رمضان جه بعد طول انتظار.. وفي الشهر الكريم ده بنحب نكتر من العبادات والتقرب إلى الله.. نيتنا قبل الشهر ما يبدأ، أننا هنعمل كل حاجة.. هنقراء أجزاء كثيرة من القرآن.. وهنزود صلاتنا ونحسنها.. وهنزور ملاجئ للأيتام ونعمل خير هناك..
مش كده وبس بنقرر مع دخول الشهر إننا لازم ننزل نصلي التراويح، ونشارك في جمعية ولا اتنين نعمل معاهم شنط رمضان.. وغيرها كتير من الخطط الممتازة اللي كلنا بنعدّها لرمضان..
المشكلة بقى إن أغلبنا ما بيقدرش ينفّذ كل ده.. بندخل في دوامة.. الشغل.. المواصلات.. وقت رمضان بيعدي بسرعة... ونلاقي الشهر خلص من غير ما نعمل حاجة.. علشان كده فكرنا نكسب ثواب سوا.. إزاي؟!
تعمل شوية مجهود وبإذن الله تكسب ثواب أكبر اليوم الأول:
أكيد عندك بواب في العمارة أو شخص غلبان بتشوفة طول السنة، أو شخص عايش حياته فوق الرصيف بتصطدم بيه في طريقك، علشان كده النهارده هنكسب سوا ثواب إفطار مسلم.
* إما إنك هتحدد مبلغ معين -على حسب مقدرتك أنت- وتديه للشخص ده بنية إفطاره..
* أو تعمل شوية مجهود وبإذن الله تكسب ثواب أكبر، وأنت معدي تروح لسوبر ماركت أو حتى البقال، وتجيب (كيس أرز، علبة سمنة ربع أو ثمن كيلو، نصف كيلو لحم مفروم ممكن كيس مجمد من السوبر ماركت للتسهيل، ربع كيلو سلطة - خيارة وطماطماية وفلفلة - كيس خضار أي نوع).
طبعاً الاختيار بين الخيارين دول راجعين لعاملين (وقتك وقدرتك المادية - والشخص اللي هتفطّره). وبكده تبقى فطرت مسلم النهارده وربما عيلة كاملة..
*******************************
رمضان فرصة مبتجيش غير مرة كل سنة.. متضيعهاش اليوم الثاني: النهارده هتدوّر على حديث نبوي أو قدسي جديد. ممكن عن طريق مواقع أحاديث عبر الإنترنت.. مثلا (موقع الدرر السنية للأحاديث) أو عن طريق كتاب أحاديث عندك، فيه كتيبات صغيرة تقدر تجيبها وهتفيدك جداً..
المهم بعد ما هتختار الحديث تقراه وتستوعبه، ويا ريت بقى تجمع إما أبناءك الصغيرين، أو إخواتك أو أصدقاءك من أبناء الجيران، أو أصحابك في المدرسة أو العمل، وتاخدوا من وقتكم 5 دقائق في معرفة معنى الحديث، وكل واحد فيكم فهم إيه واستفاد إيه..
وبس كده النهارده، وكالعادة شاركنا في تجربتك وقل لنا تحب نعمل إيه بكره؟؟
*******************************
روح لدولابك.. واختار حاجة تقدر تستغني عنها، وفكر مين محتاجها؟ اليوم الثالث النهارده هنعمل سوا شيء أكبر شوية، بالتأكيد في كل مرة بتشتري هدوم جديدة يبقى عندك هدوم قديمة، مش عارف هتستعملها ولا لا، حالتها لسه كويسة، وشكلها معقول، وبتفضل شايلها عندك على اعتبار إنك هتلبسها، في الأغلب بتلبسها مرة أو اتنين وتنساها، وحتى لو كنت بتلبسها من فترة لتانية، إيه رأيك بأنك تفكر في ثواني بأنك استطعت إنك تجيب هدوم جديدة وفي غيرك بقاله سنين، حقيقي مش مبالغة سنين مش قادر يشتري أي حاجة جديدة..
روح لدولابك.. بص في هدومك، واختار حاجة تقدر تستغني عنها، وفكر مين محتاجها؟؟
راجل أو ست أو طفل فقير ساكن في منطقة قريبة منك؟؟ شخص بتشوفه وأنت بتمشي في شارع صغير؟ عامل شفته في محل وأنت مرة بتشتري حاجة..
فكّر عايز تدي الحاجة دي لمين؟ من فضلك لفّها لفّة جميلة، أنت بتديله هدية النهارده..
وطبعاً لازم تيجي تشاركنا عملت إيه وحسيت بإيه..
*******************************
كلمة بسيطة ولكن معناها كبير.. معناها أنك قدرت تجاهد نفسك وتعترف بالخطأ اليوم الرابع: أكيد مر عليك يوم اتعصبت على شخص واكتشفت إنك غلطان، أو ظلمت شخص واتهمته بأنه عمل حاجة وهو معملهاش، ربما حصلت بينك وبين شخص ما خناقة وفي نفسك حاسس إنك غلطان..
كلنا حصلت معانا مواقف زي دي، إحنا بشر مش ملايكة، ولكن عارف أجمل شيء في شهر كريم زي ده إيه؟
أننا ننقي نفسنا ونكون صرحاء مع أنفسنا قبل ما نبقى صرحاء مع الغير كمان..
وعلشان كده فكر إنت ظلمت أو ضايقت مين وعليك النهارده إنك ترفع سماعة التليفون وتقوله كلمة واحدة بس..
أنا آسف..
كلمة بسيطة ولكن صدقني معناها كبير.. معناها أنك قدرت تجاهد نفسك وتعترف بالخطأ..
وفي انتظار رأيك حصل إيه لما عملت كده..
*******************************
المهم إنك هتدور وتتعب وتوصل للمعلومة وإنك تفهمها وتشارك فيها آخرين اليوم الخامس النهارده بقى هنعمل سوا حاجة مختلفة، أجمل حاجة إن الواحد يتعلم حاجة جديدة، ولكن الأجمل من ده إنه يشارك الآخرين اللي اتعلمه.. النهارده كل واحد فينا هيختار سيرة من سير الصحابة.. سيدنا أبو بكر، سيدنا عُمر، أو عثمان، أو علي... وغيرهم مئات.. هتختار سيرة واحد فيهم أو موقف مؤثر من سيرته وتقراه بتمعن وتركيز خلي، اللي بتقراه يدخل بقلبك، وفكّر الناس دي كانت بتعمل كل ده علشان مؤمنة بجد.. مش بس كده أنت بعد ما تقرا هتيجي وتشاركنا معاك في اللي تعلمته من السيرة دي وبكده الفايدة هتعمّ علينا كلنا.. طبعاً فيه مواقع كتير على النت بتحوي السير دي تقدر تعمل عليها بحث، أو تقرأ كتيب من الكتيبات المتواجدة في أماكن كتير عن سير الصحابة، أو ممكن تكون تتابع برنامج من برامج رمضان اللي بتعرض سيرهم.. المهم إنك هتدور وتتعب وتوصل للمعلومة وإنك تفهمها وتشارك فيها آخرين.. مستنين قصتك النهارده علشان نشارك بعض..
*******************************
لو عايز تتابع الحلقات الجديدة من فكر ثواني.. تكسب ثواب (اضغط هنا)
لو عايز تتابع الحلقات (6-10) من فكر ثواني.. تكسب ثواب (اضغط هنا)
لو عايز تتابع الحلقات (11-15) من فكر ثواني.. تكسب ثواب (اضغط هنا)
لو عايز تتابع الحلقات (16-20) من فكر ثواني.. تكسب ثواب (اضغط هنا)
لو عايز تتابع الحلقات (21- 25) من فكر ثواني.. تكسب ثواب (اضغط هنا)
