النهارده على "سفرة دايمة" وبناء على طلبكم هنعرف إزاي ممكن نعمل قطع الفراخ المقرمشة زي اللي بناكلها في المحلات، جرّبوها وابعتوا لنا رأيكم فيها، وماتنسوش تقولوا لنا كل الوصفات اللي عايزين تعرفوها... قطع الفراخ المقرمشة المقادير: 4 قطع فراخ (صدور أو أوراك) 3⁄4 كوب كورن فليكس مطحون 1⁄2 كوب دقيق بصلة مفرومة عصير ليمونة ملح وفلفل 2 بيضة بهارات زيت للقلي الطريقة: 1- تبّلي الفراخ بالملح والفلفل والبهارات والبصل وعصير الليمون، وسيبيه في التتبيلة لمدة من ساعتين إلى 8 ساعات. 2- بعد ما الفراخ تتّبل، اخلطيها مع الدقيق بحيث إنه يغطيها من كل الجوانب. 3- اخفقي البيضة وتبّليها بشوية فلفل أسود، وحطّي قطع الفراخ فيها، وسيبيها شوية. 4- عند القلي، تبّلي الكورن فليكس المطحون بالملح والفلفل وشوية بهارات، وحطّي الفراخ فيها وقّلبيها من كل الجوانب بحيث إن الكورن فليكس يغطّيها كويس. 5- حمّري الفراخ في زيت غزير وساخن، وحطّيها في طبق التقديم وممكن تقدّمي معاها مكرونة أو بطاطس محمّرة.. وبالهنا والشفا. وبكده تكون خلصت وصفتنا النهارده.. نتمنّى إنكم تجرّبوها وتبعتوا تقولوا لنا رأيكم فيها.. وكمان لو عندك أي وصفة عايزة تعرفيها ممكن تبعتي لنا.. وإحنا هنقدّمها لك في أقرب وقت..