بعد لحظات قليلة من إعلان الرئيس السابق محمد حسنى مبارك عن تخليه عن منصب رئيس الجمهورية تعالت الهتافات وتبادل المتظاهرين في جميع أرجاء أم الدنيا القبلات والهتاف والتغني بأجمل الأغاني الوطنية التي غاب طعمها وحماسها بعد حرب السادس من أكتوبر ، فبعد 18 يوم من التظاهر فى مصر من أقصاها إلى أقصاها انحنى مبارك بجبروته وقوته الى مطالب الشعب المصري واختفى صوت المؤيدين وظهر المصريين الحقيقيين . يقول خالد حمدان 26سنة _ أخيرا هنرتاح أخير هنحس ببلدنا اللي كنا حاسين إننا في غربة رغم وجودنا وسط أهلنا أخير هنتمتع بهوا نظيف فى أم الدنيا من خير فساد ولا إهدار لأموالنا يارب النصر لمصر . أما محمود عبد المحفوظ 35 سنة فيقول – أخيرا وبعد 18 يوم فى الشارع بنقول ارحل ارحل أخيرا رحل وريحنا كلنا نفسنا فى مصر جديدة نحبها وتحبنا ميكونش حب من طرف واحد ميكونش حب على ورق ولا اسم فى شهادة الميلاد بس أخيرا هنرفع راسنا ونقول إحنا مصريين . أما آيات محمد 18 سنة – نجح شباب الفيس بوك والانترنت الذى كانوا يقولون عنه " التافه " في أن يسقط النظام الجبار الذي اسقط فى وجوده الملايين من الأصوات المعارضة في عصر اقل ما يقال عنه فى مصر" عصر الظلام " ودخلنا الان فى عصر الثورة والحرية . وتقول إسراء مصطفى 22 سنة – الشعب المصري الآن يشعر فقط بكرامته ومعنى حريته التي حصل عليها بنفسه دون تدخل من اى احد فالشعب وحده هو من حدد مصيره هو من اختار كرامته هو من اختار طريقه الذى يمشى عليه . أما محمود خالد 29 سنة فيقول – انتهى وقت الهتاف ولازم كلنا نقف ايد وحده عشان ما نكونش لقمة سهلة تحت اسناء المتربصين بمصر الذين ظهروا في خلال ال18 يوم السابقين بشكل كبير وان شاء الله مصر قادرة إنها تعدى الفترة دي وتنجح فيها ونبنى وطن جديد يبقى ملكنا مش ملك ناس تانية وخدين تعبنا وشقانا . وتقول الحاجة امل عبد المعبود 65 سنة :- شبابنا كله ضاع مع واحد ضيع حقنا جوه وبره الحمد لله انى عيشة لحد الوقت ده عشان أشوف اولادى وهما عايشين مرتاحين وخدين حقوقهم لاقين قوتهم وقوت أولادهم يارب احفظ لنا مصر واحفظ أهلها .
