عبد الحكيم عامر:وبعدين تاني يوم الصبح إحنا كنا في البيت جه ظابط قال المشير طالب طلبات عايز الكتب بتاعته .. عايز شنطة الأدوية لأنه كان فيه أدوية بياخدها كل يوم بعتنا له الحاجات دي كلها ... طبعاً اللي عرفناه بعد كده إنه طبعاً ما كملش تاني يوم على طول حصلت الوفاة الساعة السابعة إلا ربع
عمرو الليثي :لأ .. احكي لي ايه اللي حصل عرفتوا أزاي الوفاة ؟
جمال عبد الحكيم عامر:والله جه ظابط بلغ محمد عزب جوز أختي موضوع إنه المشير مات
عمرو الليثي: الساعة كام .. ؟
جمال عبد الحكيم عامر:كان يوم الجمعة
عمرو الليثي :تاني يوم الوفاة ؟
جمال عبد الحكيم عامر:وإن هو راح على البلد .. وإن هم ودوا الجثمان على البلد رحنا هناك لقيت البلد مُدججة بالعساكر والسلاح وفيه الديوان بتاع العمدة بتاع هيكل اللي بيقول عليه بتاع العمدة .. حطوا فيه الجثمان منعوا أي حد يخش عليه ولا يشوفوا نهائي وطبعا فيه تعليمات إن الجنازة تتم فورا حتى أتمنع أي حد يشيع الجنازة حتى من أهل البلد وخلصنا الدفن وقلنا مش حنعمل عزا وركبنا العربيات ورجعنا على مصر.
فاصل موسيقى صور لعبد الحكيم عامر مدنية وعسكرية
عمرو الليثي :ايه الدليل الدامغ على إن هو أتقتل ما انتحرش؟
جمال عبد الحكيم عامر:أنا بقول لك إن التقرير بتاع دياب اللي هو النائب العام استدعاه وقالوا تعملي تقرير النائب العام اللي استعاه مش إحنا وعمل ذلك التقرير وقاله في التليفزيون وقال إنه لا يمكن يكون أخد السِم ودي جريمة قتل متعمده ، يعني أنا برتكن لهذا الرجل لأن ده رجل فني وخبير سموم والنيابة العامة اللي استدعته والتقرير بتاعة موجود
عمرو الليثي :ونفى الدكتور على دياب إن سِم الأكوانتين ممكن تأثيره يستمر 28 ساعة والدكتور مرتجي قالك مشي من المستشفى والدكتور إبراهيم بطاطا قال إن التقرير الطبي لغاية السادسة والربع النبض سليم والقلب طبيعي.
جمال عبد الحكيم عامر:والمستشار محمد عبد السلام قال نفس الكلام اللي هو كان النائب العام.
عمرو الليثي:وتساءلوا لماذا راحت عربية إسعاف إلى فيلا الجيزة رغم إن مكنش فيه أي إبلاغ إنه كان مريض كل هذه التساؤلات تشير إلى احتمالية اغتياله لكن السؤال الرئيس عبد الناصر ما عزاكمش ليه؟
جمال عبد الحكيم عامر:أنت بتسألني أنا !!! معرفش
عمرو الليثي:ما اندهشتوش؟
جمال عبد الحكيم عامر:يعني بالنسبة لنا إحنا حملناه المسئولية من أول دقيقة وكان بنقول رأينا علني في كل حته وبالتالي محدش منهم شارك في هذا الموضوع إحنا كنا رافضينة فهم مكنوش بيحاولوا يتصلوا بينا
تقرير
كتب عبد الحكيم عامر وصيته قبل موته بأسبوع ونشرتها مجلة لايف الأمريكية وكانت موقعه باسمه جاء فيها يقول عامر "أنني فقدت الثقة في صديقي وأخي جمال ولم أعد أحس بالأمن من جانبه .. وما التهديدات التي أتلقاها إلا لأنني طلبت إجراء محاكمة علنية .. وقبيل ساعتين زارني ضابط مخابرات .. ما كنت أهتم بالنظر إليه عندما كنت في مجدي .. وقد هدد أن يسكتني للأبد .. وعندما قلت أنني أريد الاتصال بالرئيس قال لي إذا ظننت أن صداقتك بالرئيس ستحميك فأنت واهم .. وحاولت فعلا الاتصال بالرئيس ثلاث أيام فقالوا أنه مشغول أني واثق من أن هناك مؤامرة تدبر ضدي"
فاصل موسيقى
عمرو الليثي : المشير عامر كتب وصيته كتبها أزاي وايه ظروف كتابتها ؟
جمال عبد الحكيم عامر:دي كتبها ساعة تحديد الإقامة في الجيزة وهو كتب الوصية دي وكتب حاجة تانية بعديها بس دي يمكن اتكتبت يوم 8 أو 9
عمرو الليثي : أهم ما جاء فيها ..هل كان حاسس فعلا انه هيتقتل؟
جمال عبد الحكيم عامر: والله أهم ما جاء فيها
عمرو الليثي :هو حاسس انه هايتقتل
جمال عبد الحكيم عامر:دا اكيد ..دا اكيد وهو قال دا في الوصية وقاله لينا إن هوحياته مهدده وإن سعد زغلول عبد الكريم ده هو الظابط اللي جه هدده وإحنا موجودين في البيت قاله إن ما سكتش حنخلص عليك أنت وعيالك وبعدين أنا سمعت كمان إن هم اعتدوا عليه في المريوطية هناك
عمرو الليثي :سمعت؟
عمرو الليثي :لكنك غير متأكد؟
جمال عبد الحكيم عامر: يعني أتأكد أزاي !!؟ بس هي دي طريقتهم
عمرو الليثي :إذا كان المشير قد قُتل فمَن الذي قتله ولمصلحة مَن ؟
جمال عبد الحكيم عامر:والله ده موضوع يظهره التحقيق بقى
عمرو الليثي: هل ده حصل بمعرفة الرئيس أم بعدم معرفة.... ؟
جمال عبد الحكيم عامر:معرفش مقدرش أحدد لكن التعليق بتاع فوزي بعد ما سمع إن هو مات يعني معناه إنه مش حيرجع لنا تاني لأنه كل مره كان بيرجع له.
فاصل موسيقى مع عرض لبعض صور المشير
عمرو الليثي :كان هذا ما قدمناه خلال العام الماضي .. نعدكم بتقديم الجديد والمزيد في العام الجديد وكل سنة وحضراتكم طيبين .. ونلتقي إن شاء الله في الأسبوع القادم