أنا بنت عندي 18 سنة ومشكلتي إني انطوائية جداً مابحبش أزور حد ولا أشوف حد لما باكون مضطرة أقعد مع ناس باحس إني مخنوقة جداً ومش قادرة أتنفس فعلاً علشان كده بافضل إني أكون لوحدي.. ماليش طبعاً علاقات كتير أوي ومع كده فيه ناس كتير من أصحابي وأهلي بيحبوني وبيحبوا يقعدوا معايا وده لأني باسمع لهم كويس أوي ولو فيه مشكلة باحاول دايماً أحلها ده بيبسطهم مني لكن أنا باتعب أوي إني مش باقدر أتكلم عن نفسي أو أعبر عن اللي جوايا بجد باخاف لو قلت اللي جوايا الناس تزعل مني أو تتضايق.. أنا بحب الناس على فكرة بس المشكلة إني باخاف منهم، دلوقتي أنا وصلت لمرحلة إني مش قادرة أستحمل. أنا عندي مشاكل كتير أوي في حياتي ومش عارفة أتكلم مع حد ماحدش عارف عني حاجة حتى أقرب الناس لي؛ لأني مش قادرة أثق في الناس خالص وحتى لما باحاول أثق فيهم ما باعرفش أتكلم عن نفسي أبداً مع حد أرجوكم تساعدوني.