حلقتنا النهارده هتكون عن العروسة، هنتكلّم فيها عن أسرار التجميل اللي ممكن تحتاج لها أي عروسة... وطبعا تفتيح المناطق الحساسة أكتر حاجة بتهم كل عروسة مقبلة على الزواج... علشان كده النهارده هنقول لكم على بعض الكريمات الطبية الآمنة اللي بتستخدم لتفتيح المناطق دي، بالإضافة لبعض الوصفات الطبيعية اللي ممكن تعمليها قبل الفرح...
كريمات طبية.. لتفتيح المناطق الحساسة أول كريم هنتكلّم عنه النهارده هو Lucocid (ليكوسيد)، وده كريم طبي، بيستخدم لتفتيح المناطق الحساسة، وهو بيعمل على تقشير طبقة الجلد الميت اللي بتسبب درجة السمار دي على الجلد، وكمان بيعمل على إزالة الحبوب الصغيرة اللي بتظهر في المناطق دي، وطريقة استخدامه بتكون كالآتي: أولا تقومي بإزالة الشعر الزائد من المناطق الحساسة باستخدام السويت أو الشمع، وتنظّفيها كويس جدا باستخدام الليفة والصابون والماء، وبعد كده تدهني الكريم، وتسيبيه لمدة ساعة على بشرتك، وبعد مرور الساعة بتغسلي المناطق دي باستخدام الماء فقط، وبعد كده تدهني نوع تاني من الكريم اسمه Trocyd (تروسيد)، وتسيبيه على بشرتك لمدة ساعتين أو ثلاثة، والكريم ده بيعمل كمهدّئ للجلد يعني ممكن نسيبه لفترة أطول مفيش مشكلة. وبتكرري العملية دي مرتين في اليوم، وبتستمري عليها لمدة شهر ونصف أو شهرين، ولو حسيتي إن بشرتك محتاجة فترة أطول من كده، يبقى لازم تاخدي فترة راحة بعد الشهر ونصف، وفي الفترة دي تعملي ماسكات طبيعية لتفتيح المناطق دي، وبعد كده ترجعي مرة تانية لاستخدام الكريمات اللي قلنا عليها، بس لازم تعملي إزالة للشعر قبل استخدام الكريمات بثلاثة أيام على الأقل. بس فيه حاجة لازم تاخدي بالك منها وإنتي بتستخدمي الكريمات اللي قلنا عليها؛ وهي إن كريم الليكوسيد ده حامي شوية على البشرة، علشان كده لازم نتجنّب إننا نحط على البشرة أي عطور أو أي مواد فيها نسبة كحول عالية؛ لأنها ممكن تسبّب التهاب جامد للبشرة وتلاقي الاسمرار رجع مرة تانية.
إضغط لمشاهدة الفيديو: وصفات طبيعية لتفتيح المناطق الحساسة فيه بعض الوصفات الطبيعة اللي ممكن نستخدمها لتفتيح المناطق الحساسة أثناء فترة استخدام الكريمات اللي قلنا عليها في الفقرة اللي فاتت؛ ومنها: عصير الخيار، وخليط النشا والميه، وبنحطّهم على المناطق الحساسة، بس بشرط إنها تكون نظيفة تماما من آثار الكريمات. وبعد ما نخلّص فترة استخدام الكريمات اللي قلنا عليها، هنبدأ نستخدم نوع تاني من الكريمات وهو Panthenol (البانثينول)، وده كريم معروف وسعره رخيص جدا، وبنبدأ نستخدمه لمدة من شهرين لثلاثة لغاية ما نحس إن جلدنا رايق تماما، والكريم ده مفيد جدا لبشرة الوجه أو أي منطقة في الجسم؛ لأنه بيدي ترطيب وحيوية ونعومة للبشرة. وأثناء ما إنتي بتستخدمي البانثينول ممكن تعملي ماسكات طبيعية عادية لتفتيح البشرة؛ زي ماسك حبّة البركة والأرز اللي قلنا عليه في حلقات سابقة.
إضغط لمشاهدة الفيديو: السكر.. سنفرة طبيعية لبشرة الوجه والجسم البشرة الناعمة من أكتر الحاجات اللي بتتمناها أي عروسة مقبلة على الزواج، والنهارده هنعمل سنفرة طبيعية بمكوّنات سهلة جدا، ومتوفّرة في كل بيت.. المقادير: * ملعقة سكر * ملعقة زيت زيتون وكل اللي عليكي إنك تخلطي الاتنين مع بعض، وبعد كده تعملي به سنفرة لبشرة وجهك وجسمك بعد ما تكوني غسلتيها ونظّفتيها كويس جدا، وبتسيبي الماسك ده على بشرة الوجه لمدة من 10 : 15 دقيقة وعلى بشرة الجسم بتسيبيه لمدة من 20 : 30 دقيقة. والماسك ده بنكرره مرة كل أسبوع أو كل 10 أيام، ومع الاستخدام والمواظبة هتحصلي على نتيجة حلوة أوي؛ لأن أي حاجة بتحتوي على سكر لها تأثير كبير في تفتيح البشرة؛ فمثلا عصير القصب له قدرة كبيرة على تفتيح البشرة وإعطائها نضارة طبيعية.
إضغط لمشاهدة الفيديو: وبكده تكون خلصت حلقتنا النهارده.. أتمنّى إنها تكون عجبتكم.. وكل عروسة تكون لقت النصايح اللي كانت محتاجة لها.. واستنونا في حلقات جاية كتير.. سلام،،،
********************* للرجوع للحلقات السابقة اضغط هنا "جمالك من الطبيعة مع رانيا" *********************
