أنا عندي مشكلة ومحتاجة مساعدتكم، أنا عندي 22 سنة، ارتبطت بشخص من سنة ونص، أنا بحبه أوي، وهو كمان بيحبني جدا. كان مفروض يتقدم لي بعد ما أخلص السنة دي؛ بس هو جاله عقد عمل لبلد في الخليج، وطبعا سافر وحاول قبل ما يسافر يتقدم بس ما قدرش نتجة لظروف. أنا ما كنتش فاهمة سافر بقى ليه تلات شهور، وبيكلمني يوميا، وطلب مني أصبر عليه شوية، وقال لي لو بإيده يتقدم هيتقدم النهارده قبل بكرة. المشكلة بقى في أهله شوية رافضين ارتباطتنا، شوية موافقين، شوية يقولوا مش وقته. واللي فهمته منه إنهم عايزين حد يعرفوه أو قريب ليهم، هو طبعا مش موافق، المشكلة الأكبر إنه عايزني أستناه سنة ونص أنا ما عنديش مانع؛ بس خايفه لما ييجي أهله يرفضوا ارتباطنا، وبعد ما استنيته ده كله يرجع عشان يكون لواحدة غيري، بجد مش عارفة أعمل إيه، ومحتاجة مساعدتكم أوي.