بكرة.. تفتكروا إيه أكتر حاجة بتشغلني وشاغلة بالي، وبافكر فيها طول الوقت؟! ممكن ناس كتير تكون فاكرة إني مشغولة بس بالتفكير في الأغاني والكليبات بتاعتي أو بشكلي ولبسي، أو بالشهرة اللي حققتها وإزاي أقدر أزودها في المستقبل.. نفس الناس دي هتستغرب جدا أن تفكيري في كل الحاجات دي مش بياخد وقت كبير قوي من حياتي.. زي الوقت اللي بافكر فيه في كل اللي بيحصل حواليا من قتل ودمار لأهلنا في غزة ورام الله وفي العراق.. يمكن تستغربوا أن كل قلقي من بكرة له علاقة بناس تانية خالص ظروفهم صعبة ومحزنة، وإحنا مش بنفكر حتي نهتم بيهم ونمد لهم إيدينا، وده اللي بيزود إحساسهم بالألم والعذاب، أتمني أنه مع أول أيام 2010 تبدأ ظروف أهلنا في فلسطين والعراق تتحسن، ويبدأوا يعيشوا حياة طبيعية زي باقي الناس كلها.. أتمني من كل إنسان مش بس عربي ولا مسلم إنه يفكر شوية بعقله ويجرب يحط نفسه مكانهم للحظة ويتخيل حياتهم ماشية إزاي وعايشين بالشكل ده إزاي. أما أمنياتي لنفسي في 2010 فأتمني إني أقدر أحقق فيها نجاحًا كبيرًا في شغلي وأتمني من ربنا أن يقدرني أني أسعد كل الناس اللي حواليا وأساعدهم يحققوا كل الحاجات اللي بيحلموا بيها.. وأتمني إن السعادة اللي باعيشها مع زوجي تفضل مستمرة إن شاء الله، ويفضل بيتنا أسعد مكان في العالم كله، وأتمني كمان لكل الناس إنها تحقق أحلامها وأمانيها وأطلب منهم أن يتمسكوا بأحلامهم علشان تحقيقها سهل قوي بس أوقات بيحتاج شوية وقت وشوية إخلاص للحلم نفسه.. كل سنة وأنتم طيبين و2010 سعيدة علي الجميع.