مش ممكن اللي بيحصل ده.. لازم تكون له نهاية.. وعمرها ماحيكون لها نهاية بالطبطبة وبقنابل الغاز وخراطيم الميه.. وبحكومة لاهى قادرة تمنع الإرهاب ولا هى قادرة تقر إنه إراهاب.. اللي حصل النهارده عند جامعة القاهرة شىء رهيب.. مش قادر أتابع التليفزيون ولا الفيديوهات.. ازاى نافورة دم نازلة من راس بني ادم .. ازاى الاقي لواء شرطة واقع على الأرض .. ومتبهدل اخر بهدلة .. ازاى قنبلتين في محيط الجامعة والتالتة بعدها بساعة .. ازاى تبقى دي مصر .. ازاى وانا بتفرج على الانفجارات ، لازم اتحقق كويس ان كان ده في العراق او سوريا او لبنان .. اقوم الاقي " قبة " الجامعة اللي كنت فيها وانا طالب ، عشان اتأكد مليون في المائة انها جامعة القاهرة وان اللي بيحصل ده عندنا في مصر .. لابد من وقفة .. وليذهب العالم الغربي وامريكا " بنت الجزمة " الى الجحيم! ووسط الهم والقرف ده .. الاقي خبر " معفن " : محاكمة المرشد ومرسي ومش عارف مين في قضية قطع طريق قليوب .. قضية تافهة بقالهم يجي 7 شهور بيحققوا فيها .. أمال حياخدوا كام سنة تحقيق في قضية الاتحادية ، وكام سنة تحقيق في قضية التخابر .. قليوب ايه وزفت ايه .. هى المسألة بالعدد ولا بالحسم .. يافرحتي بمليون قضية ضد مرسي .. وهو قاعد ياكل ويشرب زي الحلوف في السجن وبيهدد بشكل علني ويقول لنا : لسه التقيل جي .. منين جاب الجبروت ده والعين القوية دي .. ؟ لانه شايف ميوعة وايد مرتعشة ومعاملة بالشوكة والسكينة .. وحاسس ان ضهره مسنود من بره .. واننا عاملين حساب بره وخايفين من بره .. ليقولوا علينا احنا اللي ارهابيين .. وبنقتل الإخوان لأنهم ياحبة عيني " اقلية ". ووسط ده كله وانا قاعد اغلي ومحروق .. يطلع لك واحد يسألني : مين قالك ان اللي عملوا كده النهارده عند الجامعة .. إخوان؟ .. تبقى مش عارف ترد عليه تقوله ايه .. اما انك تضربه بوكسين في وشه واما تعمل نفسك مسمعتوش .. لسه فيه ناس متخيلة ان اللي بيعمل كده الشرطة .. والمخابرات .. عشان تلزقها في الإخوان .. فتخلّي الناس يكرهوهم .. ياسلام .. احنا لسه حنكّرهم .. وهما الاخوان محتاجين .. ده كفاية كنت تسمع واحد منهم بيتكلم عشان تقوم " تتف " عليه .. وبعدين فين عقلك لما تتخيّل ان الشرطة بتقتل ضباطها عشان تحاكم الإخوان .. طيب ماهما بيتنّيلوا يتحاكموا ورؤسهم الكبيرة في السجن .. طيب عايز تقول مثلا ان الشرطة عايزة مبرر قوي عشان تضرب في المليان فتقوم تقتل ناس منها عشان رد فعالها يبقى طبيعي ومشروع ..؟ امال احنا بقالنا قرب السنة مش عارفين نضربهم ليه وسايبين اللي يحرق يحرق واللي يقتل يقتل .. ليه ماخلصناش عليهم بدري بدري .. ان كنا بندوّر على مبرر عشان نضربهم .. ياريت ياخويا .. كنا خلصنا من زمان. انا مش قادر اركز في الكتابة من بشاعة الصور اللي بشوفها .. عشان كده مش حاطوّل .. هما كلمتين مفيش غيرهم .. لابد من حدث جلل وقرار محكمة يهز العالم .. اعدام فلان وفلان وفلان .. مش افترا ولا محكمة ثورية ولا زفت .. مش ممكن تبقى عندي قضية تخابر مكتملة الأركان .. واضيّع وقتي وجهدي ومالي في قضية هايفة زي قطع طريق قليوب .. ملعون ابوها قضية يا اخي .. بناقص القضية دي .. هات الكبيرة واصدر حكمك .. وبلاش خوف وقلق من ردود الفعل .. مش ممكن تكون اكتر ولا اكبر م اللي بيحصل دلوقتي .. حنفضل خايفين .. حتزيد التفجيرات يوم بعد يوم .. وادي دقني اهه .. لو اتعملت انتخابات رئاسية .. وكل شارع فيكي يامصر كل ساعة .. فيه حريقة وقتيل!!!