السلام عليكم ورحمة الله وبركاته يا جماعة شوفوا لي حل أرجوكم أنا خلاص هيحصل لي حاجة أنا عندي 21 سنة، ومخطوبة، وخطيبي مسافر؛ بس فيه مشكلة عنده إنه طول الوقت عصبي جدا ويمكن لما يكلمني يتعصب علي جدااا، ودايما أنام معيطة منه؛ بالرغم من كده بالتزم الصمت باقول حرام لأنه في غربة؛ بس للأسف مش بيتغير؛ وبالعكس بيزيد أكتر من الأول وفي الآخر أنا بارجع أصالحه وأقول له ما تزعلش وأضغط على نفسي كتير؛ بالرغم إنه هو اللي مزعلني، ودلوقتي عرف إن أنا باصالحه بيزيد فيها، ويعكنن عليّ وأقول له اتغير يقول لي إنه كده، ومش هيتغير. دلوني أعمل إيه بالرغم من إني بحبه. مجهولة
صديقتنا العزيزة ممكن تكون الأسباب اللي أنت قلتيها دي عن بعد خطيبك عنك حقيقية؛ من أنه في غربة وبيعاني، وأنت ما تعرفيش فيه إيه؛ يعني ممكن فعلا يكون فيه حاجة مضايقاه جدا هناك ومستحمل علشان يجهز نفسه في أسرع وقت، وشايف إن أنت هنا مع أهلك وهو لوحده هناك، وأنت بعيدة عنه تماما، وده بيسبب العصبية. وممكن كمان العصبية تبقى نتيجة طبيعية للضغوط، وما أكثرها في الغربة، وممكن يكون هو من الأول عصبي؛ يعني ده عيب فيه، وأنت ما اكتشفتيهوش... طيب هتعرفي إزاي؟ اسألي نفسك شوية أسئلة هل بيتعصب كده عمال على بطال، ولا لما بتتكلموا في حاجة معينة أو تتناقشوا في حاجة معينة، وهل العصبية دي معاكي إنت بس، ولا دي طريقته عامة؟ وأنت وأهلك طريقة تعاملكم إيه مع أهله يعني فيه علاقات ما بينكم ولا بمجرد ما سافر انقطعت العلاقات؟. من خلال إجاباتك متهيأ لي ممكن تعرفي سبب العصبية لأن ممكن يكون شايف إن فيه غلطات منك أو من أهلك مثلا. وممكن كمان لو علاقتك كويسة مع حماتك توسطيها ما بينكم تعرف سبب عصبيته إيه؟ ده في حالة لو فيه سبب معين طرأ في الفترة دي بس طيب ولو ما فيش؟ لو أنت شايفة إن ما فيش سبب معين يبقى لازم تبعتي له إيميل أو تكلميه؛ نظرا لأنك مش هتقدري تشوفيه وتسأليه بصراحة عن سبب تصرفاته دي.
اسأليه بالراحة: ليه العصبية والتعامل بجفاء، وقولي له: إنك كل يوم بيكلمك فيه بعصبية بتعيطي قبل النوم. وإن أنت مش متعودة منه على كده، وشوفي هو هيقول لك إيه؟ أقنعك وعرفتي إن ده عيب فيه وهتقدري تتعايشي معاه يبقى خلاص سامحيه وكملي، أما لو ما أقنعكيش يبقى في الحالة دي لازم تصارحيه إنك مش هتقدري تكملي بالطريقة دي كتير.. كلميه وجربي وربنا معاكم.