بنات كتير بعتوا لنا وطلبوا منا إننا نخصص مساحة نقدم فيها وصفات أكل جديدة.. ولإننا دايماً بنحب نحقق كل طلباتكم.. هنبدأ من النهاردة في تقديم وصفة أكل جديدة يومياً.. وتقدروا تبعتوا لنا كل الوصفات اللي عايزين تعرفوها وإحنا هنقدمها لكم على طوووول.. مش بس كده ده إنتم كمان تقدروا تبعتوا لنا لو عندكم وصفة أكل جامدة.. علشان نقدمها في سفرة دايمة ونعرف كل القراء بها.. وأول وصفة معانا هي.. كفتة الفراخ المقادير: 1/ 2 كيلو صدور فراخ مفرومة. بقدونس أو كسبرة خضراء مفرومة. نصف معلقة نعناع. بيضة. ملح + فلفل أسود + بهارات مشكّلة. بصلة مفرومة. 2 فلفل أخضر حار. 3 فصوص ثوم مفرومين. بقسماط. زيت للقلي. الطريقة: 1- هاتي صدور الفراخ المفرومة واخلطيها مع البقدونس والنعناع والفلفل الأخضر والثوم والبهارات والبيضة والبقسماط والملح وشوية زيت ذرة. 2- ابدئي صبّعي الفراخ، ورصيها في صينية، ودخليها في الثلاجة لمدة نصف ساعة. 3- بعد ما تخرجيها من التلاجة ابدئي اقليها في الزيت، وخدي بالك إنك تهدّي النار عليها علشان تتحمر كويس. 4- بعد ما تتحمر طلعيها وحطيها على مناديل أو ورق علشان تتشرب الزيت. 5- بعد كده رصيها في طبق التقديم، وقدميها مع بطاطس وكاتشاب... وبالهنا والشفا