الحلم: أنا فلسطينية وحلمت إن أنا وأهلي دخلنا بيت كبير أوي وكان لونه أبيض وفيه غرفة باللون الأصفر فأنا باقول لهم الله البيت ده جميل أوي إحنا يا ماما إن شاء الله هنبني بيت زي ده في مصر قالت لي إن شاء الله، وكان البيت خالي من الأثاث وكنت حاسة إن البيت ده بتاع ناس بس سايبينه وفضلت أتفرج على البيت غرفة غرفة، ودخلت غرفة حلوة أوي وما كانش فيها غير شباك كبير ومش شايفة غير لون أبيض بس، فأنا قلت آه ده على بحر وكان في الغرفة نفسها ترابيزة سفرة كبيرة أوي وطويلة ولونها أبيض وبابص تحتها شفت الأعمدة بتاعتها لون فضي لامع أوي ودخلت الغرفة دي مرتين وبعدين سمعت صوت حنفية مفتوحة فمشيت وبصيت على الحمام لقيت حنفية مفتوحة وتنزل على بانيو فقلت لبابا أقفلها؟ قال لالالا سيبيها. وبعدين رحت أتفرج تاني على البيت اللي فيه غرف كتيرة ودخلت غرفة فيها كوَر بلون بمبي سبتها وبعدين قلت لماما إحنا هننظف البيت ده لوحدنا ده كبير أوي، ودخلت غرفة لقيت فيها ملابس وصور في الحائط بس مش فاكرة منها غير صورة كانت لفنانة اسمها إليسا، فسبت الغرفة وكل شوية أدخل غرف وأطلع منها لحد ما وصلت إلى الحمامات وهي كتيرة فقلت لماما البيت ده في ناس كتير عايشين فيه، والظاهر كل واحد ليه حمام خاص بيه.
يشير هذا الحلم إلى إحساسك بالضيق رغم اتساع المكان والألم لما تعانون منه تحت وطأة الاحتلال ورغبتك الشديدة في حدوث تغيير جذري في حياتك من شأنه أن يغير شكل الحياة من اللون القاتم إلى اللون الأبيض الذي يشير إلى النقاء والصفاء ورغبتك في الانتقال إلى مكان جديد تشعرين فيه بالأمان والأمن والسعادة والصحبة السعيدة الطيبة برفقة أهلك وأصحابك، ويشير كذلك إلى إحساسك أن مصر هي مصدر الأمن والاستقرار بالنسبة لك وللعرب أجمعين وهذا ما دفعك للجوء إليها هربا من عدم الاستقرار الذي تعانين منه في بلدك.