لو كان الفيس بوك ده علي أيامنا زي الجيل ده ما كناش فلحنا! قالها أحد الدكاترة في محاضرة لطيفة من نوعية احمد ربك إني نزلت من السماء إلي أرض المدرج حتي أطرب أذنك بسماع كلماتي وأسترسل في شرح حجم المعاناة التي واجهوها قديما كي يحصلوا علي العلم من أساتذتهم الأفاضل ونحن نُضيع العلم بالجلوس في الكافيتريات والانتظار خارج المدرج في الهواء الطلق حيث تتصفح النت من موبايلك برواقة! لا أستطيع بالطبع أن أنكر إعجابي بعلم هذا الأستاذ الفاضل ولكن لست أدري لماذا أصر مخي ان يهرب بعيدا عنه، حيث كلمة أثارها وكان لها وقع مزمار صاخب في جوف الليل علي أذني! وأخذ عقلي يرددها، «زي الجيل ده» ووجدتني أرد في عقلي الباطن بتلقائية أنا من الجيل ده يا دكتور.......... أنا من الجيل اللي هرب من ديكتاتورية كل حاجة حواليه إلي دولة عملها شباب زيه ولقي فيها الديمقراطية الضائعة! زي دولة الفيس بوك وتويتر وماي سبيس وغيرهم أنا من الجيل ده يا دكتور....... اللي العولمة خلته يشوف غيره ويطلع من بيته ففهم حقيقة واحدة عن نفسه أنه مش عايش! فقرر يهرب من الواقع إلي دولة جديدة في عالم بدأ خيال وانتهي بواقع! أنا من الجيل ده يا دكتور........ اللي هرب للهواء الطلق عشان قرر مرة واحده في حياته يتمرد علي واقع أتفرض عليه فقالوا له بابتسامة صفراء باهتة:مسكين، ستطوح به الرياح سريعا كما تطوح بمركب بلا شراع! أنا من جيل ده يا دكتور...... اللي اتولد في الأرض وأهله عاشوا في بلوتو حيث الأفكار المتجمدة وهتاف غريب سمعهم بيقولوه من غير ما يفهموه: ناصر يا حرية!! أنا من الجيل ده يا دكتور........ اللي اتوجد في جاهلية جديدة فيها عبدة أصنام برضه بس أصنام مش من حجر! أصنام أقبح من تلك المصنوعة من أحجار صماء..أصنام فكرية وبشرية! أنا من الجيل ده يا دكتور.......... اللي أهله ماتوا في عبارة وهو قاعد يتفرج علي ماتش مصر وبكل وطنية وحماسة يحسد عليها بيقول: جوووووووووووون! أنا من الجيل ده يا دكتور........ اللي تاه بين ثلاثة وجوه من الإسلام من صنع البشر، أحدهم منزوع الدسم والثاني إسلام أمريكي بنكهة هوليوود أيام مارلين مونرو! وثالثهم إسلام علي طريقة دراكولا وأفلام الرعب! وما أنزل الله بهم من سلطان! أنا من الجيل ده يا دكتور....... اللي بدأها بحلم وحاول يكمل حلمه لكن فوجئ أن روح الحلم نفسه تخاطبه بلهجة حزينة أنا لا أعيش في الجحور كالفئران،أنا حلم أتيت العالم كوميض في الفضاء وأنمو في السماء الصافية حتي أصل إلي كل ذرة في الأفق البعيد ولكنني معك دُفنت في جحر مظلم من بيروقراطية وفساد قبل أن أولد! أنا من الجيل ده يا دكتور....... اللي رجع تاني لأيام سيدنا موسي عليه السلام رغم انه في القرن الحادي والعشرين! أنا من الجيل ده يا دكتور..... جيل جاء في وقت عصيب، أنتهت فيه الحروب المسلحة وبدأت فيه الحروب الفكرية! زمن بدأ بثورة تكنولوجية وفي نفس الوقت بثورة فساد قبيحة! أنا من الجيل ده يا دكتور....... وإدعيلنا ربنا يخرجنا منها علي خير!!
