موضوع حلقتنا النهارده هيكون عن الحوامل ومرضى السكر، والأطفال في سنة أولى صيام.. وهنعرف مع بعض النهارده إزاي ممكن يصوموا صح دون أن تتأثر صحتهم بالصيام.. وزي ما اتعودنا معانا الدكتور "محمد أبو الغيط" علشان يرد على كل الأسئلة الخاصة بالمواضيع دي... * إزاي الحامل تنظّم أكلها في رمضان وفي نفس الوقت تتجنّب الزيادة في الوزن؟ الحامل معرّضة للزيادة في الوزن في رمضان، وخاصة مع نوعية الأكل اللي مع الأسف بتكون موجودة على الفطار زي الأكل الدسم والحلويات والمحمرات؛ علشان كده الحامل لازم تنتبه لنوعية أكلها، يعني تاكل كل حاجة لكن تبعد عن المسبّك؛ لأن زيادة الوزن فيها خطر على الجنين، وممكن ترفع السكر والضغط، وخاصة لو كانت في شهورها الأخيرة، كمان اللخبطة في الأكل ممكن تسبب لها حموضة مزعجة جداً.
ولا بد من توافر جميع العناصر الغذائية التي يحتاجها جسم الأم، وكذلك اللازمة لنمو الجنين من بروتينات ونشويات ومعادن وفيتامينات في وجبتي الفطار والسحور، مع الحرص على تناول 2 كوب لبن يومياً لإمداد الجسم بالكالسيوم اللازم لتكوين العظام، وكذلك الإكثار من الخضراوات والسلطة والفاكهة علشان طبعاً هم بيبقى فيهم معادن وفيتامينات مختلفة. ومن الأفضل أن يكون "السحور والفطار" عبارة عن وجبات متتالية، ويمكن تقسيمهم لخمس وجبات بكميات صغيرة، ومهم جداً الاهتمام بشرب المياه والعصائر لتعويض السوائل التي يفقدها الجسم مع الصيام؛ وخاصة مع ارتفاع درجة الحرارة، ولازم الحامل دايماً تبقى فاكرة إن الزيادة الصحية في الوزن أثناء الحمل بتكون حوالي من 7 إلى 12 كيلو. * هل فيه مكمّلات غذائية للحامل تساعدها على الصيام؟ هناك بعض المكمّلات الغذائية التي قد يصفها طبيب النساء زي ال folic acid في الشهور الثلاثة الأولى وأقراص الفيتامينات المتعددة أثناء الحمل. * امتى الحامل تفطر؟ الصيام للحامل هو قرار طبيبها المعالج؛ لأنه الوحيد القادر على تحديد حالتها الصحية، فكل حالة تختلف عن الأخرى، ولا بد من استشارة طبيب النساء عن إمكانية الصوم، وإذا كان هناك أي عناصر غذائية أو أدوية مستحبّة أو ممنوعة لكل حالة على حدة. * وبالنسبة للأطفال في سنة أولى صيام.. المفروض الأم والأب ياخدوا بالهم من إيه؟ على الرغم من فرحة الأم والأب بصيام أطفالهم، فإن صيام الأطفال لازم يتحدد على حسب سن ومقدرة الطفل واستشارة طبيب الأطفال قبل اتخاذ القرار، وخاصة لو الطفل طلب الصيام في سن مبكر. ولو الطفل صام لازم الفطار والسحور يكونوا غذاء صحي متوازن يعطي الطفل كل احتياجاته من البروتينات لبناء الجسم والعضلات (في اللحوم والبيض ومنتجات الألبان)، ونهتم إنه يحصل على الكالسيوم الموجود في اللبن لبناء العظام، وياكل نشويات زي اللي موجودة في الأرز والمكرونة لإعطاء الطاقة اللازمة للحركة والنمو، وأكيد المعادن والفيتامينات زي اللي موجودة في الفاكهة والخضار لتنظيم العمليات الحيوية في الجسم وتقوية المناعة. وممكن ياكل دهون وخاصة غير مشبعة زي زيت الزيتون وعباد الشمس (بدون تسخين)، ونبعد عن الدهون المشبعة (السمن والزبد) والدهون التي تم تسخينها (في التحمير مثلاً) وأهم شيء للطفل إنه يشرب عصائر ومية كتير علشان يصوم صح. * ومريض السكر إزاي يصوم صح؟ لا بد من الرجوع إلى أخصائي الباطنة لمعرفة إمكانية الصيام، ولتنظيم جرعة الأنسولين (أو دواء السكر) لتتناسب مع ظروف الصيام. بالنسبة للفطار والسحور لو سمح له الطبيب لازم يكون في صورة وجبات صغيرة لتجنّب الارتفاع المفاجئ في نسبة السكر في الدم، والوجبات تكون متتالية (حتى 5 وجبات في اليوم) لتجنّب الهبوط في نسبة السكر، مع التقليل في السكريات البسيطة زي الحلويات والعصائر المحلاة (إلا عند الضرورة) وبكميات قليلة جداً جداً، والاعتماد أكثر على النشويات المركّبة زي العيش البلدي أو المكرونة السمراء والأرز الأسمر؛ لأنهم بيحافظوا على مستوى السكر في الدم في مستوى مناسب ولفترة طويلة (عكس السكريات البسيطة) التي ترفع السكر بسرعة كبيرة ولمستوى كبير، وسرعان ما تنخفض إلى مستوى أقل من الطبيعي. اقرأ ايضاً: * ريجيم معقول 2 - 3 كيلو * ريجيم عادي 5 - 6 كيلو