أنا أولا باشكركم جداً على الموقع الهايل ده، ودايماً للأمام. أما أنا فعندي 22 سنة اتخرجت من كلية التربية، وكنت رافضة أعمل أي علاقة مع حد، وكنت متفقة مع نفسي إني أشيل كل حاجة لخطيبي لحد ما اتقدم واحد -الحمد كويس- وطبعاً بابا وماما سألوا عليه في الأول، وأنا ارتحت له؛ بس المشكلة إنه مسافر. اتخطبنا وسافر، وكانت إجازته قصيرة علشان ظروف شغله، أنا طبعاً واقفة جانبه ومش محسساه بحاجة علشان طبعاً مستقبله أهم حاجة؛ بس أنا خايفة. هو أنا صحيح اتعلقت بيه وحبيته؛ بس باحاول أحكّم عقلي على اد ما أقدر، هو أكيد ما عرفتهوش أوي، طبعاً النت والموبايل مش كفاية، وقلقانة لما أسمع من أي حد إنه اكتشف حاجات بعد الجواز؛ بس بارجع اطمّن نفسي إن أكيد ربنا معايا، وكاتب لي الخير إن شاء الله، ودايماً وأنا باصلي بادعي إنه لو ليه خير معاه يقرب الموضوع ليه؛ بس برده خايفه من اللي جاي، ومش عارفة أعمل إيه. aya