عزيزي الناخب المصري المحترم ..بينما انت تلملم شتات أفكارك ..وتزبط نفسك علي وضع الاطلاق والانطلاق نحو الصندوق الانتخابي الرئاسي لأول مرة بجد في حياتك ..ارجوك ان تأخذ نفسا عميقا ..وتشرب العصير ..وتيجي نفكر شوية مع بعض ... عشت حضرتك 30 سنة في أسوأ- بلاش الكلمة التانية – في عهد المخلوع ابو سرير في المركز الطبي العالمي ..فإذن عليك ان تبدا في ممارسة نوع جديد من التفكير ..بهدوء ..هتقولي البلد بتولع هقولك مانت بتقول بتولع من سنه ونص فاتوا وانت لسه عايش اهو ..انت عاوز رئيس شكله ايه ؟؟؟ عينيه خضرة وشعره اصفر ..ولا بلو بلاك ؟؟ مش بهزر ..يعني انت مش عاوز مرشح رئاسي تفصيل ..وعليك ان تختار من ال13 واحد اللي في الورقه اللي هتشوفها يوم الانتخابات ..يبقي تيجي نقسم الاخوة االمرشحين دول ..ونفكر بشويش ...اهم حاجه ولا يعصبك ولا ينرفزك ...استهدي بالله كده وروق ...ياعم اشرب العصير منا قايلك من الاول ...
اولا الاختلاف في الرأي لا يفسد للود قضية ..والديمقراطية هي احترام الاغلبية بدون الجور علي حقوق الاقليات ..كلام قديم وبنسمعه ومابنعملش بيه صح .؟صح .. اتفقنا ...يبقي مفيش ديمقراطية ولا رأي ورأي اخر بين الحق والباطل ...يعني ما تقوليش انه فلان حر يختار احمد شفيق او عمرو موسي ...لا يا ريس ..مفيناش من كده ..دول مش تبع اللعبة ..دول فلول مفلولين اخر فلوله ...فلول جدا لحد ما الديك يدن ويندبح ويتاكل بالهنا والشفا..يعني اللي شايف نفسه حر يختار اعضاء نظام مبارك اللي عمرهم ما نطقوا كلمة حق امام الاخ الباشمهندس حسني مبارك ...المثل الاعلي لشفيق والمثل الاداري الماهر لعمرو موسي ..يعني الاخين الحلوين دول يلعبوا مع بعض في حته غير في دولة عاوزة تبقي محترمة ..وشعب بيدور علي مستقبل يخلص بيه من الخيبة التقيله اللي عاشت كاتمه عليه تلاتين سنه ..والله يخليك ما تقوليش البرنامج ..برنامج ايه يا عم ..الله يرحم ..احمد عز وجمال مبارك ..عشان تطمن علي مستقبل ولادك ...ده كان برنامج ولا كان كيتشن ماتشين ..؟؟ الحكاية مش برنامج خالص ...عاوز برنامج خليك مع باسم يومسف احسنلك..!!
نيجي بقي ع الباقي ..وهيتقسموا الي تلات انواع ..شبه فلول ..وثورة واسلاميين ..
هتلاقي ناس متعرفش عنهم حاجه ..خلاص سيبك منهم وخليهم مع نفسيهم كده منورين الورقه يا رجالة ..وشرفتونا في الفرح ..دول هياخدوا واجبهم ويشربوا العصير اللي انت مش راضي تشربه ده وهيروحوا علي طول ...وهمه دول اشباه الفلول..
اتبقي الاسلاميين والثوريين ..حلو كده ..
اعتقد ان الدكتور سليم العوا قايم بالواجب وزياده ومش محتاج حد يتكلم عنه لانه بكلامه بيكسب المنافسين اصوات من اصواته لوحده كده ماشاء الله ..يعني لو كان ساكت من اول الحملات الانتخابيه كان ممكن ياخد اصوات اكترمن كده ...
اتبقي اتنين واحد له جماعه وواحد من غير جماعه ..محمد مرسي مرشح الاخوان المسلمين ..حضرتك بتفكر في ايه ..اه الحرية والعداله ..ماشي ماشي مهو هيه هيه ...الاتنين واحد ..الاخوان المسلمين استبدلوا الشاطر بمرسي ..شالو خيرت وجابو مرسي ايوه يا عم هما حرين يرشحوا اللي يرشحوه ..وبشره خير هولاند فاز في فرنسا قالك الاحتياطي يكسب ..وابو تريكة فوز الاهلي علي الملعب المالي ..قالك الاحتياطي يكسب ..وسينتخب مرسي غالبية ان لم يكن كل الاخوان المسلمين بالاضافة الي المحظوظين الذين سينالهم – الخير- من سمن وسكر وزيت الحرية والعدالة ...
يتبقي اخيرا عبد المنعم ابوالفتوح كاحد ممثلي الاسلاميين والذي يعتبر مشاركا في التيار الثوري بقوة ايضا فهو ثوري اسلامي ان صح التعبير ..وهو يمثل تيارا قويا حيث استطاع استقطاب النقيضين من اليمين واليسار واراها ميزة تحسب له لا عليه فكونه مدعوما بليبراليين و اشتراكيين وسلفيين ايضا ..وهو يمثل احد فرسي الرهان الغير مستقطب بعيدا عن الفلول والمرشح الاخواني ...
التيار الرابع يا عزيزي – بعد الفلول والاخوان والاسلاميين ..الثوريين ويحسب عليهم كل من حمدين صباحي وخالد علي وهشام البسطويسي وابوالعز الحريري ..
يمثل ابوالعز الحريري تيارا ثوريا ذو تاريخ سياسي وعمل عمالي ونضالي محترم ولا اظن انه سيصل الي شعبيه قويه بين المرشحين ..ويليه المحترم هشام البسطويسي القاضي الذي لم يتقدم عن المراتب الاخيره في استطلاعات الرأي ولم يتفوق علي مرشحي الثورة الاخرين ..يتبقي لديك اثنان ...الشاب المحترم المتفائل الثوري خالد علي الذي يدعمه الكثير من شباب الثورة وغيرهم ممن ينحاز الي فكرة العدالة الاجتماعيه اولا ..بينما يري الغالب الاعم من المحللين ان خالد علي سيكون اكثر قوة في الانتخابات القادمة بينما لن يحصل علي الاصوات الكافيه في الجولة الاولي للدخول حتي الي الاعادة ..
واخيرا المناضل اليساري حمدين صباحي الذي يمثل الفرس الاخر للرهان الثوري للفوز في الانتخابات ..فيتقدم الي جوار ابوالفتوح او بالتبادل معه في استطلاعات الرأي والحوارات المجتمعيه ..ويجذب الكثيرين بشعبيته وشخصيته وروح عبد الناصر التي تجذب اليه العديد من الناخبين ..وهو الثوري الذي عارض مبارك وثار عليه ووقف ضده ونظامه الذي عمل فيه شفيق وموسي ..لسنوات طويلة ...
اذن فنحن لدينا ثلاث معسكرات رئيسية للتصويت ...فلول واخوان وثوريين ...والفلول كما قلنا خسارة فيهم الكلام اصلا ..ومن يريد رئيسا فلوليا ..فهو يستحق ذلك لنفسه ولوطنه ولأولاده ..ولا يستحق قطرة واحده من دم الشهداء الذي روي أرض مصر لاسقاط نظامهم بهم ..وليس لخلع مبارك لوحده ..فلم تقم الثورة لترقية عمرو موسي من وزير خارجيه الي رئيس ولا ترقية احمد شفيق من رئيس وزراء الي رئيس ...!!
والمعسكر الاخواني مقصورا علي مرسي بالطبع ..ويتبقي ابوالفتوح وصباحي اللذان يتنافسان فيما بينمها للحصول علي اغلبيه اصوات المصريين المناصرين للثورة وسيتحملا وحدهما نتيجه عدم اتحادهما او التمسك بالأنا العليا لكل منهما التي تصر ان يكون هو الرئيس وليس الاخر ...فخسارتهما معا ستكون خساره كبري للتيار الثوري ضد الفلول ..فكر جيدا يا عزيزي الناخب ..واعرف انك لن تنتخب مبعوثا الهيا او رئيسا ترضي عنه في كل شارده ووارده...وقد تلعنه في قرار ما وتلعن اليوم اللي انتخبته فيه ..فليس هناك معصوما وليس هناك زعيما ملهما في هذا الزمن ...انتخب رئيس انسان له صوابه وله اخطاؤه ..والا...فلتستعد لعودة مبارك من علي سريره في المركز الطبي ...ماهو اكتر واحد خبره ..والوحيد في البلد اللي اشتغل رئيس قبل كده ...!!!