بنات كتير الفترة اللي فاتت بعتت لنا علشان عايزة تعرف إزاي تعمل تسريحات مختلفة لشعرها في البيت من غير ما تروح لكوافير... وخصوصاً إن الأيام دي الحفلات والمناسبات كتيرة بمناسبة احتفالات رأس السنة... علشان كده جيبنا لكم مجموعة من تسريحات الشعر البسيطة اللي ممكن تعمليها بنفسك في البيت... إزاي تخلّي شعرك يبان أقصر من غير ما تقصّيه؟! لو شعرك طويل وزهقتي من شكله، وعايزه تجرّبي شكلك في الشعر القصير بس من غير ما تقصّيه، يبقى ممكن تعملي الخطوات دي:
الخطوة الأولى أوّل حاجة هتعمليها إنك تدهني شعرك بكمية صغيرة أوي من السيرم؛ علشان تدي لشعرك شكل ناعم، وتداري أي تقصيف في شعرك، وبعد كده قسّمي شعرك نصفين بالعرض، وارفعي النصف الأمامي لفوق، وثبّتيه بكلبسات الشعر. الخطوة الثانية قسّمي النصف اللي من ورا نصفين بس المرة دي بالطول، وامسكي كل جزء ولفّيه بإيدك لفوق، وبعد كده ثبّتيهم كويس في رأسك، بس لازم تتأكّدي إنك مثبّتاهم كويس أوي علشان شعرك مايتفكّش منك بعد شوية. الخطوة الثالثة ابدئي فكّي الجزء الأمامي من شعرك علشان ينزل على باقي الجزء الملفوف من شعرك، ولو شعرك مدرج يبقى هتخلّي طبقات الشعر القصيرة تنزل مدرجة زي ما هي، أما لو كان شعرك كله طول واحد يبقى هتلفّي أطراف النصف الأمامي من شعرك على تحت، باستخدام السيشوار. وبعد ما تخلّصي الخطوات دي كلها وتكوني خلاص راضية عن شكل شعرك، تبدئي ترشّي إسبراي مثبت للشعر، بس خلّي بالك إن الإسبراي يكون بعيد شوية عن شعرك وإنتي بترشيه.
إزاي تبيني شعرك قصير من غير ما تقصيه؟! * صحة وجمال اضغط على الصورة لمشاهدة الجاليري: شعرك مموّج.. إزاي تخلّي شكله مفرود؟! الخطوة الأولى اغسلي شعرك ونشّفيه كويس بالفوطة، وبعد كده دلّكي شعرك بكمية صغيرة من السيرم، علشان تعطي ملمس أنعم لتمويجات شعرك. الخطوة الثانية قسّمي شعرك لخصلات صغيرة، ونشّفيه بالسيشوار، ويفضّل إنك تستخدمي فرشاة السيشوار المستديرة اللي بيكون فيها فتحات كبيرة، علشان تخلّي الحرارة توصل لكل تمويجات شعرك، وابدئي بالسيشوار من فوق لتحت. الخطوة الثالثة بعد ما تنشفي كل خصلة من شعرك كويس وتفرديها بالسيشوار، لفّيها على بكرة للشعر علشان تمنعيها من إنها تتداخل مع باقي الشعر وتتعقد. الخطوة الرابعة بعد ما تنشفي شعرك كله وتلفيه، ابدئي شيلي البكر واحدة واحدة، وبعدين رشّي شعرك بإسبراي للشعر. بس خلي بالك إن زجاجة الإسبراي تكون بعيدة عن شعرك شوية، والإسبراي ده علشان يحافظ على شكل شعرك مفرود وثابت وناعم طول اليوم.
شعرك مموج؟!..إزاي تخلي شكله مفرود؟! * صحة وجمال اضغط على الصورة لمشاهدة الجاليري: تسريحة شعر مُزيّنة بالورود دي تسريحة ممكن تعمليها بنفسك لو عندك سهرة أو معزومة على فرح، أو حتى لو هتعملي حفلة صغيرة لخطوبتك في البيت، وعايزه تعملي تسريحة شعر بسيطة ومش عايزة تروحي للكوافير... الخطوة الأولى هاتي مشط الشعر اللي بيكون فيه سن رفيع طويل من تحت، وقسّمي بيه شعرك نصفين بالعرض، بس خلّي بالك إن الشعر يكون مش مبلول أوي علشان يتقسّم معاكي بسهولة.
الخطوة الثانية ارفعي الجزء الأمامي اللي قسّمتيه من شعرك لفوق أوي واعمليه ذيل حصان، باستخدام رباط قوي للشعر. الخطوة الثالثة بعد كده لازم تتأكّدي إن الجزء الأمامي من شعرك متسرح كويس ومافيش فيه أي شعره واقفة، وممكن ترشّي إسبراي عليه علشان تخلّي شكله ناعم ولامع. الخطوة الرابعة بعد كده ممكن تلفي ذيل الحصان على شكل كحكة علشان ما يتعقدش منكن ويتشابك مع النصف اللي ورا. الخطوة الخامسة اربطي النصف اللي ورا من شعرك ذيل حصان باستخدام رباط شعر قوي زي ما عملتي مع النصف الأمامي بالظبط. الخطوة السادسة قسّمي الجزء الخلفي لمجموعة خصلات، وخدي كل خصلة واعمليها كيرلي على واسع باستخدام المكواة الكهربائية. الخطوة السابعة فكّي الخصلة شوية بحيث تنزل ملولوة، وثبّتيها كويس في رأسك من فوق، وسيبي طرف الخصلة حر من غير ما تثبّتيه بأي حاجة زي ما إنتي شايفة في الصورة.
الخطوة الثامنة خدي باقي خصلات الذيل الحصان الخلفي، واعمليهم بنفس الطريقة اللي فاتت لغاية ما تخلصي كل ذيل الحصان، وتكون كل الخصلات نازلة بنفس الشكل اللي موجود في الصورة. الخطوة التاسعة كرّري نفس الطريقة اللي فاتت مع ذيل الحصان العلوي.
الخطوة العاشرة آخر حاجة تعمليها هي إنك تزيّني شعرك بأي إكسسوار للشعر زي شريطة أو سلسلة شكلها يكون حلو ورقيق، وبعد كده ممكن تحطي ورود طبيعية أو صناعية. وبكده تكوني عملتي تسريحة سهلة ورقيقة في نفس الوقت ممكن تنفعك لو عندك مناسبة أو سهرة.
تسريحة شعر مزيّنة بالورود * صحة وجمال اضغط على الصورة لمشاهدة الجاليري: ولغاية هنا خلص عددنا النهارده... أتمنى إنه يكون عجبكم... ويا ريت تبعتوا تقولوا لنا رأيكم... وانتظرونا في الأعداد القادمة،،،
