عندما استدعيتمونى للرئاسة تعاهدنا على العمل معا والتحمل معا .. اعرف ان القرارات الاقتصادية التى اتخذتها مؤخرا اغضبت منى الفقراء لذلك لجأت الى الوضوح والمكاشفة .. بقول للمصريين رقم عاوزكم تحفظوه كويس 600مليون دولار دة رقم بتدفعوه حضراتكم يوميا فوائد ديون .. الأشقاء بيساعدونا ووقفوا جنبنا لكن لغاية امتى؟ لازم نتحمل ظروفنا ونبدأ نبنى نفسنا .. الموازنة اللى رفضتها وكان فيها الدعم اللى انتم كنتم بتنتظروه كان حايحملكم عجز اضافى للموازنة من 200مليار ل300مليار دولار واوعوا تفتكروا ان القرارات اللى اخدتها حلت كل المشكلة لأ احنا برضو حانضطر نستدين ب250 مليون دولار طب هل القرارات اللى أنا اخدتها دى هل دة وقتها؟
القرار يقول انى مليش ظهير سياسي ومليش غير ربنا القرار يقول انى أخاف على حب الناس ليا لكنى لو خفت حابقى مش بخاف من ربنا لكن مقدرش أؤجل القرارات دى لأنها أصلا قرارات متأخرة ومش أنا اللى أخرتها .. القرارات دى لم يستطع أحد منذ انتفاضة 77 ان يتخذها ويواجه بها المصريين ولكن كله خاف وكله فضل استمرار الاقتراض على انه يواجه غضب المصريين وانا فضلت اتحمله على انى اضحك عليكم واخدعكم بدل ما ابنى لكم مستقبل صحيح القرارات دى قبل ما آخدها اجتمعت بالحكومة واجتهدنا قدر امكانى انها يكون لها اكبر الأثر على القادرين وأقل اثرا على الفقراء قدر الإمكان بحب اعرفكم كمان ان صندوق تحيا مصر مش عامله للموازنة الحالية انا عامله عشان عاوز ابنى مستقبل للشباب اللى مش شايف فى البلد دى أمل وبقول للقادرين مش للفقراء انتم مش ناويين بقى تدوا مصر من حقها عليكم ولا ايه؟ طبعا فى ناس بتحاول استغلال القرارات الأخيرة ضدى وخصوصا فى كلمتى "ان هذا الشعب لم يجد من يحنو عليه ويرفق به" القرارات الحالية على المدى البعيد انتم اللى حاتستفيدوا منها والاعلام عليه دور كبير انه ينور بصيرة الناس ويعرفهم اننا فى حالة حرب حقيقية والبلاد اللى حوالينا بيتم تدميرها كلها بإسم الدين
أنا قلت من سنة وبقول للعالم الارهاب طال المنطقة العربية ومش حايقف عند هذه الحدود هو بالعكس لسة حاينتشر أكتر فيما هو أكثر من المنطقة العربية وبوجه كلامى للمجتمع الدولى "أمريكا وروسيا والصين وأوروبا وغيره" .. طيب هل فى ظروف الاستنزاف الاقتصادى دى وخصوصا آخر 3 سنين حانتحمل ظروفنا وحانبنى بلدنا مع بعض ولا حانسيب الفرصة لفصيل لايعرف الله انه يتعدى حدوده ويوصل لمصر؟ لا ان شاء الله مش حايوصل مصر ومصر لأ لأن مصر فيها جيش وشعب صامدين متفهمين للظروف شديدة الصعوبة اللى مضطرين نواجهها وان شاء الله حانعديها مع بعض
