أعدّها لكم: نيرة أحمد النهارده هنعمل مع بعض كرات الجبنة، ووصفتها سهلة ومكوّناتها بسيطة، وتقدري تقدّميها في أي وقت مع المشروبات الساخنة. كرات الجبنة المقادير: 1⁄2 كوب دقيق ملعقة صغيرة فلفل أسود 4 ملعقة كبيرة زبدة 1⁄2 كوب جبنة شيدر ملعقة صغيرة زعتر 1⁄2 كوب ميه رشة ملح 2 بيضة الطريقة: 1- حطّي الميه على النار وضيفي عليها الزبدة والملح واستني لحد ما الخليط يغلي، وبعدين ضيفي عليهم الدقيق بالتدريج مع التقليب على النار لحد ما الخليط يتجانس، وبعد كده ارفعيه من على النار وسيبيه يبرد شوية. 2- ضيفي على العجينة الفلفل الأسود والزعتر وبيضة، واخلطيهم مع بعض بمضرب اليد، وبعد كده ضيفي عليهم البيضة التانية، واخلطيهم مع بعض كويس لحد ما العجينة تتجانس. 3- ضيفي 3⁄4 الجبنة على العجينة وامزجيهم كويس مع بعض، وبعدين شكّلي العجينة على هيئة كور صغيرة، وبعد كده رشي عليهم باقي الجبنة من على الوش، ودخليهم فرن درجة حرارته 220 درجة مئوية لمدة من 15 إلى 20 دقيقة.
4- طلّعي الكرات من الفرن وسيبيهم على جنب يبردوا شوية، وممكن تقدّميهم مع الشاي أو النسكافيه.. وبالهنا والشفا.
إضغط لمشاهدة الفيديو: خلصت وصفتنا النهارده.. استنونا كل يوم مع وصفات جديدة.. سلام،،،