أنا بحبكم أوي على فكرة وبعتّ لكم أكتر من مرة قبل كده لما واجهتني مشاكل، والنهارده أنا محتاجة لكم أوي أوي، ومحتاجة ردكم في أسرع وقت.. أنا عندي 21 سنة، كنت مخطوبة لمدة سنة وفسخت من سنة ونص، وكان خطيبي عن حب، ولكن نظرا لعدم تفاهم العيلتين وسوء معاملة والدته وتسلّطها لقينا إن ده الحل الوحيد، وبعدها ارتبطت ارتباط فاشل لم أحسبه في حياتي.. بعدها اتعرفت على مهندس خريج السنة عن طريق صديقة ليّ وأعجبنا ببعض، وهي كانت عايزة توفّق بيننا فقررنا إننا نرتبط، وأول ما يشتغل بعدها بكام شهر يكلّم أهلي فورا ويشرح لهم ظروفه، أنا كنت حاسة إنه إنسان كويس أوي ومحترم، ولو إني مش بحبه الحب اللي يمنعني أبعد عنه، ولكن اتمسكت بيه؛ لأن من الصعب ألاقي حد كويس ومحترم في وقتنا ده، وبعدين خطيبي السابق حاول يكلمني تاني ويوضّح ندمه الشديد في إنه خطب بعدي، وإنه ضحّى بيّ، وعايز يرجع لي، المكالمة قلبت حالي، وفضلت فترة متغيرة، ولقيت إن اللي باعني مرة ممكن يبيعني تاني، ومهما كان حبه فهو ما قدرش يحميني من والدته وغدرها.. المهم دلوقتي حبيبي المهندس ده مشكلته إن شغله واخده أوي ومش بييجي إجازة إلا كل أسبوعين، وكمان مش بنتكلم إلا مرة بالليل وبيكون تعبان، هو بيحبني وأنا مقدّرة شغله، والمسئولية اللي عليه خصوصا إنه لسه بيبدأ حياته، وعايز يثبت نفسه، بس كتير كلّمته عن احتياجي له، وإني عايزة دايما أحس بوجوده حتى لو كان برنّة أو رسالة، وهو مشغول، وحتى لو غاب عني اليوم كله في آخر اليوم أحسّ بمكالمته إنه ما سابنيش ولا دقيقة.. مش بالاقي منه غير إنه بيقول لي خلاص أنا فهمت وحاضر وحاجات كتير باكلمه فيها ويوعدني بيها، ومش بلاقي استجابة وغصب عني دماغي بتروح لخطيبي السابق وحبه ولهفته الدايمة عليّ.. أنا دلوقتي عايزة آخد رأيكم أسيبه ولا أكمّل وأحاول تاني لحد ما يتغيّر ولا هو مش هيتغير؟!! مع العلم إن كل ما أقابله لازم نتخانق على أي حاجة، ساعدوني في أسرع وقت أرجوكم، وآسفة على الإطالة وجزاكم الله خيراً. love.dodo أولاً من بداية كلامك اتكلمتي عن دخولك في ثلاثة ارتباطات، وإنتِ كما تقولين في الحادية والعشرين من عمرك، يعني لسه صغيرة على هذا العدد من الارتباطات، والمشكلة كمان إنك بتدخّلي نفسك في الارتباطات دي سريعا يعني بتخرجي من ارتباط وتبدئي في ارتباط جديد بعده على طول، وكأنك في محل ملابس تختارين من بين المعروض إلى أن تصلي إلى ما تريدينه، وكأنك في سباق مع الزمن بأنك لازم توصلي للهدف سريعا، فأنت لا تعطين لنفسك الفرصة بعد كل ارتباط؛ لكي تحاسبي نفسك لتدركي أخطاءك ومميزاتك وما كسبتِه وما خسرتِه في هذه العلاقة، وما تحتاجين لتغييره في نفسك وما تحتاجين لتقويمه. أما بالنسبة لخطيبك الأول فإن الحال كما هو، ولم يتغير فيه شيء يعني اللي ما قدرتيش تغيريه في الأول ما أعتقدش إنك هتقدري تغيريه دلوقتي، وعندما تصل المشاكل لتصبح بين العائلات ده من الصعب إنه يبقى له حل، وغالبا تنتهي العلاقة بالفشل، وأيضا كما تقولين إن اللي ما قدرش يحميكِ وباعك مرة ممكن بسهولة إنه يبيعك مرة أخرى، طالما أن الوضع لم يتغير فيه شيء. أما بالنسبة للشخص التاني المهندس فهو ليس عيبا فيه أن انشغاله عنك بسبب سعيه لبناء حياته ومستقبله اللي في الآخر هتكون نتيجته عايدة عليكِ، يعني عندما يصل إلى مكانة جيدة ففي النهاية هيكون خير ليكي وهتبقي فخورة إن الإنسان اللي اخترتيه وارتبطتي بيه إنسان ناجح وملتزم، وصدقيني الحكاية دي هتحسي بيها بعدين، وهتبقي فخورة بيها جدا. أما مسألة تقصيره في التعبير عن مشاعره لكِ فهي طبيعة شخصيته، وممكن إنك تساعديه وتعملي معاه الحاجات اللي نفسك إنه يعملها معاكي، ومع الوقت هيفهم طبيعتك وهيبقى بيدوّر إنه يسعدك، بس أهم شيء إنك ما تقارنيش بينه وبين الشخصين السابقين؛ لأن كل إنسان وله طبيعته الخاصة، وله أسلوبه في التعبير عن مشاعره. كما أنك يجب ألا تنخدعي بهذه الأساليب؛ فهي ليست وحدها الدليل على حب هذا الشخص لكِ، فهناك أشياء أخرى تكون معبّرة عن الحب والأهم أن تكوني واثقة من حب هذا الشخص لكِ ومن توافقه معكِ، ومن أخلاقه، وزي ما بتقولي فعلا إنه صعب إنك تلاقي شخص مناسب في هذه الأيام، ولكن لا تجعلي هذا السبب هو الأساس في اختيارك؛ ففي النهاية ستجدين نفسك تعيشين حياتك وأنت غير راضية عنها، فأنت عليكِ اتخاذ القرار بأن تكملي أو تنفصلي، المهم إنك تفكري صحّ في الحالتين وتخططي لحياتك بشكل أكتر موضوعية، وتهتمي بدراستك ومشروعك؛ لأنه هيساعدك إنك تشغلي وقتك بأشياء مهمة ويشغل حيز من تفكيرك، وإن شاء الله ربنا يهديكِ للخير ويوفقك.