كل سنة في شهر رمضان واللي بنحوّله دايما لمناسبة استهلاكية من الدرجة الأولى، بتكون مشكلة كل بيت مصري هي الحِمل الكبير اللي بيزيد على ميزانية البيت، علشان تقدر كل ست بيت تجيب طلبات تكفيها طوووووووول الشهر من قبل الشهر ما يبدأ، مع إنه مافيش أي داعي لكده؛ لأن الحياة بتبقى ماشية طبيعي جدا في شهر رمضان ومش بيعلنوا حالة الطوارئ على شراء السكر والزيت واللحمة والفراخ والخضار... وطبعا التهافت على الأسواق وعلى شراء خزين البيت قبل رمضان من أهم الأسباب اللي بتؤدي لارتفاع الأسعار بشكل مبالغ فيه، واللي بدوره بيتسبب في تضخّم ميزانية البيت، وممكن يتسبب كمان في خلافات زوجية كبيرة.. علشان كده النهارده هنحاول نقترح بعض الحلول البسيطة؛ علشان نتغلب على طريقتنا الاستهلاكية في التعامل مع مناسباتنا السعيدة ومع حياتنا بشكل عام.. 1- خزّني بس بالعقل مافيش مشكلة خالص إنك تكوني بتحبّي تشتري حاجتك من بدري، وتبقي عاملة حسابك على كل حاجة؛ خاصة تحضير الأكل في رمضان مش بيبقى مستحمل أي موقف بايخ يحصل لك لو مالقيتيش حاجة معينة عندك. لكن إيه المشكلة إنك تبدأي خطتك التخزينية دي من بدري شوية، يعني مش لازم تفتكري فجأة إن رمضان قرّب وتبدأي تنامي وتقومي بكوابيس إنك ماجبتيش خزين البيت؛ يعني خزّني احتياجاتك بشكل تدريجي وممنهج، بمعنى إن الحاجات اللي ممكن تستحمل تقعد لفترة طويلة عندك اشتريها من بدري؛ زي: التوابل، والياميش، والسكر، والزيت، والرز، والمكسرات، والزبدة... وغيرها، أما بقى الحاجات اللي مش بتستحمل إنها تتخزّن لمدة طويلة فدي ممكن تشتريها أسبوع بأسبوع خلال رمضان، ومش ضروري تجيبيها بكميات كبيرة من قبل رمضان؛ لأنها مش هتديكي النتيجة المطلوبة، خاصة في الحر ده. 2- حددي ميزانية وقائمة بالطلبات حددي ميزانيتك قبل ما تنزلي تشتري خزين البيت، واكتبي قائمة واضحة ومحددة باللي هتحتاجي تشتريه فعلا، يعني مايبقاش مجرد تقليد لجارتك أو صاحبتك، وحاولي على أد ما تقدري ما تتجاوزيش الميزانية اللي إنتي محدّداها لنفسك بأي حال من الأحوال مهما كانت المغريات. 3- بلاش تتخدعي بالعروض والحركات طبعا كل محال السوبر ماركت بتتنافس على إنها تقدم أقوى العروض للمستهلكين علشان تغريهم إنهم يشتروا أكبر قدر ممكن من البضاعة المعروضة؛ لكن إنتي خليكي أنصح منهم واشتري اللي بتحتاجي له بس، وبلاش تجيبي كميات إنتي عارفة إنها أكتر من احتياجاتك لإنك عارفة إن عليها عرض، وفي الآخر ما تستفيديش منها، وتبقى الخسارة أكتر من المكسب. 4- افهمي كويس الهدف من رمضان مع الأسف كتير من ستات البيوت بيكونوا عايزين يعملوا لأسرتهم أحلى الأصناف في رمضان وبكميات تضمن إنهم يشبعوا وزيادة، وبينسوا الهدف الأساسي للشهر الكريم، وهو العبادة والدعاء والإحساس بالفقراء؛ لأن رمضان لم يفرض فقط للحرمان من الأكل ساعات طويلة ثم تعويضها بكميات مهولة من الأكل؛ ولكن علشان نشعر بإحساس الفقير وهو مش عارف يلاقي اللي يكفيه من الأكل علشان نتعلم الصبر. علشان كده لازم وإحنا بنشتري طلباتنا للشهر الكريم نفتكر كويس الحكمة منه، ونعلم أولادنا الهدف من الصيام؛ علشان ما يبقاش كل تفكيرهم هم هياكلوا إيه أول ما المغرب يأذن، وماتنسيش إنه هيكون من الأفضل إن الجزء الزيادة على ميزانيتك تتصدقي به على أسرة فقيرة، وساعتها مكسبك هيكون أكتر من المكسب اللي هتاخديه لما تاخدي عرض مميز من السوبر ماركت عليه 3 علب صلصة. وبكده خلص موضوعنا.. مستنين تعليقاتكم وحكاياتكم مع خزين رمضان.. وكل سنة وإنتم طيبين،،،
