25 يناير قرب أوي .. اسبوعين تقريبا ويهل علينا .. وبالمناسبة دي قلت اقضّيها شعر النهارده .. وحابدأ بعمنا كلنا احمد فؤاد نجم : يسبق كلامنا سلامنا يطوف ع السامعين معنا ..عصفور محندق يزقزق كلام موزون و له معنى. مصر يا امّة يا بهية .. يام طرحة و جلابية .. الزمن شاب و انتي شابة ..هو رايح و انتي جاية .. جايه فوق الصعب ماشية .. فات عليكي ليل و مية .. و احتمالك هو هو .. و ابتسامتك هي هي .. تضحكي للصبح يصبح .. بعد ليلة و مغربية .. تطلع الشمس تلاقيكي .. معجبانية و صبية .. مصر يا امّة يا سفينة .. مهما كان البحر عاتي .. فلاحينيك ملاحينيك .. يزعقوا للريح يواتي .. اللي ع الدفة صنايعي .. واللي ع المجداف زناتي .. واللي فوق الصاري كاتب .. كل ماضي و كل آتي .. عقدتين و التالته تابتة .. تركبي الموجة العفية .. توصلي بر السلامة .. معجبانية و صبية.. يا بهية
ولعمنا نجم برضه من زمان : وممكن تشوفهم في وسط المدينة .. لو مر جنبك اتومبيل سفينة .. قفاهم عجينة كروشهم سمينة .. جلودهم بتضوي دماغهم تخينة .. سنانهم مبارد تفوت في الجليد.. مفيش سخن بارد بياكلوا الحديد.
ومن تتر مسلسل " زيزينيا " لنجم برضه : وسمعت صوت النديم نسايم .. ع البحر صبّح والبحر هايم .. وسمعت سيد بيقول يا مصري .. الدنيا صاحية ليه انت نايم. وقبل ما اسيب نجم مش ممكن انسى له هذه الأبيات : قصرك المسحور غيلانه أغبي من دود الغيطان .. بعد مص الغصن الاخضر ينحتوا عضم العيدان .. وإللي خلا الارض خضرا وإللي خلا الدار أمان .. عاش بجوعه ملو جوفه .. مات بخوفه م الغيلان .. روّح الغلبان ما قالشِ عن شقا العمر إللى كان .. كلمتين لمصر يبقوا هما آخر كلمتين .. حد ضامن يمشي آمن .. أو مآمن يمشي فين.
وللشاعر الكبير اوي سيد حجاب في " ليالي الحلمية " :متسرسبيش يا سنينا من بين إيدينا .. ولا تنتهيش ده إحنا يادوب إبتدينا .. واللى له أول بكرة ح يبانله آخر.. وبكرة تفرج مهما ضاقت علينا.
وللرائع الجميل محمد منير : خلّي الندي من احلامك يسقي النبات من ايامك.. حطي اللي خلفك قدامك .. تلقي البلد عامرة .. الليلة يا سمرا .
وفي حدوتة مصرية : منرضاش يخاصم القمر سماه .. منرضاش تدوس البشر بعضها .. منرضاش يموت جوه قلبي نداه ..منرضاش تهاجر الجذور ارضها .. يا ناس ياناس يامكبوتة ..هى دي الحدوته .. حدوته مصرية.
وللرائع ابن الرائع وابن الرائعة فاطمة قنديل .. عبد الرحمن الابنودي من مربعاته اليومية في جريدة " التحرير " : نفسي في زعيم أعزّه.. يجري الوطن في عروقه .. لاعدو يوم يهزّه .. ولا فيه جماعة تسوقه .. وايضا : انا اللي دافع حق الملابس .. اللي انت ماشي متباهي فيها .. وانا اللي دافع حق الرصاصة .. اللي انت ناوي تقتلني بيها .
ماحناش اغلى م اللّى ماتوا!! .. ومربعة رابعة : وعندهم بلطجيَّة غير النوع اللي كان .. بيضربوا بهمجية .. ويجروا يلبوا الأذان. وبعيد عن مربعاته التحفة اخترت من تتر شيخ العرب همام : هى البطولة تعيّش اسمك .. ولا البطولة انك تعيش .. ياعم شوفلك دوا مخالف .. دوا الزمن ده ما بيداويش.
واختم بالرائع الرائع الرائع جمال بخيت من قصيدة دين ابوهم اسمه ايه واخترت منها هذه الابيات تحديدا : اللي انا معرفوش .. الوحوش الكروش .. اللي لو طالوا رقابينا .. بينهشوا مبيرحموش .. دين ابوهم اسمه ايه .. اللي داسوا فوق رؤوسنا بالبيادة .. اللي مشيوا بالبلاد للبلادة .. اللي فتاوايهم فساد للعقل .. يقضي على العبادة .. اللي مسحوا من الآيات معنى الشهادة .. دين ابوهم اسمه ايه .. لوّثوا الدم في عروقنا .. سدّوا عين الشمس فوقنا .. سرقوا ضوئنا صادروا نيلنا .. ودفّعونا تمن وضوئنا .. دين ابوهم اسمه ايه ؟
اللي باع وطن بحاله خضرته وصفرة رماله .. نسوته وشهوة رجاله .. بهجته ودمه وعياله .. خطوته وسنين نضاله .. ثورته ضد احتلاله .. دين ابوهم اسمه ايه.
ايه يامصر ايه يا ارض الطيبين .. اللي حكموا في الزمان ده يبقوا مين .. دين ابوهم اسمه ايه .. حد يعرف فيكوا دين كل اتباعه لصوص او قوادين .. في المعاصي مولودين .. في الكراسي مأبدين .. في التفاهة معدودين .. في السفاهة مفرودين ..ع البلاهة مسنودين .. للشراهة مجندين ..ع القرف متعودين .. ع الشرف متمردين .. بالخيانة موحدين .. اللي يعرف دين كده يقوللي عليه .. دين ابوهم اسمه ايه؟