أهلا بكل بنات "قمر 14" في حلقة جديدة من حلقات "جمالك من الطبيعة مع رانيا".. أيام قليلة ونستقبل عيد الأضحى أعاده الله علينا وعليكم بكل خير.. وعلشان الأفراح والمناسبات بتكتر في العيد.. النهارده هاقدم نصايح لكل بنت لسه متجوزة جديد؛ إزاي تهتم ببشرتها، وإيه الحاجات المهمة اللي لازم تعملها كل يوم في بيتها.. وهنعرف إزاي ممكن بالزيوت الطبيعية نعمل مساج للجسم؛ علشان نخسس المناطق اللي بتتركز فيها الدهون.. كمان هنعمل ماسك لتشققات القدمين وبلسم لترطيب الشفايف، تابعونا....
مساج الزيوت لحرق الدهون هنتكلّم دلوقتي عن مجموعة من الزيوت الحارقة للدهون؛ ودي ممكن نعمل بها مساج علشان نسيّح بها الدهون اللي في الجسم. فيه 5 أنواع من الزيوت دي؛ وهي: زيت الزنجبيل، وزيت القرفة، وزيت القرنفل، وزيت البردقوش، وزيت شجر الشاي الأخضر، الزيوت دي هتساعد كل بنت أو سيدة عايزة تخس أو محتاجة تنزل دهون من بعض المناطق؛ زي البطن أو الأجناب أو الأرداف. خليط الزيوت الحارقة للدهون المقادير: * ملعقة زيت زنجبيل * ملعقة زيت قرنفل * ملعقة زيت قرفة * ملعقة زيت بردقوش * ملعقة زيت شجر الشاي الأخضر الطريقة: - هنخلط الزيوت دي مع بعضها، وطبعا ممكن نزوّد الكمية شوية بس تكون بمقادير متساوية حسب الحاجة. - هناخد شاور، وبعدين نحط من خليط الزيوت دي على المناطق اللي عايزين نخسسها ويكون الجسم لسه عليه ميه، ونعمل به مساج للمناطق دي في اتجاه عكس عقارب الساعة لمدة من 5 : 10 دقائق، وبعدين نلبس هدومنا. - يفضّل إننا ندهن الزيوت دي قبل النوم على طول، وممكن ندهنها مرتين في اليوم، بس أهم حاجة إننا ما نتعرّضش بها للضوء أو الحرارة، وطبعا ما ننزلش في الشمس. - هنعمل الزيوت دي يوميا ولمدة شهر على الأقل، وإن شاء الله هنلاقي نتيجة هايلة جدا. - وبالنسبة للناس اللي بتمارس الرياضة علشان تحافظ على رشاقتها، ممكن يستخدموا الزيوت دي ويدهنوها على الجسم، وبعدين يمارسوا التمارين الرياضية، ويسيبوا الزيوت على أجسامهم لمدة ساعتين على الأكثر، وبعدين ياخدوا شاور.
إضغط لمشاهدة الفيديو: الروتين اليومي لكل عروسة بعد الزواج - أول حاجة تعمليها الصبح هي إنك تاخدي شاور، وتلبسي حاجات مناسبة لفترة الصبح (زي: بنطلون وبادي) تكون خفيفة للبيت، وفي نفس الوقت لو حد زارك فجأة تكوني لابسة ملابس شكلها معقول إلى حد ما، كمان بيكون فيه فساتين وبيجامات من موديلات وخامات خفيفة تقدري تلبسيها وإنتِ في المطبخ؛ علشان يكون شكلك لطيف يعني مش لازم علشان واقفة في المطبخ تلبسي ملابس مش حلوة أو يكون شكلك مش مظبوط. - بعد كده تاخدي وجبة الفطار، بس أهم حاجة هي إنك تشربي كوب ميه، وبعدين كوب عصير، وبعدين افطري على وجبة صحية ومتكاملة. - بعد ما تخلصي الفطار هتبدئي تنظّمي يومك زي ما تحبي، بس أهم حاجة لازم تبدئي بها هي ترتيب غرفة النوم، ودي لازم تلمعيها يوميا وتغيّري ملاية السرير وتفرشي واحدة جديدة، وممكن بعد ما تفرشيها إنك ترشّي عليها عطر خفيف. - هيبقى لطيف جدا إنك بعد ما تخلّصي ترتيب الغرفة، تحضّري الملابس اللي زوجك هيستعملها بعد ما يرجع من الشغل؛ وده علشان لو انشغلتي في أي حاجة تانية تكوني حضّرتيها بالفعل. - بعد كده ابدئي حضّري الأكل، وفي الوقت ده حاولي ترتّبي المطبخ وإنت واقفة فيه؛ بحيث لما تنتهي من تحضير الأكل مايكونش عليكِ أي أعباء تانية، وممكن في الوقت ده ترتّبي وتلمّعي البيت؛ لأن مهم جدا إن يكون بيتك على طول نظيف ومترتب. مش بالضرورة إنك تكنسي أو تمسحي البيت يوميا، ولكن على الأقل لازم ترتبيه وتلمعيه، وبالذات حجرة المعيشة تكون مترتبة كويس أوي. - بعد ما تخلصي كل الخطوات دي، وقبل ميعاد وصول زوجك هتاخدي شاور تاني وتلبسي ملابس تكون مناسبة لفترة بعد الظهر؛ سواء بنطلون أو فستان سواريه بسيط. - بعد وصول زوجك حضّري السفرة بشكل شيك ورومانسي؛ يعني حاولي تدخّلي فيه ورود أو شمع. - قبل النوم هناخد شاور مرة تالتة، وبعدين تدهني جسمك بالمرطبات والكريمات المناسبة لكِ، واللي لازم تكون ريحتها حلوة طبعا، وبعدين تلبسي ملابس مناسبة لفترة بالليل. إزاي ترتبي فوط الحمام؟! فيه طرق كتير ممن تطّبقي بها فوط الحمام علشان ترصّيها في الدولاب بشكل شيك، وطبعا دي بتختلف حسب المساحة اللي هنرص فيها الفوط، ودي طريقة سهلة وعملية جدا؛ كل اللي عليكِ إنك تطبّقي الفوطة لنصفين بالطول، وبعدين تطبّقيها مرة كمان بالعرض، وبعدين تبرميها علشان تعمل شكل أسطواني، وترصّيها في الدولاب بشكل هرمي أو جانب بعض حسب المساحة اللي عندك. الطريقة دي بتساعد إننا نرص كمية كبيرة من الفوط حتى لو المساحة صغيرة، وكمان بتخلي كل فوطة ظاهرة بشكل منفصل وتقدري تسحبيها بسهولة من غير ما باقي الفوط تتلغبط.
إضغط لمشاهدة الفيديو: وصفة سحرية لتشققات القدمين المقادير: * ملعقة كبيرة كربونات صودا (هتلاقيها عن العطار) * مقدار من النشا * مقدار من الميه * خل تفاح الطريقة: - دوّبي كربونات الصوديوم في الميه، ويفضّل تكون ميه فاترة، بعد كده حطّي فيها رجلك لمدة نصف ساعة، وبعدين اشطفيها بميه عادية جدا. - بعدين حطّي نشا في علبة بودرة، ورشّي منها على رجلك وسيبيها لحد ما النشا تنشف تماما، وبعد كده انقعي شراب خفيف في خل تفاح أو خل عادي والبسيه، وبعدين البسي كيس بلاستيك وفوقه البسي شراب تقيل، والطريقة دي هتعمليها بالليل قبل ما تنامي، والصبح اغسلي رجلك بالميه العادية، وممكن تدعكيها بليفة خشنة أو حجر. مع المواظبة على الوصفة دي مرة واحدة أسبوعيا، هتلاقي نتيجة هايلة وَقَدَم نظيفة ونضرة وناعمة وكمان لونها فاتح، وكمان التشققات هتتعالج بنسبة كبيرة جدا. العسل لشفايف نضرة الشفايف الصحية بتكون لونها بمبي، ويكون الجلد مشدود ومافيش عليها أي تشققات أو قشور، وفيه طريقة سهلة أوي ممكن نعملها يوميا علشان نحافظ على نضارة شفايفنا؛ هي إننا ندهنها بالعسل لمدة نصف ساعة، وبعدين نشطفها ونحط عليها زبدة كاكاو عادية، ومع الاستمرار في الطريقة دي هتبقى شفايفنا دايما ناعمة ونضرة، وده بلسم ممكن نعمله لشفايفنا بشكل يومي.
بلسم لترطيب الشفايف المقادير: * 1/ 2 ملعقة كبيرة شمع عسل * ملعقة كبيرة ممسوحة عسل * ملعقة صغيرة زيت لوز الطريقة: هنخلط المكوّنات كلها، ونحطها على نار هادية لحد ما الشمع يسيح، ويُفضّل إننا مانسيبوش لحد ما يسخن، وبعدين نصب الخليط في برطمان زجاج ونغطّيه ونحتفظ به في التلاجة، أو ممكن نخلّيه بره التلاجة ومع جو الشتاء هيتجمد. هنحط من البلسم ده على شفايفنا يوميا قبل النوم، هتلاقوا نتيجة هايلة وشفايف ناعمة.
إضغط لمشاهدة الفيديو: خلصت حلقتنا النهارده.. استنونا في العيد وحلقة خاصة مميزة جدا.. وكل عام وأنتم بخير.. سلام،،،
