السلام عليكم ورحمة الله وبركاته، أولا أحب أشكر الموقع لكل ما يقدمه من مساعدة للغير وجزاكم الله كل خيراً. أنا فتاة أبلغ من العمر 18 عاما، ومشكلتي أني تعرفت عن طريق الخطأ في الإيميلات على ولد، والولد من سوريا، وعنده 18 سنة وأنا من مصر، وأول لما اتكلمت معاه كان عن الصلاة والدين الإسلامي وتعاليمه؛ ولكنه فاجأني بأنه قال لي أنه يحبني، وأنه يريد أن يتزوجني وأنه صادق، وكان هذا من أول كلام لنا؛ ولكني رفضت وخشيت أن أعصي الله وقفلت معه. ولكن قبل كم يوم وجدته يرسل لي "وينك معذبتي"؛ فقد جعلتني هذه الكلمة أسمع لحديثه، والله شاهد على أن الكلام لم يخرج بيننا عن حدود الله؛ فقد قال لي إنه بيتكلم جد وإنه عايز يرتبط بي لأنه أعجب بشخصيتي؛ فهو قد شاهد صورتي لأني كنت حاطاها على الميل؛ ولكن حذفتها بعدها لخوفي أن أعصي الله، وأنا كمان قد رأيته. ولكن مشكلتي هي أنني قد حاولت أن أقنعه بالابتعاد عني ونسياني وأن نفضل حبنا لله على أي شيء، وأن الله سوف يجمعنا لو أن هذا خير لنا. وأنني لن أستطع أن أكلمه ثانية لأني أخاف أن أعصي الله وأخون ثقة أهلي؛ ولكنه عندما قلت له ذلك لم يقتنع وقال لي إنه يحب الله أكثر مني؛ لكن أنا أهم عنده من دراسته وكل شيء، وقال لي: إنتي كده بتجرحيني وبتعذبيني حرام عليكي، وأنا لو عملت حادثة إنتي السبب، وقصرت في دراستي إنتي السبب، أنا مش طالب غير إننا نفضل نكلم بعض وأنا هاقنع أهلي وآجي نتجوز، ولو تحبي أعلن من دلوقتي أنا موافق لأني صادق معاكي والله شاهد عليّ. أنا مصدقة كلامه بس أنا خايفة من الحب لأنه لو جه قبل الجواز حاسة إنه ممكن ياخدنا للمعصية لا قدر الله، وغير إننا من بلاد مختلفة؛ فأنا من مصر وهو من سوريا يعني مش عارفة أهلنا هيوافقوا ولا لا، وبعدين إحنا لسه صغيرين، وهو كمان ممكن مشاعره تتغير!!!! أنا بحاول أفهمه إني فضّلت حبي لله وخوفي من المعصية على إني أكلمه؛ خصوصا إنه مش زميل لي في الدراسة ولا من قرايبي علشان أكلمه على النت. هل لو كملت معاه وأنا مش مقتنعة بده لصعوبة حصول زواج للظروف اللي بيننا خصوصا أنا خايفه من الحب ومن إن كل واحد في بلد؛ يعني اللقاء هيبقي صعب والنت مش بيوضح كل حاجة.. يبقي أنا غلط؟؟ وهل لو سبته ولا قدر الله حصل له حاجة.. هل أنا فعلا السبب وهاشيل ذنبه؟ أرجوكم أفيدوني فأنا خشيت أن أعصي الله لأني أحب الله أكتر من أي حاجة في الدنيا، وبعدين هو لو فكر بعقل هيعرف إن أنا صح؟؟ أنا مش عارفة أعمل إيه أرجوكم أفيدوني. أنا بجد مش عارفة أعمل إيه وأرجو الرد يكون سريع بالله عليكم. ن.د
