ماحنا ياما لبسنا ياخويا منك .. خوازيق مغرّية .. جي انت وراسك والف سيف ماتلبس البدلة البيضا .. ياخويات البسها واخلص .. امال لو حمراء حتعمل ايه ..؟ مع اني مش بحب ابدا اسخر من واحد في موقف ضعف زيك .. لكنك تخلّي الحجر ينطق والمؤدب يبقى قليل الادب .. جي لي المحكمة ببدلة سبور وجزمة بتلمع وشراب لون القميص .. وحالق شعرك .. ايييييه ؟ .. جي حفلة ولا رايح تتجوز .. متعيش الواقع بقى .. انت بتتحاكم يا مرسي .. انت متهم في قضايا قتل مش جنحة .. ودي اول واحدة وصندوقك مليان قضايا تانية كتير .. دي يمكن اقلها .. لسه المصيبة السودا بتاعت التخابر والهروب من وادي النطرون وتعالي ياحماس وياحزب الله .. وادخلي مصر وبهدّلي امها وامسحي بكرامة اهلها الارض .. وافتحي السجون واحرقي الاقسام واقتلي اللي تقتليه وحتلبس في الاخر في الشرطة .. فرصة ومش جاية تاني .. لو ركبنا وحكمنا .. ولا الف سنة عشان نسيب الحكم. ايييييه .. ياعم مرسي .. فوووووق لنفسك .. وعيش الواقع الطين اللي انت حطيت نفسك فيه .. القاضي يقولك البس البدلة البيضا .. تقوله حاضر سعادتك وانت عينك في الارض .. انما الحق مش عليك .. الحق على اللي خلّوك تيجي المحكمة " عريس " .. لسه بتعاملوا معاك من ادبهم على اعتبار انك كنت رئيس جمهورية .. فصدقت نفسك وصوتك عالي في المحكمة .. القاضي ينده عليك : المتهم محمد مرسي العياط .. ترد ببجاحة غريبة .. اسمي الدكتور محمد مرسي الرئيس الشرعي لمصر ورئيسك ورئيس اللي خلفوك .. اقسم بالله لو انت على حق بجد كنت صفقت لك وانحنيت امامك احتراما وتبجيلا لرجولتك وشجاعتك .. وكنت كتبت النهارده كلام تاني خالص . لكن تبقى عامل بلاوي سودا وملفك مليان قضايا اقل واحدة تاخد فيها تأبيدة .. وعايش الدور وانا وانا وانا .. انت زفت وطين .. والسنة اللي حكمت فيها كانت سنة سودا على دماغك ودماغنا قبل منك .. اللي زيك يحاول يبان انه غلبان .. مضحوك عليه .. لبسوك العمة وحطوك في وش المدفع .. وانت ياحبة عيني لاكان ليك في الرياسة ولا الخباثة .. قول كده .. يمكن نتعاطف معاك ونقول ده غلبان بجد .. عيل وغلط .. انما تبقى قاتل اخويا وابني وابويا وامي .. وبدل ماتقول سماح النوبة وحقكم عليا .. جي تبرق لنا وتقول لنا انك لسه الرئيس .. صحيح اللي اختشوا ماتوا .. وانت البعيد لا عندك حيا ولا خشا .. لامنا ولا من ربنا قبل الكل وفوق الكل. عملتوا هليلة في المحكمة امبارح .. واهنتوا المنصة والنيابة ورافعين صوابعكو الاربعة .. اللي بقت مسخرة .. وهاتك ياغلوشة على المحكمة كأننا في خرابة من الخرابات بتاعتك اللي انت كنت شايف كام صباع هناك بيلعبوا في البلد وعايزينها تبقى حريقة. يا اخي اختشي واتقي الله .. وبدل التمثيلية المعفنة اللي عملتوها بالاتفاق مع بعض في القفص .. كنت – بما انك الكبير بتاعهم – قولهم اتلموا شوية وهدّوا اللعب .. عشان ربنا يكرمنا كلنا وترسي على تأبيدة .. وينعم علينا بس بالبدلة الزرقا ويبعد عننا شر عشماوي وبدلته الحمرا .. ده كلام الناس العاقلين اللي عارفين هما عملوا ايه وكانوا ناويين يعملوا ايه .. فيحطوا جزمة في بقهم ويسكتوا .. انما مبدأ خدوهم بالصوت مينفعش في الحتة دي بالذات .. أديك يا سيدي قلت انا الرئيس الشرعي والمحكمة دي باطلة .. واللي معاك في القفص عطونا ضهرهم .. " مش عارف ليه " مع ان المحكمة كلها رجالة وبشنبات وزي الفل ومالهمش في لعب العيال ده .. اخدت ايه في الأخر غير البهدلة وقلة القيمة .. انت رحت على سجن بجد وبحق وحقيقي ولبست غصب عنك البدلة البيضا .. والكام قفا اللي معاك رجعوا تاني طره يغنوا ظلموه. كنت اسمع كلام القاضي والبس يا مرسي البدلة .. الراجل يرفع الجلسة وانت تخرج بأدب .. تقلع بدلة العريس وتلبس بدلة المتهم .. وتقف مؤدب كده ومحترم قصاد القاضي .. محزوق في كلمتين قولهم وانت ملتزم بتطبيق القانون .. انما اللي انت عملته والكام قفا اللي معاك .. منفعكش في حاجة .. وفي الأخر ايه اللي حصل ؟ .. اترحلت ع السجن .. و" لبست " يا مرسي!
