السلام عليكم ورحمة الله وبركاته.. أنا كنت صديقة قديمة ل"بص وطل" ودايما هو اللي بافضفض له وبارتاح له، بجد حاسة للأسف إني مخنوقة أوي قلت أسمع رأيكم.. أنا عندي 24 سنة باشتغل مدرّسة، مشكلتي إني مليانة يعني "بكبوظة" شويتين، بس والله ما أنا عارفة هل دي مشكلة ولا أنا بيتهيأ لي بس والله شكلي مقبول، الحمد لله مش وحشة يعني، بس المشكلة إن كل اللي بيحبني أو بيتعلق بيّ بيكونوا الرجالة المتجوزين.. وأنا غصب عني علشان مالقيتش حد يحبني من سني أو شاب فبامشي مع المتجوزين، وطبعا للأسف ويؤسفني إني أقولها كالعادة بيكونوا عايزين يحسوا حاجة وبعد كده بيسيبوني، وتتكرر القصة مع واحد واتنين وتلاتة وهكذا.. لحد ما قررت إني مافتحش قلبي ليهم وبجد عملت وقفة جامدة معاهم ومع نفسي قبل منهم، والحمد لله ربنا وفقني ومن بعدها أي عريس مناسب ييجي يتقدم لي أكون فرحانة أوي لكن مش باشوف وشه تاني، مش عارفة ليه. أنا عمري بيجري وأنا خايفة أوي، أنا نفسي في إنسان ابن حلال أنا تعبت بقى أوي بجد، هو العيب في جسمي علشان أنا مليانة، مع العلم إن أنا رحت لدكتور ريجيم شاطر أوي بس برضه كان متجوز وحصل كالعادة اللي بيحصل كل مرة.. علشان كده اتعقدت من أي شخص متجوز إني أقرّب منه، بجد ادعوا لي أنا تعبانة أوي، أنا الحمد لله متفوقة في شغلي جدا، ليه فاشلة في حياتي! أنا نفسي أحب وأتحب وأتجوز ويكون عندي بيت وأسرة، مع العلم إن أنا الوحيدة اللي في أصحابي الجميلة الشكل وكلهم اتجوزوا واتخطبوا، إشمعنى أنا؟! أرجوكم ردوا عليّ في أسرع وقت.. أشكركم جدا.
NONA
مشكلتك كما يتبين من رسالتك ليست في حجم جسمك بقدر ما هي في حجم تصرفاتك، اندهشت كثيرا من قولك "بامشي مع المتجوزين" لو أنك تقصدين إنك بتمشي معاهم في الطريق فهذا مفيد للتخسيس! أما لو أن قصدك إنك بتمشي معاهم يعني بتعملي معاهم علاقات فما أغربه من منطق! وما أبرأك حين تظنين أنهم يريدون شيئا أكثر من إنهم "عايزين يحسوا بحاجة"! اتقي الله في نفسك، وراجعي تصرفاتك، واعلمي أن الإنسان ليس جسما فقط لتصير كل مشكلتك في جسمك، الإنسان قلب وعقل ومشاعر وأفكار وأنشطة وثقافة، فأين أنت من كل ذلك؟ أنصحك بأن تمارسي بالفعل ريجيم وليس شرطا أن يكون عند دكتور "عينه فارغة"، ولكن يمكنك أن تمارسيه عن طريق موقع "بص وطل" مثلا، فهو يقدم هذه الخدمة في باب "اخسر وزنك"، ويمكنك أن تمارسي رياضة في مركز رياضي للسيدات فقط وهي كثيرة ومنتشرة في معظم المناطق.. على نفس القدر من الأهمية عليك أن تعيدي صياغة حياتك، فتفكري كيف تستغلين وقتك وكيف تتقدمين إلى الأمام، فتتعلمين علما ينفعك وتمارسين هواياتك بقدر من الحب، وتقدمين خدمات للمجتمع والناس الذين يحتاجونها.. وعليك أن تنتظري رزقك في الزواج فهو آتٍ لا محالة، ولكن لا تتعجليه فإنه قدر الله، وحتى يأتي كوني مثالا للبنت الواعية المثقفة المنظمة التي لا تسمح لجانب في حياتها أن يطغى على غيره من الجوانب.. مع خالص دعائي لك بالهداية والتوفيق.
