أنا بجد سعيدة جدا بالموقع، وأنتم ساعدتوني واديتوني آراء وخبرات مفيدة جدا، ودي المرة التانية اللي هاستعين بيكم فيها.. هي مشكلة بجد تافهة -أكيد من وجهة نظر أي حد- بس بتأثّر على راحتي النفسية؛ ببساطة هي الحيرة بين إني أحط ماكياج أو لأ؟ بجد الموضوع ده مضايقني جدا، أنا باحس إني على طبيعتي من غير ماكياج، وإني بابقى حابة شكلي أكتر؛ لكن أي واحدة من صحباتي تقوم قايلة لي: إيه ده؟ شكلك تعبان لا حطي ماكياج أحسن كده حوالين عينك غامق لازم تحطّي ماكياج، وأنا بابقى بالماكياج باحس إني حاطة قناع على وشي، باحس إني مش على طبيعتي، بس بتلاشى كلام أختي أو أي واحدة من صحباتي، بس مش بابقى مرتاحة.. بجد زهقت. mestika أولا.. بنشكرك على ثقتك فينا، وإن شاء الله ماتكونش آخر مرة تراسلينا فيها، وبالنسبة لمشكلتك فهي مش تافهة ولا حاجة، وبيعاني منها وبيفكّر فيها بنات كتير أوي، إن ماكانتش كل البنات مع اختلاف درجات الاهتمام والتفكير في الموضوع ده من بنت لبنت، فحتى مع إيماننا واقتناعنا إن الجمال الداخلي وسمات الشخصية همّ الأهم، لكن برضه ده مايمنعش اهتمام كل بنت بشكلها الخارجي، ورغبتها في إنها تكون في أفضل صورة ممكنة؛ بحيث تكون هي نفسها راضية عن الشكل ده قبل أي حد تاني. وعلشان أكون صريحة معاكِ لازم تعرفي إن المكياج فعلا ممكن يدّي شكل جمالي أفضل؛ خاصة لو البنت عارفة إيه اللي بيليق عليها، وبتعرف إزاي تتعامل مع الأدوات المختلفة؛ بحيث تطلع بأفضل نتيجة ممكنة، وبالتالي ده بيدّي لها ثقة أكبر في نفسها. لكن برضه من ناحية تانية المكياج مش ممكن يدّي نتيجة إيجابية على طول؛ لأن المواد المستخدمة في صنع جميع أدوات التجميل مهما كانت جودتها ومهما كانت الماركة فإنها في الأول وفي الآخر أدوات صناعية، ولها أضرار لا حصر لها على البشرة، وبتجيب آثار عكسية خاصة على المدى الطويل، وكمان مابينفعش لوحده؛ يعني لو البشرة مرهقة والوجه مجهد فإن تأثير المكياج بيكون قليل أوي، ومابيديش النتيجة المطلوبة. يعني إيه الحل دلوقتي.. نحط مكياج ولا لأ؟ زي ما قلت لك الهدف الأساسي من وضع المكياج هو الحصول على أجمل شكل ممكن، وبالتالي الإحساس بالثقة أكتر في النفس. يعني إذا أمكن الحصول على الشكل الجميل ده والثقة بالنفس من غير الماكياج؛ فده طبعا هيكون أفضل جدا، ومن غير أي آثار سلبية إن شاء الله. لكن هل ده ممكن؟ طبعا ممكن بالاهتمام بالماسكات الطبيعية، والتغذية السليمة والمفيدة للبشرة والجلد؛ خاصة الفواكه والخضراوات وشرب الماء بكثرة، وممارسة تمارين رياضية خفيفة، والنوم بدري وتجنّب السهر... وغيرها من حاجات طبيعية، وبتدي نتيجة أفضل وعلى المدى الطويل، لكن المهم المداومة عليها وعدم الزهق؛ لأن نتيجتها بتكون أبطأ طبعا مش زي أدوات الزينة الجاهزة. وبكده تكوني جمعتي بين رغبتك في إنك تكوني طبيعية من غير تصنع، وبين برضه إنك تكوني جميلة وبأقل عيوب ممكنة، وممكن تتابعي معانا باب "قمر 14" هتلاقي فيه نصائح مفيدة جدا إن شاء الله.
ومن ناحية تالتة حاولي تحطي الملاحظات اللي الناس بتقولك عليها في اعتبارك، وبلاش تخديها دايما بشكل سلبي؛ خاصة لو جت من حد أنتِ عارفة إنه بيحبك وبيخاف على مصلحتك؛ يعني بيقول لك كده مش لهدف إنه يضايقك مثلا؛ لكن عشان بينبهك لحاجة ممكن ماتكونيش واخدة بالك منها وعايزك تكوني أحسن، وعليك ساعتها إنك تحطيها في اعتبارك، وتحاولي تتلافيها بالطريقة اللي أنت تشوفيها مناسبة ليك، ولو قررتِ وضع ماكياج؛ فالأفضل إنه يكون في أقل حدود ممكنة؛ يعني كفاية أوي خط كحل خفيف مثلا أو روج بألوان فاتحة، فده برضه هيدي الشكل الطبيعي اللي أنت عايزاه من غير تكلف، وبرضه بيداري معالم الإرهاق اللي ممكن تبان عليك لأي سبب، لكن الطريق الأول والأساسي اللي هيديكي اللي إنتي عايزاه هو اتباع الوسائل الطبيعية وإن شاء الله النتيجة ترضيكي.
