المواطن الغلبان حسن حصاوى يغشى عليه من حين لآخر، وعندما يفيق لا يفهم ما حدث حوله من تغيرات ولكن أحيانا يجعل من يسمعه هو الذي يغشي عليه حصاوي جالس علي المقهى يأتي شاب ثوري ويتلفت حوله ثم يجلس الثوري (وهو ينفخ): إمتى بقى ييجي يناير؟ حصاوي: ودا سؤال؟ لما يخلص ديسمبر هييجي يناير. الثوري: أنت مش من البلد دي ولا إيه؟. حصاوي: والله العظيم معايا بطاقة شخصية حتى أهه.. ماشي بيها علي طول. الثوري: دا أنت غريب.. وما تسحقش تبقي مصري. حصاوي: ليه أنا عملت إيه؟. الثوري: نسيت عيد ميلاد الثورة؟. حصاوي: تقصد 23 يوليو؟ دا لسه بدري. الثوري: أنا بتكلم عن 15 يناير يا بني آدم. حصاوي: آه قول كدا.. معلش.. أصل أنا فهمي على قدي. الثوري: أكيد 15 يناير هو عيد الثورة المصرية.. افتكرت؟ حصاوي: آه طبعا دا استشهد فيه ناس كتير. الثوري: بالظبط.. ولازم نحتفل بيه.. مش في ميدان التحرير بس إنما في كل الميادين في مصر. حصاوي: بس أنت عايز تألب علينا المواجع ليه؟. الثوري: دا واجب وطني.. لازم نحتفل بكل شهدائنا اللي أتقتلوا وهما بيتظاهروا ضد الظلم. والاستبداد والديكتاتورية. حصاوي: طبعا عندك حق ونحتفل بيه كمان كل سنة. الثوري: طب ما أنت زينا أهو.. أنا افتكرتك مش مننا. حصاوي: إزاي إذا كنت أنا من ضحايا الظلم والفساد والاستبداد دا بص لشكلي وأنت تعرف. من ساعتها بقيت عاطل ومش لاقي اللقمة.. بس دي مش مشكلة.. أنا أبويا وأجدادي. حصلهم كدا من ستين سنة على الأقل.. ودا ما يجيش حاجة جنب ناس من حتتي ومن قرايبي اتقتلوا واتسحلوا في الثورة دي دا غير المصابين. الله يرحمهم جميعا. الثوري: أمين.. بس مش كفاية.. لازم نخلص من كل اللي عملوا دا. حصاوي: ما هو الدولة بتجيب رجلهم شويه.. بشويه الثوري: مش كفاية.. لازم ما نسيبش مبارك يهرب بجريمته حصاوي: ما هو لو كان عايز يهرب, كان هرب من الأول زى رئيس تونس مثلا. الثوري: عشان كده كان لازم ياخد إعدام.. مش ياخد براءة. حصاوي: البراءة عن قتل المتظاهرين بس هو متقدم في قضية فساد مالي وغيره. الثوري: مش كفاية.. وهنرغمهم يعدموه.. بعد شويه هتحصل مظاهرات النهار دا تطالب بكده. دلوقت تشوف. حصاوي: وهو إحنا محكمة؟ وبعدين جاوبني.. كام واحد خرج في المظاهرات السلمية دي؟ الثوري: كتير قوي. حصاوي: كتير قد إيه يعني؟ الثوري: ما عدتهمش بالظبط. حصاوي: يعني ييجوا قد التلاتة وتلاتين مليون اللي خرجوا في 30 يونيو مثلا؟ الثوري: مش المهم الأعداد.. ما تنساش أنه مرسي هو اللي كسب الانتخابات حصاوي: وما تنساش أنه هو وجماعته زوروا الانتخابات لما طبعوا في المطابع الأميرية أوراق مزورة ومنعوا المسيحيين يروحوا يحطوا أصواتهم وطلعوا في الفجر وأعلنوا بنفسهم أن هما اللي كسبوها.. وكانت البلد حالتها صعبة.. ومش كل الناس عرفوا اللي حصل إلا بعد كده. الثوري: الكلام دا ما فيش عليه دليل. حصاوي: قصدك لسه المحاكم ما حكمتش ع الرؤس الكبيرة . وساعتها هيبقي دا عيد الثورة بحق وحقيق، لكن تعالي قولي هنا، هو أنت إخواني؟. الثوري: لأ طبعا مش من الإخوان، لكن دي مسألة مبدأ . حصاوي: وأنا مصدقك أنك مش إخوان.. لكن اللي بيلعبوا في البلد شويه جماعات بتكمل دور الإخوان، وأقولك ميت اسم كانوا مخبيين أنهم معاهم عشان كانوا فاكرين هياخدوا من الإخوان حته من الكحكة، زي أيمن نور وغيره وبعضهم هربوا على بره بسرعة .. لكن لسه بعضهم موجودين بينا.. بس فاهمين إن الناس ما عرفتهمش. الثوري: هات دليل على الكلام اللي بتقوله. حصاوي: الدليل هتقوله المحاكم بس مش دلوقت.. إنما لما ييجي وقته.. وهو مش بعيد. الثوري: لا أنا مش ممكن أسكت علي الاتهامات دي. حصاوي: ومتعصب ليه؟ ما كله متسجل علي مكالماتكم. وبعضها صوت وصورة كمان. الثوري: أنا همشي بس مش هسكت.. أنا هرفع عليك قضية مستعجلة وأخرب بيتك.. قولي أنت اسمك بالكامل إيه؟. حصاوي: وهو أنت قلت لي اسمك.. هتعمل لي فيها بطل دلوقت ليه؟ أنا بطاقتي معايا.. طلع أنت بطاقتك ولا يمكن باسبورك الأجنبي.. ما هو أنت يا من 6 أبريل أو من جماعة أو من الثوريين الاشتراكين أو من كفاية أو من …. الثوري (نهض واقفا): أهو فيه مظاهرة جايه علينا.. سامع أصواتهم؟. حصاوي: دي مظاهرات من الناس بتجري ورا أصحابك.. بص أهم جايين من الناحية دي. الثوري ينظر ويجري هاربا لكن إلى الناحية الأخرى.
