أغنية أطفال عُمرى ما طْلِعتِشْ نخلة مع إنى شُفت فْ سنّى أطفال مش أكبر منّى.. طالعين بِطريقة سَهْلة من غير ما بتحلم زيِّى إنها تبقى عصفورة تِضْرَب بِجْنَاحها وتِعلا وتُحطّ على الجريد. أنا شُفت ولد صُغيَّر طالِع بطريقة تحيَّر بِسُرعة بسرعة بسرعة زى القطر الحديد. هوّه بيطْلَع وانا شايف أنا شايف لكن خايف مع إنّى واقف بعيد. ■ ■ ■ نِفسى يا ناس أطلع نخلة وانزل بطريقة سهْلَة زى الولد الصغيّر واحَصَّل الجريد وأجيب البلح الوَردِى أمْلابُه جيبى ويدِّى. آدى البلح فى مكانُه وانا أهُه فى مكانى لسَّه.. واقِف بعيد. وبايِنِّى حاحلم تانى إنّى أبْقى عصفورة تِضْرَبْ بجناحها وتِعلا وتُحطّ على الجِريد تحط على الجِريد!