السلام عليكم ورحمة الله جزاكم الله خير للرد على الرسالة الأولى هو خطيبي لذيذ ومرح، بس كتير بيبقى هايف ومش رزين ، يعنى بيستخدم افيهات من الأفلام بتبقى بايخه وساعات يكررها كتير كل ما تيجى مناسبتها، ده غير انه بيستظرف عالفاضى والمليان، وكمان طيب بزياده يعنى بيتعامل بسذاجه مع الناس يعنى ممكن يقول كلام لشخص مينفعش يتقال فالقدامه يحس انه اهبل او عيل صغير، أنا كلمته كذا مره أوقات كان بيقولى لا عادى انا دمى خفيف وبيطلع العيب منى كانى انا اللى جد زياده عن اللزوم وبحبكها، وأوقات يقولى غيرى فيا ويتقبل، انا عايزة انصحه بطريقه كويسه تخليه يقتنع بالمشكله اللى عنده وخصوصا ان اكيد مفيش حد قبل كده قاله عالعيب ده لان الناس اكيد بتتحرج منه. وشكرًا ليكم مرة تانية صديقتنا العزيزة حاولي تتكلمي معاه بطريقة غير مباشرة عن المواصفات اللي نفسك تكون موجودة في شريك حياتك؛ إنه يكون مثلاً رزين، وإنه يكون سندك ملجأك فى النصيحة، وتنصحية أن لكل مقام مقال؛ يعنى مش كل الأوقات، ومش مع كل الأشخاص، ممكن أهزر معاهم يتقبلوا الهزار بتاعى ، حاولى مثلا تخترعى شخصية من خيالك وتشكرى في الشخصية دى جدًا جدًا، بس توضحيله إن الشخص ده يكاد أن يكون كامل إذا غير من الطيبة الزائده مع الناس وهزاره الزائد عن الحد، وإن اللى فى قلبه على لسانه، وإن شاء الله تقدري تحلي المشكله دي وأتمي دوام التواصل معنا .