رمضان جه بعد طول انتظار.. وفي الشهر الكريم ده بنحب نكتر من العبادات والتقرب إلى الله.. نيتنا قبل الشهر ما يبدأ، أننا هنعمل كل حاجة.. هنقراء أجزاء كثيرة من القرآن.. وهنزود صلاتنا ونحسنها.. وهنزور ملاجئ للأيتام ونعمل خير هناك..
مش كده وبس بنقرر مع دخول الشهر إننا لازم ننزل نصلي التراويح، ونشارك في جمعية ولا اتنين نعمل معاهم شنط رمضان.. وغيرها كتير من الخطط الممتازة اللي كلنا بنعدّها لرمضان..
المشكلة بقى إن أغلبنا ما بيقدرش ينفّذ كل ده.. بندخل في دوامة.. الشغل.. المواصلات.. وقت رمضان بيعدي بسرعة... ونلاقي الشهر خلص من غير ما نعمل حاجة.. علشان كده فكرنا نكسب ثواب سوا.. إزاي؟!
***************************
النهارده يوم التقشف والتواصل الروحي مع الأسَر الفقيرة اليوم الحادي عشر
النهارده هنعمل سوا حاجة جديدة، طبعاً كلنا رمضان بالنسبة لنا معناه أكل كتير وحلويات وخشاف والذي منه، وبمجرد ما يؤذن المغرب نبدأ طبقات من الأكل، يا ترى فكرنا إن في أُسَر ممكن يؤذن المغرب وما يبقاش عندهم في بيتهم رغيف عيش يفطروا عليه، وأنهم بيضطروا يلجأوا لموائد الرحمن المنتشرة علشان يقدروا بس يحظوا بفطار معقول.. والحقيقة إن كتير من المفكرين الدينيين بيقولوا إن أحد الدروس المستفادة لينا في رمضان هو إننا بنشعر بشعور الفقير.. وعلشان كده إيه رأيكم النهارده هنعلنه يوم التقشف، مافيش لحوم النهارده على السفرة، هنكتفي بأكل بسيط وعادي.. ممكن نفطر النهارده فول وطعمية أو حتى كشري، ممكن خضار ورز بسيط بدون أي لحوم وطبعاً مافيش حلو.. ولكن استنى ما تفرحش أوي، لو كنت رب أسرة وتقول هنوفر النهارده، وما تفرحيش أوي لو كنتِ ست بيت وتقولي النهارده إجازة من الطبيخ.. الحقيقة إن أهم جزء في فكرتنا النهارده إننا هنطبخ أكلنا بشكل عادي جداً، يعني تطبخ زي ما كنت هتطبخ في العادي، ولكن بدل ما تاكل الأكل ده، هتخرّجه لأسرة محتاجة، وتكتفي زي ما قُلنا بأكل بسيط، كده كسبت مرة تانية الشهر ده إفطار مسلم، وفي نفس الوقت عرفت ازاي عائلات كتير بتعيش كده مش في رمضان بس لا في السنة كلها.
***************************
اتفق مع جيرانك واكسبوا ثواب.. نضفوا سلم البيت وأمام العمارة اليوم الثاني عشر
النظافة من الإيمان، كلنا عارفين الجملة دي وبنكررها كتير جداً، لكن للأسف ما فكّرناش إننا ننفّذ ده، نخلي النظافة تعبير عن إيماننا، وعلشان كده إيه رأيكم النهارده نعمل كده سوا.. لو كنت لسه بتدرس في مدرسة أو جامعة، فاتّفق مع زملائك، وقرروا إنكم تنظّفوا فصلكم أو المدرج بتاعكم النهارده، تنظّفوه بإيديكم ما تعتمدوش على عامل نظافة أو دادة في المدرسة، اشعروا بجمال العمل الجماعي سوا، وبإحساس تحويل مكان يخصنا لمكان نظيف وجميل.. أما لو كنت أنهيت دراستك أو رب أسرة فعليك وعليكِ إنكم تتفقوا اليوم مع جيرانكم واكسبوا أنتم كمان ثواب سوا، ونظّفوا سلم البيت أو أمام العمارة مع بعض.. ادّوا عامل أو عاملة النظافة إجازة النهارده، وقوموا إنتم بالدور ده، هتشعروا بفرق كبير وإنتم بتشوفوا صنع إيديكم..
***************************
يا ترى ساعة ما بتسمع الأذان بتسيب اللي في إيدك وتروح تصلي بسرعة؟ اليوم الثالث عشر
كلنا بنصلي –أو هو ده المفترض طبعاً- ولكن خلينا صرحاء مع بعضنا.. يا ترى بنصلي فروضنا حاضر؟! يعني وانت قاعد تشتغل والأمور معقدة معاك ووقتك محدود وعايز تلحق تخلص علشان ترجع البيت بدري؛ ساعة ما بيأذن الأذان بتهمّ تقوم فوراً وتصلي الفرض؟ أو لو إنتِ واقفة في المطبخ ووراكِ مليون حاجة لسه ما خلصتيهاش؛ ساعة ما بتسمعي الأذان بتسيبي اللي في إيدك وتروحي بسرعة تصلي؟؟ طبعاً وانت قاعد تتفرج على البرنامج أو الفيلم بعد ما رجعت من المدرسة بيأذن الأذان وأنت متابع وبتقول جواك لسه باقي على الفرض كتير.. صدقني كلنا -مع الأسف- بنعمل كده.. وعلشان كده ثوابنا النهارده إننا هنبدأ نغيّر ده، النهارده مهما كانت الحاجة اللي بنعملها مهمة، ومهما كانت شاغلانا هنسيبها ساعة الأذان ونروح نصلي حاضر، والأجمل لو توفرت لينا الجماعة كمان.. يعني نصلي حاضر وفي جماعة.. ونبقى كده خطينا الخطوة الأولى في إننا نقدم الصلاة على أي فعل تاني، وربنا يقوينا ونداوم على كده على طول..
*******************************
كل دي مؤسسات ومشاريع كبيرة لازم نساهم فيها اليوم الرابع عشر
كلنا بنحب أحياناً نطلّع حاجة لوجه الله، ونساعد بيها غيرنا، النهارده عايزين نعمل ده بشكل جماعي ونعمله من أجل هدف محدد، مثلاً إحنا بنتابع أخبار مستشفى 57357، وبنشوف حالات إنسانية مهمة بتطلع مع أشخاص محترمين في بعض البرامج، ده غير بنك الطعام أو حساب نقابة الأطباء اللي بيستخدم للتبرع للفلسطينيين.. وطبعاً مش هننسى الأطفال الأيتام في الملاجئ، كل دي مؤسسات ومشاريع كبيرة لازم نساهم فيها، مش بس نساهم فيها لا إحنا عايزين نعوّد نفسنا النهارده إزاي نقدر نساهم بشكل جماعي.. وعلشان كده أياً كنت، أب أم ابن ابنة زوج كبير أو صغير، اتكلم مع أسرتك، وأقنعهم بالهدف والمكان اللي قررت تتبرعوا فيه.. أشرح لهم ازاي الناس دي بتعاني وازاي واجب علينا إننا نساعدهم، واجمع ما يستطيعون دفعه، مش مهم لو كان قليل المهم إنكم فكرتم تعملوا حاجة وتساعدوا.. جمّع الفلوس دي وطبعاً لازم تشارك معاهم بمبلغ برضه حتى لو كان بسيط، وأرسلها لأصحابها، وبإذن الله ربنا يتقبل منا..
*******************************
النهارده فات نصف رمضان، إيه رأيك نبدأ مرة تانية؟ اليوم الخامس عشر
كل سنة في رمضان بتنوي تصلي التراويح، وبتبدأ بحماس وبتصلي يوم والتاني وبعدين تبطل، غالباً بتنشغل أو بتكسّل.. النهارده فات نصف رمضان، إيه رأيك بقى نبدأ من النهارده مرة تانية، ونصمم سوا المرة دي إننا نصلي التراويح.. بلاش تصليها بسور كبيرة، وممكن تصليها جماعة مع أهل بيتك أو حتى لوحدك وتبقى إنت المتحكم في الوقت اللي بتقضيه فيها، وبشكل ده تبقى بتعوّد نفسك على صلاتها، وما تشعرش أنها تقيلة أوي.. التراويح من أهم العبادات الموسمية اللي بتميز رمضان، ومش عايزين تضيع من إيدينا وعلشان كده.. من النهارده هتصلي التراويح وهتواظب عليها لآخر رمضان بإذن الله وطبعاً هتيجي هنا ونتكلم سوا إحنا عملنا إيه؟
*******************************
لو عايز تتابع الحلقات الجديدة من فكر ثواني.. تكسب ثواب (اضغط هنا)
لو عايز تتابع الحلقات (1-5) من فكر ثواني.. تكسب ثواب (اضغط هنا)
لو عايز تتابع الحلقات (6-10) من فكر ثواني.. تكسب ثواب (اضغط هنا)
لو عايز تتابع الحلقات (16-20) من فكر ثواني.. تكسب ثواب (اضغط هنا)
لو عايز تتابع الحلقات (21- 25) من فكر ثواني.. تكسب ثواب (اضغط هنا)