ياسلام ع التناحة ياولاد .. لما الدنيا تبقى مولعة توليع والناس في بور سعيد بقالها اسبوعين في عصيان مدني ، وبتوع المنصورة مش طايقين دبان وشهم من القرف والكبت .. وكل أهالي المحروسة اللي انتخبوا مرسي بيضربوا نفسهم ميت جزمة قديمة .. وجبهة الإنقاذ أعلنت مقاطعة الانتخابات اللي حتتزور .. والجيش على حد قول قادته نفذ صبره.. وعيالنا يوم بعد يوم بنودعهم للأخرة .. ومرسي قاعد " فاشخ بقه " وبيضحك وبيقول بالفم المليان : اصل احنا كجماعة الإخوان المسلمين جلدنا تخين .. مش بنحس .. التناحة والكذب عندنا فرض .. يعني م الأخر اعملوا مابدالكم .. ولعوا في نفسكم .. موتوا .. اقلعوا ملط وامشوا في الشارع .. والله ما تتحرك في راسي شعرة .. لأني زي ماقلتكم جلدي تخين .. فاقد للإحساس .. فمش فارقة معايا اللي يموت واللي يتعذب واللي يُغتصب في الجبل الاحمر ، ولا الواد الغلبان بتاع البطاطا .. ولو حصل أد اللي حصل مليون مرة .. مش حامشي .. مش حامشي .. مش حامشي!
طيب واحد زي ده نعمل معاه ايه ؟ .. ننزل له بمليونية ؟ .. طظ .. نعمل عصيان مدني في البلد كلها؟ .. ولا تفرق معاه .. ايكش تولع .. طيب نحرق له البلد يمكن يحس ؟ .. بسيطة وهو كان حريق القاهرة عمل ايه يعني زمان .. اللي يتحرق نبنيه تاني ونسجن اللي حرقه وننفخ أمه .. وعندنا اللهم لا حسد وزير داخلية سانن السكاكين ونازل ذبح في الناس .. وكل رجالته ماشين في الشارع فاتحين سوستة البنطلون .. يهددوا الستات في الميادين والرجالة في الاقسام والجبل الاحمر .. نظام ابن جزمة فاجر ومستقوي .. مشفنهوش بكل العهر ده ايام مبارك .. عملوها مرة بس في عماد الكبير .. هتكوا عرضه بعصاية والضابط اللي عملها اخذ 7 سنين سجن .. انما في عهد مرسي المسائل بتتطور .. اغتصاب بمعناه الحرفي للرجالة عشان عنيهم تنكسر .. واللي عمل كده مفيش بني ادم حاسبه ولا حقق معاه .. ولا حتى عاتبه وقاله عيب!
طيب نعمل ايه مع نظام فاجر وواطي وقليل الأدب .. وجلده زي مابيقول رئيسه تخين ؟ .. نستسلم ولا نقاوم .. نيأس ولا " نقاوح " مادام الحق معانا .. واذا مفيش حاجة من دي نفعت نرفع الراية البيضا ونسيب لهم البلد ينهبوها ويبيعوها لقطر .. حتى اهرامات الجيزة وابو الهول عايزين يبعوه كأنهم هما اللي بنوها وبنوه .. والله العظيم حيبيعونا هدومنا بعد كده وحنمشي في الشارع بلابيص .. وهما جلدهم تخين ابن كلب .. لايهمهم سترك ولا اكلك ولا شربك .. زهقان .. ولع في نفسك .. قرفان معندناش لمون تاني .. مش عاجباك البلد ؟ سيبها والباب يفوت جمل .. خلّي الدنيا تخف شوية وخلّي الهوا يدخل من الشبابيك والبيبان .. ياتكم القرف شعب قلق عايز الحرق.
عشان كده .. وحفضل اقول واكرر .. اللي جلدهم تخين لازم سكينة حامية من بتاعت الخرفان والبقر والجاموس تقطّع فيه حتة حتة وتشيل طبقة طبقة لحد مايصرخ ويقول تبت الى الله ..
وبصراحة ربنا .. عشان تقوم ثورة تاني عايزين وقت طويل .. يكون الإخوان خربوا البلد وقضوا على مستقبل عيالنا .. وصوت الناس دلوقتي عالي اوي وهو بينادي على الجيش .. أهالي بور سعيد راحوا يعملوا توكيلات للقوات المسلحة عشان تمسك البلد .. والنظام - من جبنه – قفل الشهر العقاري ومش حيفتحه تاني .. والناس في البيوت وعلى القهاوي مش شايفين الحل غير في الجيش .. وجيشنا جيش مصر .. مش جيش مرسي والإخوان .. ورئيس الأركان قالها علانية : لو الشعب عايزنا ننزل .. في اقل من الثانية حنكون في الشارع .. والكلام له معنى وله وجاهته وأسبابه .. رجالة القوات المسلحة طهقت من عمايل الإخوان ووساختهم .. وادي البلد بتتباع قصاد عينينا .. والجيش بيحمي البلد ومش ممكن حيسكت ابدا على المسخرة دي .. والا يبقى خاين للأمانة وميستهلش نستأمنه على أرضنا وعرضنا.