يوم الجمعة بتحلى اللمة على الأكل.. علشان كده حبينا نشاركك اللمة الحلوة دي.. ونكون معاكِ خطوة بخطوة وإنتِ بتحضّري لأحلى وأجمل عزومة في الدنيا.. ونقدّم لك كل يوم جمعة اقتراح لعزومة مكوّنة من: العصير، والطبق الرئيسي، وطبق السلطة، وطبق الحلو.. علشان تنوّعي لعيلتك.. وتبهريهم بأكلاتك الجامدة.. تعالي بقى نشوف هنعمل إيه النهارده.. ******************** ممكن تزيني الكاسات بشرائح الفراولة عصير المانجو بالزبادي المقادير: علبة زبادي عصير ليمونة 3 ثمرات مانجو مقطعة قطع صغيرة 3 أكواب مية باردة 4 معالق كبيرة عسل مكعبات ثلج الطريقة: اخلطي الزبادي مع عصير الليمون مع العسل مع المانجو، واضربيهم مع بعض في الخلاط، وبعد كده صبّي العصير في الكاسات، وحطّي فيه مكعبات التلج.. وبالهنا والشفا. ******************** طبق سلطة بالزيتون والجبنة السلطة اليونانية طبق السلطة اللي معانا النهارده هو السلطة اليونانية، بالرغم من إن الطبق ده يوناني، فإن مكوّناته سهلة وبسيطة جداً وهي... المقادير: 4 حبات طماطم 2 حبة خيار 1 حبة فلفل أخضر 1 بصلة متوسطة 1/8 كيلو جبنة تلاجة 2/1 كوب زيتون أسود منزوع البذر 2 معلقة كبيرة زيت زيتون عصير ليمونة ملح وفلفل الطريقة: 1- قطّعي الطماطم إلى قطع طولية، وقطّعي الخيار والبصل إلى شرائح، وقطعي الفلفل الأخضر إلى مربعات، وقطعي الجبنة إلى مكعبات صغيرة.
2- حطّي الخيار والطماطم والبصل والفلفل الأخضر في طبق السلطة، وضيفي إليهم الملح والفلفل وعصير الليمون ومعلقة زيت الزيتون وقلّبيهم مع بعض. 3- ضيفي إليهم بعد كده الجبنة والزيتون الأسود ومن فوقهم معلقة زيت الزيتون.. وبالهنا والشفا. ******************** ممكن تزيني الشوربة بالبقدونس شوربة الخضار المقادير: كوب بسلة كوب فاصوليا خضراء مقطعة قطع صغيرة 1 ثمرة بطاطس متوسطة مقطعة مكعبات بصلة متوسطة مفرومة 2 جزرة متوسطة الحجم مقطعة مكعبات 2 ثمرة طماطم متوسطة مقطعة مكعبات 2 ملعقة زيت زيتون 3 فصوص ثوم ملح وفلفل أسود كمون وبهارات مكعب مرقة دجاج 3 كوب ماء الطريقة: 1- حطي الزيت في حلة على النار لغاية لما يسخن، وبعد كده حطي عليه البصلة المفرومة والثوم وقلبيهم مع بعض على النار لغاية ما تحسي إن لونهم اصفرّ. 2- ضيفي بعد كده البطاطس والجزر والبسلة والفاصوليا والطماطم وسيبيهم على نار هادية لمدة 10 دقائق مع تقليبهم كل شوية. 3- بعد كده ضيفي البهارات والفلفل الأسود والكمون والملح ومكعب مرقة الدجاج وقلبيهم كويس مع بعض. 4- بعد ما ضيفتي التوابل، حطي المية بحيث إنها تزيد بشوية عن كل الخضار اللي موجود في الحلة.
5- سيبيها على نار هادية لمدة 20 دقيقة لغاية ما تتأكدي إن كل الخضار اللي موجود استوى وبعد كده حطيها في طبق التقديم.. وبالهنا والشفا. ************************ طبق فراخ جامد جداً فراخ بالبشاميل على الطريقة المكسيكية المقادير: كيلو صدور فراخ حبة فلفل أصفر حبة فلفل أخضر حبة فلفل أحمر بصلة متوسطة 2 حبة طماطم مقطّعة قطع صغيرة 2 حبة كوسة 2 معلقة كبيرة زيت ذرة 3 معالق كبيرة زبدة 2 معلقة كبيرة دقيق 3 كوبيات لبن ملح وفلفل فلفل أبيض الطريقة: 1- اغسلي صدور الفراخ كويس، وبعد كده اسلقيها. 2- قطّعي الكوسة والفلفل الملون إلى عيدان، وقطّعي البصل إلى شرائح طولية، وبعد كده قطّعي كل شريحة إلى نصفين. 3- سخّني الزيت في طاسة على نار متوسطة، وبعد كده ضيفي إليه البصل، وقلّبيه لغاية ما لونه يصفر. بعد كده ضيفي إليه الفلفل وقلّبيهم مع بعض لمدة خمس دقائق، بعد كده ضيفي إليهم الكوسة وقلبيهم مع بعض كويس لمدة خمس دقائق كمان بعد كده ضيفي إليهم الطماطم، وقلبيهم مع بعض وسيبيهم على النار لمدة ربع ساعة. 4- بعد كده جهزي البشاميل عن طريق إنك تسخني الزبدة وتضيفي إليها الدقيق مع التقليب لغاية ما لون الدقيق يصفر، بعد كده ضيفي إليه اللبن تدريجيا مع التقليب المستمر لغاية ما يبقى قوامه سميك بعد كده ضيفي إليه الملح والفلفل الأسود، بعد كده شيليه من على النار وبعد ما يبرد هاتي بيضة وحطيها في طبق واضربيها بالمضرب مع الملح والفلفل وبعد كده ضيفيها إلى البشاميل وقلبيهم مع بعض. 5- شغلي فرن البوتاجاز على درجة حرارة متوسطة وهاتي صينية وادهنيها بالزيت وبعد كده حطي فيها صدور الفراخ وفوقها الخضراوات ورشي عليها شوية ملح وفلفل بعد كده هاتي البشاميل وحطيه فوق الفراخ و الخضراوات ودخلي الصينية في الفرن وسبيها لمدة نص ساعة أو لغاية لونها ما يبقى ذهبي وبعد كده طلّعيها وقدميها.. وبالهنا والشفا. ********************** أم علي بالمكسرات أم علي المقادير: 5 أكواب لبن محلى 5 رقائق جلاش 2 معلقة كبيرة زبد 3 معالق كبيرة كريمة لباني 2/1 كوب زبيب 4/1 كوب بندق 4/1 كوب لوز الطريقة: 1- حطي الجلاش على صاج أو صينية وحمصيه في الفرن. 2- هاتي البندق واللوز وحطيهم على صاج أو صينية وحمصيهم في الفرن لمدة 4 دقائق. 3- في الوقت اللي أنتي بتحمصي فيه المكسرات سخني اللبن. 4- قطعي رقائق الجلاش إلى قطع متوسطة وحطيها في طاجن كبير وضيفي إليها البندق واللوز والزبيب وبعد كده حطي اللبن إلى 3/2 الطاجن. 5- سخني الفرن حتى درجة حرارة متوسطة (200 مئوية)، وحطي الطاجن في الفرن لمدة 15 دقيقة أو لغاية ما تلاقي إن الرقائق ابتدت تمتص اللبن. 6- خرجيه من الفرن وضيفي إليه الزبدة و الكريمة من على الوش ودخليه الفرن تاني لمدة 20 دقيقة أخرى أو لغاية ما تلاقي لونه بقى ذهبي طلعيه من الفرن.. وبالهنا والشفا.
وفي النهاية نتمنّى إن عزومة النهارده تكون عجبتِك.. وتجرّبي كل الوصفات وتبعتي تقولي لنا على النتيجة.. وكمان لو عندك وصفة حلوة عايزة تشتركي بها معانا.. ممكن تبعتيها لنا على لينك... "ورّينا شطارتِك" وإلى اللقاء في العزومة الجاية،،،
