أنا بحب المطبخ أوي، وحبيت أجيب لكم النهارده طريقة عمل "الكبيبة الشامي"، هتعجبكم أوي إن شاء الله.. المقادير الغلاف الخارجي ربع كيلو لحمة حمراء ربع كيلو برغل ناعم منقوع ومصفى جيداً من الماء معلقة صغيرة كبيبه صيني (من عند العطار) بصلة متوسطة بهارات مشكلة ملح الحشو حوالي نصف كيلو لحمة مفرومة مضاف إليها بصلة مفرومة أيضاً، وتشوّح مع قليل من الزيت حتى يُصبح لونها بني، ونضيف إليها نصف معلقة صلصة صغيرة وبهارات وملح، ويضاف إليها ماء ونتركها حتى تتشرب الماء تماماً وتتخلص من أي سوائل بها وتستوي. الطريقة 1- نخلط ربع كيلو اللحمة ونفرمها مع البرغل المنقوع، وبعدين نضيف عليهم الكبيبة الصيني والبصلة والملح والبهارات ونفرمهم كويس مع بعض، وبعد كده نتركهم في الثلاجة حتى يتماسك الخليط قليلاً. 2- نحضره من الثلاجة ونشكل الكبيبة على شكل كرة، ونعمل فتحة من المنتصف و"نقورها" بالإصبع حتى يصبح إطار الكرة رقيق جداً، وده هيكون الغلاف الخارجي للحشو. 3- نضع بداخله الحشوة بعد تصفيتها جيداً من الزيت، ونقفل الغلاف الخارجي على الحشوة ونكورها على شكل بيضة ونكرر بنفس الطريقة لغاية ما نخلص المقدار كله ونضعه في الثلاجة لمدة عشر دقائق. 4- نطلع الكبيبة من الثلاجة ونقليها في زيت غزير لحد ما تحمر من بره، وعلى فكرة مش هتاخد وقت في القلي؛ لأن الحشوة مستوية، ومجرد الغلاف الخارجي بس اللي هيحمر.. وعلى فكرة ممكن تعملي منه كمية وتشيليه في الفريزر وتستخدميه في أي وقت؛ لأن الكمية بترمي معاكِ.... وبالهنا والشفا. في النهاية كل أسرة "قمر 14" بتشكر الأصدقاء اللي بعتوا لنا وصفاتهم الجامدة دي.. ويا ريت تجرّبوها فعلاً.. وفي انتظار آرائكم.. وكمان وصفاتكم الجامدة على لينك.. ورينا شطارتِك،،،