«إيه القرف اللي بتسمعه ده» تلك هي المقولة التي دائما ماكنت أسمعها من كل اصدقائي الأكبر سنا عندما يجدونني أسمع الأغاني التي أحبها وافهمها وأشعر بما يقال فيها، علي الرغم من استغرابي من رأيهم وسخريتهم مما أسمعه للدرجة التي جعلتني أخفي هذه الشرائط عنهم وكأنها حاجة عيب، إلا أنني كنت مقتنعا أن من أسمعهم وأبحث عن أغانيهم هم أشخاص يشبهونني ويتحدثون ويلبسون مثلي، إلا أن أصحابي لم يستوعبوا هذه الفكرة، حتي إن أحدهم عندما رآني أسمع أغنية «خايف» لمحمد منير وتحديدا عند مقطع: «خايف أوعدك ما أوفيش.. أقولك فيه تلاقي مافيش»، وجدته ينفجر قائلا: «إيه قلة الأدب دي.. اقفل اقفل».. المهم إني في يوم من الأيام، ومن باب التجربة، طلبت من واحد من المجموعة المعترضة علي ذوقي أن يرشح لي حاجه أسمعها، فنصحني أسمع أم كلثوم وأعطي لي شريط كاسيت مكتوب عليه: «أنت عمري»، فسألته ببراءة وغباوة شديدة عن اسم الأغنية التي يرشحها لي من الشريط، فصمت قليلا ثم قال: لا هي أغنية واحدة.. بالطبع تعجبت من أن تكون أغنية واحدة فقط هي الموجودة علي وجهي الشريط، فأكمل هو الكلام قائلا: «آااه ساعة ونص سلطنة ومزاج»، قلت استحمل..أكيد طريق الصح صعب شوية، واتنيلت، قصدي قعدت أسمع الوش الأول، وبعدين الوش التاني، بس الغريب إني مافهمتش حاجة أو بمعني أدق محستش بحاجة كل كلمتين يطلعلي تصفيق حاد أو جملة «الللللله.... الله عليكي ياست».. يا نهار أسود طب أنا هاحس بالأغنية ازاي وأندمج معاها وأفهمها وانا عمال كل شوية اسمع تصفيق وتهليل وطلبات بإعادة المقطع تاني، حتي اني شكيت إنه يكون ضحك علي وان التسجيل ده لبرنامج «ستاند أب» من بتوع اليومين دول، ومبقتش فاهم يعني إيه اقعد أسمع ساعة ونص في أغنية واحدة، ونصفها كمان «الله عليكي يا ست»، وقلت في نفسي انهم كان المفروض يكتبوا علي الألبوم من بره: «أغنية انت عمري والله عليكي يا ست»، واتضح لي أن ده الطبيعي وإن كل الأغاني أو أغلبها بنفس الشكل لتتحول معي أم كلثوم أو أغانيها إلي شيء مهم جدا.. بس وأنا قاعد علي القهوة مع أصحابي زي ما لازم تسمع صوت التقليب وطرقعة الطاولة وأيوه جاي.. أيوه.. أغاني أم كلثوم بالنسبة لي حاجة مهمة بس علي القهوة وبس.